Ko e Ngāue ʻi he Siasí
Ko e Lēsoní ʻOku ʻi loto ʻi he Taha Akó
ʻOku tau kamata ke vakai ʻo hangē ko e hangaifofonga ʻa e ʻOtuá ʻi he taimi ʻoku tau fakamoʻoniʻi ai ʻa e meʻa ʻoku malava ke fakahoko ʻe he taha akó takitaha.
Lolotonga haʻaku ʻi ha ngāue faka-Siasi ʻi Kasikou ʻi Pelū, ne ma ō ai mo hoku uaifí ki ha kalasi fakataha ʻa e Fineʻofá mo e Lakanga Taulaʻeiki Faka-Melekisētekí. Ko e faiako he ʻaho ko iá ko e faiako ki he kakai lalahi he Tokāteline ʻo e Ongoongoleleí. Naʻe toe pē ha miniti ʻe 20 ke ne akoʻi e meʻa naʻá ne teuteú, tuʻunga ʻi ha ngaahi palopalema fakataimi tēpile ʻi he ongo ʻuluaki houalotú.
Naʻá ne kamata ʻaki haʻane kole ki he kāingalotu kotoa pē ne kau mai ki he Siasí ʻi he taʻu ʻe ua ne toki ʻosí ke nau tuʻu. Ne tuʻu ha toko nima. Naʻá ne tohiʻi leva ʻa e fika 5 he palakipoé pea pehē mai, “ʻE kāinga, ʻoku fakaʻofoʻofa ke tau maʻu e kau mēmipa ko ʻení ʻe toko 5 ne nau toki kau mai ki he Siasí. Ko e palopalemá pē, he ne lolotonga ʻe taʻu ʻe ua ne toki ʻosí, ne tau papitaiso ai ha kau ului foʻou ʻe toko 16 ʻi he uōtí ni.”
Peá ne tohiʻi leva ʻa e fika 16 ʻo hoko atu pē he mataʻi-fika 5 peá ne fehuʻi mai ʻi he loto fakamātoato, “Sai, ʻe kāinga, ko e hā e meʻa te tau faí?”
Ne hiki nima hake ha fefine ʻo pehē ange, “ʻOku fie maʻu ke tau ō ʻo kumi mo fakafoki mai kinautolu.”
Ne loto ki ai ʻa e faiakó peá ne hikiʻi ʻa e foʻi lea fakahaofí he palakipoé. Pea pehē mai, “ʻOku ʻi ai hatau kāingalotu foʻou ʻe toko 11 ke fakafoki mai.”
Peá ne lau mai leva ha kupuʻi lea meia Palesiteni Tōmasi S. Monisoni fekauʻaki mo hono mahuʻinga ʻo e fakahaofí. Naʻá ne toe lau foki e Fuakava Foʻoú fekauʻaki mo e kumi ʻe he Fakamoʻuí ʻa e sipi heé (vakai, Luke 15:6). Peá ne toki fehuʻi mai, “Te tau fakafoki fēfē mai leva kinautolu?”
Ne hiki nima hake ha niʻihi. Ne ʻi ai ha ngaahi fokotuʻu ʻa e kau mēmipa ʻo e kalasí ki he founga te nau lava fakauooti pe fakafoʻituitui ai ʻo ngāue fakataha ke tokoniʻi e kau toki ului maí ke nau foki mai ki he lotú. Pea toki fehuʻi mai leva ʻe he faiakó, “Kapau leva te ke fononga atu he halá ʻo ke fakatokangaʻi ha tangata ʻokú ke ʻilo ko e taha ia ʻo e kau toki ului mai ko ʻení, ʻoku ʻi he kauhala ʻe tahá, ko e hā e meʻa te ke faí?” Talaange ʻe ha mēmipa ʻe taha, “Te u kolosi ʻo fakafeʻiloaki ki ai. Te u fakahā ange ʻa e lahi ʻetau fie maʻu ke foki maí pea mo ʻetau loto fiefia ke ne toe kau fakataha mo kitautolú.”
Ne tui tatau mo ha niʻihi ʻo e kalasí mo nau fai ha ngaahi fokotuʻu mahino kehe fekauʻaki mo e founga ke tokoniʻi e kau mēmipa ko ʻení. Naʻe ʻi ai ha loto vēkeveke ʻi he lokí, mo ha loto ke fai e meʻa ʻoku fie maʻu ke fakahoko ke tokoniʻi ʻa e kāingalotu ko ʻeni ne toki papitaiso maí ke nau ʻilo honau hala foki mai ʻo mālohi kakató.
Ne u foki mo hoku uaifí mo ha holi foʻou ke fai ha meʻa ke tokoniʻi ha taha ke foki mai ʻo mālohi ʻi he Siasí. ʻOku ou tui ne foki ʻa e taha kotoa ʻi he kalasí mo e faʻahinga ongo pehē. Naʻá ku fehuʻi loto pē kiate au ʻi he ʻosi ʻo e meʻá ni: Ko e hā naʻá ne ʻai ʻa e kiʻi lēsoni nounoú ni ke mātuʻaki leleí? Ko e hā ne foki ai e taha kotoa mei he kalasí mo ha ongoʻi vēkeveke ke moʻui kakato ange ʻaki e ongoongoleleí?
ʻI heʻeku fakakaukau ki he ongo foʻi fehuʻí ni, naʻá ku fakatokangaʻi ai ha tefitoʻi moʻoni ʻe fā naʻá ne ʻai e kalasí ni ko ha akoʻanga lelei mo ha aʻusia fakafaiako leleí:
-
Ko e taumuʻá ko e ului.
-
Ko e ʻuhingá ko e ʻofa.
-
Ko e tokāteliné ʻa e kií.
-
Ko e Laumālié ʻa e faiakó.
Ko e Taumuʻá ko e Ului.
Naʻe ʻikai feinga e faiakó ni ke “huaʻi ʻa e fakamatalá ki he ʻatamai ʻo e kau mēmipa ʻo e kalasí,” ʻo hangē ko e fakatokanga ne fai mai ʻe Palesiteni Monisoni ke ʻoua naʻa tau faí, ka naʻe feinga ʻa e faiakó ni ia ke “ueʻi fakalaumālie ʻa e fakafoʻituituí ke nau fakakaukau, ongoʻi, pea mo fai ha meʻa fekauʻaki mo hono moʻui ʻaki e ngaahi tefitoʻi moʻoni ʻo e ongoongoleleí.”1
Ko hono moʻoní, ko e taumuʻa ʻa e faiakó ni ke tokoniʻi ʻa e kau mēmipa ʻo e kalasí ke nau fai ha meʻa naʻe ʻikai ke nau mei fakahoko kapau naʻe ʻikai ke nau omi ki he kalasí. Pea naʻe fakataumuʻa ʻa e ngāue ko iá ke tokoniʻi ʻa e fakafoʻituituí ke hoko ko ha ākonga moʻoni ʻo e Fakamoʻuí.
Ko e taumuʻa ʻo e faʻahinga faiako ko ʻení ke fakaului. ʻOku ʻuhinga ʻa e foʻi lea uluí ke tafoki ki ha huʻunga foʻou, ke puke ha faʻahinga ʻulungaanga foʻou. Ko e uluí—ʻa e hoko ko ha ākonga moʻoní—ʻoku ʻikai ko ha meʻa pē ʻoku hoko tuʻo taha ka ko ha meʻa ʻoku fai ʻi he moʻuí kotoa.2 Naʻe fakataumuʻa ʻa e ngāue ne fai ʻe he kau mēmipa ʻo e kalasí ke ʻoua naʻa ngata pē ʻi hono tokoniʻi ʻo e kau mēmipa ʻo e kalasí ka ke kau foki ai mo e kau toki ului mai te nau feinga ke fakamālohiá. Ko e taimi kotoa pē ʻoku tau moʻui kakato ange ʻaki ha tefitoʻi moʻoni ʻo e ongoongoleleí, ʻoku tāpuakiʻi ai ha taha ʻo fakahangatonu ai pe fakafou ʻi ha taha kehe. ʻI he ʻuhingá ni, ʻoku makehe ai hono ako ʻo e ongoongoleleí mo hono akoʻí. ʻOku fakatatau hono ako ʻo e ongoongoleleí ki he ului fakafoʻituituí kae ʻikai fakaiku pē ki he maʻu ʻo e ʻiló ʻataʻatā.
Ko e ʻUhingá ko e ʻOfá
Lolotonga ʻeku kau he kalasi ʻi Peluú, naʻe lava ke u ongoʻi ʻa e ʻofa ne maʻu ʻe he faiakó kiate kinautolu naʻe ʻi aí pea pehē ki he kau toki ului mai naʻá ne fakaafeʻi ʻa e kau mēmipa ʻo e kalasí ke nau fakamālohiá. Hangē ne fehokotaki e ʻofá he lokí—mei he faiakó ki he taha akó, mei he taha akó ki he faiakó, mei he taha akó ki ha taha kehe, pea mei he kau akó ki he kau toki ului foʻou maí.
ʻOku tokoniʻi ʻe he ʻofá ʻa kitautolu kau faiakó ke tau faiako hangē ko ia ne mei fakahoko ʻe he Fakamoʻuí kapau naʻe ʻi hotau loki ako. ʻIo, “ʻoku ueʻi kitautolu ‘e he ‘ofá ke tau teuteu mo faiako ‘i ha founga kehe.”3
Ko e taimi ʻoku taumuʻa ʻaki ai ʻe ha faiako ke ʻosi kakato e fakamatala he lēsoní, ʻoku tokanga leva ʻa e faiakó ia ki he kakanó ka ʻoku ʻikai ko e ngaahi fie maʻu ʻa e taha akó fakafoʻituitui. Hangē naʻe ʻikai ongoʻi ʻe he faiako Peluú ia ha fie maʻu ke ne fakamatalaʻi kakato ha meʻá. Naʻá ne fie maʻu pē ke ueʻi fakalaumālie ʻa e kau mēmipa ʻo e kalasí ke nau tokoni ki honau ngaahi tokouá mo e tuofāfiné ʻi he ʻofa. Ko e ivi mālohi aí ʻa e ʻofa ki he ʻEikí mo e feʻofaʻakí. Ko e ʻofá ʻa e ʻuhingá. Ko e taimi ʻoku hoko ai e ʻofá ko e ʻuhingá, ʻe fakaivia leva kitautolu ʻe he ʻEikí ke tau lavaʻi ʻEne ngaahi taumuʻá ke tokoniʻi ʻEne fānaú. Te ne ueʻi kitautolu ʻaki e meʻa ʻoku fie maʻu ʻe kitautolu kau faiakó ke leaʻakí mo e founga ʻoku totonu ke tau leaʻaki iá.
Ko e Tokāteliné ʻa e Kií
Naʻe ʻikai ke lau ʻa e faiako ʻi Peluú ia mei he tohi lēsoní ʻi heʻene faiakó. ʻOku ou tui pau naʻá ne fakaʻaongaʻi ʻa e tohi lēsoní pe ngaahi malanga konifelenisí ke teuteu ki he kalasí, ka ko e taimi naʻe faiako aí, naʻe faiako mei he folofolá. Naʻá ne fai e talanoa ʻo e sipi heé mo lau maʻuloto ʻa e veesi ko ʻení: “Pea ʻo ka ke ka [ului], ke ke tokoni ki ho kāingá” (Luke 22:32). Naʻá ne fakamatalaʻi e fakaafe ʻa Palesiteni Monisoni ki he kāingalotú kotoa ke nau fakahaofi kinautolu kuo hē mei he halá. Ko e ongo tokāteline ʻi he uho ʻo ʻene lēsoní ko e tuí mo e ʻofa faka-Kalaisí. Naʻe fie maʻu ʻe he kau mēmipa ʻo e kalasí ha tui feʻunga ke ngāue, pea ne nau fie maʻu ke ngāue tuʻunga he ʻofá.
Ko e taimi ʻoku akoʻi mahino mo fakamātoato ai ʻa e ngaahi tokāteline ʻo e ongoongolelei ʻo Sīsū Kalaisi kuo fakafoki maí, ʻoku fakaivia leva ʻe he ʻEikí ʻa e taha akó mo e faiakó fakatouʻosi. Ko e tokolahi ange ʻo e kau mēmipa ʻo e kalasí ne nau fai ha fokotuʻu ki hono tokoniʻi honau ngaahi tokoua mo e tuofāfine ne māmālohí, ko e ofi ange ia ki he Fakamoʻuí e loto ʻo e tokotaha kotoa, he naʻá Ne tokoni maʻu pē ki he kakaí lolotonga ʻEne ngāue fakafaifekau he māmaní. Ko e tokāteliné ko e kī ia ke ne fakahoko lelei hono ako mo akoʻi lelei e ongoongoleleí. ʻOkú ne fakaava ʻa e lotó. ʻOkú ne fakaava ʻa e ʻatamaí. ʻOkú ne fakaava ʻa e founga ke ueʻi pea mo fakamāmaʻi ai ʻe he Laumālie ʻo e ʻOtuá ʻa e taha kotoa ne ʻi ai.
Ko e Laumālié ʻa e Faiakó
ʻOku ʻilo ʻe he kau faiako maʻongoʻonga ʻo e ongoongoleleí ʻoku ʻikai ko kinautolu ʻa e kau faiakó. ʻOku akoʻi mo ako ʻa e ongoongoleleí ʻo fakafou ʻi he Laumālié. Ka ʻikai ʻa e Laumālié, he ʻikai iku hono akoʻi ʻo e ngaahi moʻoni ʻo e ongoongoleleí ke hoko ai ha ako (vakai, T&F 42:14). Ko e lahi ange hano fai ʻe he faiakó ha fakaafe fakalaumālie ke ngāué, ko e lahi ange ia ʻo e ʻi ai ʻa e Laumālié he lolotonga ʻo e lēsoní. Naʻe fai ʻe he faiako Peluú ha fakaafe fakalaumālie. Pea ʻi he kau mai ʻa e kau mēmipa ʻo e kalasí ʻaki e ngaahi fokotuʻú, naʻe tupulekina hono ongoʻi ʻo e Laumālié mo fakaivia ʻa e taha kotoa.
Naʻe ʻikai ke feinga ʻa e faiakó ke ʻosiki ʻa e lēsoní. Ka, naʻe feinga ke fakaʻatā ʻa e lēsoni naʻe ʻosi ʻi he loto pē ʻo e tokotaha akó. Naʻe tokoni ʻa e faiakó ki he kāingalotú ke nau ʻilo ʻenau holi ke ngāué—ke tokoni ki honau ngaahi tokouá mo e tuofāfiné ʻi he ʻofa, ʻaki ʻene fakaafeʻi e kau mēmipa ʻo e kalasí ʻi he mālohi ʻo e Laumālié. Pea ʻi he fevahevaheʻaki ʻe he kau mēmipa ʻo e kalasí ʻenau ngaahi fakakaukaú, ne nau felangahakeʻaki ai koeʻuhí he naʻa nau kaungā maʻu tokoni mei he Laumālié.
Ko e taimi ʻoku tau feinga ai ke moʻui ʻaki e ongoongoleleí ʻaki haʻatau tokoniʻi kinautolu ʻoku takatakaiʻi kitautolú, ʻe ueʻi leva ʻe he ʻEikí kitautolu ʻi he meʻa ʻoku totonu ke tau faí. Ko ia, kapau ʻoku fie maʻu ʻe kitautolu kau faiakó ʻa e Laumālié ke nofo lahi ange ʻi hotau loki akó, ko e meʻa pē ʻoku fie maʻú ke tau fakaafeʻi ʻa e kau mēmipa ʻo e kalasí ke nau moʻui kakato ange ʻaki ha tefitoʻi moʻoni ʻo e ongoongoleleí. Ko e taimi pē ʻoku tau tukupā ai ke moʻui kakato ʻaki ha tefitoʻi moʻoni ʻo e ongoongoleleí, ʻoku tau ʻunuʻunu ofi ange leva ki he ʻOtuá pea ʻunuʻunu ofi mai mo e ʻOtuá kiate kitautolu (vakai, T&F 88:63).
Ko e Ivi ʻo e Taha Akó Takitaha
ʻOku ʻikai ke tau ako mo akoʻi ʻa e ongoongoleleí ʻi he taumuʻa pē ke maʻu e ʻiló. ʻOku tau ako mo akoʻi ʻa e ongoongoleleí ke maʻu ʻa e hakeakiʻí. ʻOku ʻikai ʻuhinga ʻa e ako mo hono akoʻi ʻo e ongoongoleleí ke ʻilo kānokato ʻa e ngaahi moʻoní; ʻoku ʻuhinga ia ki he ʻiloʻi kānokato ʻo e tuʻunga fakaākongá. Tatau ai pē pe ko ʻetau akoʻi ʻetau fānaú ʻi hotau ʻapí pe kāingalotu ʻo e koló ʻi ha loki ako, ʻoku fie maʻu ke tau manatuʻi ko e lēsoni ʻoku tau akoʻí kuo ʻosi ʻi loto ia ʻi he taha akó. Ko hotau fatongia ko e mātuʻa pe kau faiakó ke tokoniʻi ʻa e kau akó ke nau ʻilo ʻa e lēsoní ʻi honau takitaha loto mo e ʻatamai.
Ko e taimi ʻoku tau ʻilo ai ʻa e ivi mahuʻinga ʻo e taha akó takitaha, ʻoku kamata leva ke tau sio hangē ko e ʻOtuá. Pea te tau lava leva ke leaʻaki ʻa e meʻa naʻá Ne mei folofola ʻakí mo fakahoko e meʻa naʻá Ne mei ʻai ke tau fakahokó. Pea ʻi heʻetau tulifua ʻi he hala ko ʻeni ʻo e akó mo e akoʻí, ʻoku hoko leva ʻa e uluí ko ʻetau taumuʻa, ko e ʻofá ʻetau ʻuhingá, ko e kií ʻa e tokāteliné, pea ko e Laumālié ʻa e faiakó. Pea ʻi heʻetau ako mo faiako ʻi he founga ko ʻení, ʻe tāpuakiʻi leva ʻe he ʻEikí ʻa e taha akó mo e faiakó fakatouʻosi “koeʻuhí ke fakamāmaʻi kotoa pē” (T&F 88:122).
TĀ FAKATĀTAAʻI ʻO E TAÁ ʻE Hyun-Gyu Lee; Vai Moʻuí, tā ʻe Simon Dewey
Tā fakatātaaʻi ʻo e ʻatá ʻe Craig Dimond mo Matthew Reier