ʻI he Taimi ʻOku ʻIkai Hoko Ai e Ngaahi Palani Leleí
ʻOku mahuʻinga ʻa e palani ki he kahaʻú, tautautefito ki hoʻomou kakai lalahi kei talavoú. Ka ko e hā ʻe hoko he taimi ʻoku ʻikai ngāue ai ʻa e ngaahi palani lelei taha kuo fokotuʻú?
Naʻe ʻikai ke lava ʻa Sungu Sungi ʻIuni ʻo Kōleá he sivi ke hoko ko ha faiakó. Ne mole ha ngāue ʻa Tina Loupa ʻo ʻIutā ʻi he USA, naʻe ʻamanaki ke ne fakaʻaongaʻi ko haʻane maʻuʻanga moʻui. Naʻe maʻu ʻe Toti Silenisikā ʻo ʻOhaiō ʻi he USA, ha fakamahino fakalaumālie ke mali ka naʻe fakangata ʻene fakamaʻú. Ne ngata e meʻa naʻe hangē kia ʻAlesia Masolali (ne fulihi ʻa e hingoá) ʻo ʻItalí, ko ha feʻofaʻaki haohaoá.
ʻOku hala ha taha ia ʻe saiʻia ke liliu ki he “palani fika 2.” Ka naʻa moe taimi ʻoku ʻikai hoko ai ʻetau ngaahi palaní, ʻoku ʻikai liʻekina ʻe he Tamai Hēvaní ʻEne fānaú. ʻOku lahi fau ha ngaahi founga lelei ke hoko ai ʻa e moʻuí. Te tau toki fakatokangaʻi he taimi ʻe niʻihi, naʻe hanga ʻe he ngaahi fakafeʻātungia ʻi hotau halá ʻo ʻomi ʻa e ʻilo pea mo e taukei ne tau fie maʻú (vakai, T&F 122:7) pea mo fakaiku ki ha meʻa ʻoku lelei ange.
Faʻu ‘o e Ngeiá, ‘Ikai ko e Fakamatala Tuʻuakí (Résumés)
Naʻe ngāue mālohi ʻa Sungi ʻIuni ke aʻusia ʻene fakaʻānaua ʻi heʻene moʻuí ke hoko ko ha faiakó. ʻOkú ne pehē, “Naʻá ku faʻa mei lava maʻu pē ke maʻu ʻa e meʻa naʻá ku fakaʻamu mo lotu ki aí, he naʻá ku feinga maʻu pē ke fai hoku lelei tahá ʻi he meʻa kotoa ʻoku ou faí. Ka naʻe ʻikai ke hoko ia ʻi he taimi naʻá ne fakahoko ai ʻa e sivi fakafaiakó. ʻOkú ne pehē, “Ko e taimi naʻá ku tō aí, naʻá ku ongoʻi kuo mole kotoa ʻeku ngaahi ʻamanakí ʻi he ʻaho pē ʻe taha.”
Naʻe ʻikai hohaʻa ʻa Tina ia he kamataʻangá, ʻi he taimi naʻe maʻu ai ʻe ha kautaha ʻe taha ʻa e kautaha naʻe ngāue ki aí. Naʻe palōmesi ange ʻe he kautaha foʻoú ha tuʻunga ʻe ngāue fuoloa ai, ko ia, ne hiki mai leva ke ofi ange ki he ngāué mo lahi ʻene ʻamanakí ki ha ngāue foʻou fakafiefia. Ka ko e taimi naʻe tukuange ai ia ʻe he kautahá ʻi ha ngaahi māhina siʻi ki mui atu aí, naʻá ne ongoʻi “tuēnoa, puputuʻu, loto mamahi, pea mo ilifia moʻoni.”
Naʻe fakatokangaʻi ʻe Sungi ʻIuni mo Tina te na toe lava pē ke tokanga ki hono fakaleleiʻi ʻo ʻena moʻuí kae ʻikai tokanga taha pē ki hono fakaleleiʻi ʻena ongo pepa tuʻuaki ʻena taukeí (résumés). Naʻe maʻu ʻe he ongo fefiné ni fakatouʻosi ha nonga ʻi hono ako ʻo e ongoongoleleí mo lotú.
ʻOku pehē ʻe Sungi ʻIuni, “Naʻe hoko ʻa e ʻAposetolo ko Paulá ko ha kaumeʻa lelei naʻá ne tokoniʻi au ke u faʻa kātaki mo hokohoko atu ʻi hono fakafepakiʻi ʻo e ngaahi faingataʻá. Naʻá ne maʻu pē ha loto ʻoku lelei mo loto kei fie tatali pē ki he meʻa kuo teu ʻe he ʻOtuá maʻaná, kae ʻikai ko hono loto ʻoʻoná.
“Naʻá ku ako ha meʻa mei heʻene sīpingá: ko e vahaʻa taimi ʻo e tatalí ʻoku ʻikai ko ha meʻa pē ia kuo pau ke tau foua ke maʻu e meʻa ʻoku tau fie maʻú. Ka, ko ha meʻa ia ʻoku tau aʻusia ai ʻa e tuʻunga ʻoku fie maʻu heʻetau Tamai Hēvaní ke tau aʻusia ʻi he ngaahi liliu ʻoku tau fakahokó.”
Naʻe toki ʻilo ʻe Tina ko e liliu naʻá ne fie maʻu tahá ko ha liliu ʻi heʻene fakakaukaú. ʻOku manatu ʻo pehē, “Naʻá ku ʻohovale ke toki ʻilo ta naʻá ku fakafuofuaʻi hoku mahuʻingá ʻi he ngaahi fakakaukau ʻo e mahuʻinga fakamāmaní. Naʻá ku ongoʻi mahuʻinga koeʻuhí ko ʻeku ngāué mo hoku tuʻungá, ʻa ē naʻe toʻó. Kuó u ʻilo ʻeni ko hoku mahuʻingá ʻoku ʻi he foʻi moʻoni taʻengata ko ha ʻofefine au ʻo ʻeku Tamai Hēvaní pea ʻoku ʻi ai haku tuʻunga fakalangi. He ʻikai ke teitei lava ʻo toʻo ʻa e ongo moʻoni ko ʻení.”
ʻOku fakatou fakahā ʻe Tina mo Sungi ʻoku ʻikai fakafiemālie maʻu pē e lolotonga hono fakaleleiʻi ʻo ʻete moʻuí, ka ko e fua ʻo e tupulaki fakafoʻituituí ʻoku fakafiefia. ʻOku pehē ʻe Sungi ʻIuni, “Naʻe ʻikai ngata pē hoko ʻa e taʻu hili ʻeku tō he sivi fakafaiakó ko e taʻu fakamamahi taha mo e vahaʻa taimi fakaloto foʻí, ka naʻe toe hoko foki ia ko e taimi mahuʻinga taha. Naʻe lava ke mahino moʻoni ange kiate au ʻa e ngaahi faingataʻaʻia ʻo e kakaí mou maʻu ha holi ke tokoniʻi kinautolu ʻi he loto fakamātoato moʻoni mo tokanga.”
Naʻe fakahaaʻi ʻe he sīpinga ʻo ʻAmoni mo hono ngaahi tokouá ʻi he Tohi ʻa Molomoná kia Tina hono siviʻi ʻe he ʻEikí ʻene tuí ke tokoniʻi ai ia ke ne aʻusia hono tuʻunga kakató. ʻOkú ne fakamatala ʻo pehē, “Ko e palani ʻa e ʻEikí ki he kakai Nīfaí ke fakahaofi honau ngaahi tokoua Leimaná kae ʻikai fakaʻaongaʻi ʻa e heletaá ki hono fakaleleiʻi ʻo e palopalemá. Naʻe tuku ki he ngaahi foha ʻo Mōsaiá ʻa e ngafa naʻe fie maʻu ai ha tui lahi ange, pea naʻe toe tuku foki kiate kinautolu ha talaʻofa kapau te nau kātekina honau ngaahi faingataʻá ʻi he faʻa kātaki, te nau maʻu ha ola (vakai, ʻAlamā 26:27). ʻOku hoko ʻa e faʻa kātakí ko hoku faingataʻaʻia lahi taha koeʻuhí he ʻoku ou loto ke mahino kiate au ʻeku palaní kakato—ka naʻá ku toki fakatokangaʻi ko e palani mo e taimi ʻa e Tamai Hēvaní kiate kitautolú ko ia ʻe hoko ko e lelei tahá.”
Ko Hono Tauhi ʻo e Ngaahi Fekaú Tatau ai Pē pe Ko e Hā
Ne hanga atu ʻa Toti ki ha kahaʻu lelei ʻi heʻene foki mai mei heʻene ngāue fakafaifekaú. Lolotonga ʻene akó, ne fetaulaki ai mo ha finemui lelei. Hili ha ngaahi māhina ʻo ʻena feohí mo e maʻu ha fakamahino fakalaumālie, ne kole mali leva ʻa Toti peá ne tali. Ne na palani leva ʻena malí ki he fakaʻosinga ʻo e faʻahitaʻu māfaná, peá na fakatou foki mei he akó ke teuteu.
ʻOku pehē ʻe Toti, “Hili ha uike ʻe tolu mei heʻena fepōpoaki māvae ʻaki ʻi he ʻapiakó, kuó ne fakangata ʻema fakamaʻú. ʻOku ʻikai ke lava ʻe he loto mamahí ia ʻo fakafōtunga feʻunga hoku lotó. Lahi ha ngaahi fehuʻi taʻemalava ke tali ʻi heʻeku fakakaukaú; taʻeʻuhinga. Ne u ʻosi maʻu ha fakamahino ʻi he fale ʻo e ʻEikí, ka ko ʻeni kuo ngata ʻema fetuʻutakí. Kuo teʻeki siviʻi fefeka peheni ʻeku fakamoʻoní.
ʻOkú ne hoko atu ʻo pehē, “Meʻapango ia, ne ʻosi ha ngaahi taʻu mei heʻema māvaé, ne teʻeki pē ke u lava ʻo tukuange. Naʻe ʻikai ke u ʻilo ʻe au pe te u toe lava ʻo falala ki ha ongo fakamahino mai. Naʻá ku falala maʻu pē ki he ʻEikí mo feinga hoku lelei tahá ke tauhi e ngaahi fekaú. Ne hangē kuo iku launoa e meʻa kotoa peé.”
Ne fakakaukau foki mo ʻAlesia naʻe tonu ke hoko ʻene feohi mo ha talavou. ʻOkú ne manatu ʻo pehē, “Ko homa talanoá naʻe mātuʻaki fakaʻofoʻofa, pea neongo naʻá ma foua e ngaahi faingataʻa angamaheni ʻoku foua ʻe he kau teu mali kotoa, ka ne ma fakakaukau he ʻikai teitei ngata ʻema feʻofaʻakí.”
Ko e taimi ne mavahe ai e tamasiʻi kaumeʻa ʻo ʻAlesiá ki heʻene ngāue fakafaifekaú, naʻe faingataʻa ʻa e māvaé ʻi ha ʻuhinga naʻe ʻikai ʻamanaki ki ai ʻa ʻAlesia. ʻOkú ne fakamatala ʻo pehē, “Lolotonga ʻene ʻalú, naʻe kamata ke u toki ʻiloʻi lelei ange au. Naʻá ku fakatokangaʻi ne ʻi ai ha ngaahi meʻa lahi ʻi heʻeku moʻuí naʻe ʻikai tonu pea ʻi ha taimi lahi naʻá ku unga ai ʻi ha ngaahi fakakaukau taʻefakapotopoto kae ʻikai ke u loto fakatōkilalo ʻo fehangahangai mo e moʻoní. Naʻá ku moʻui ʻi ha faʻahinga fananga, ʻo hangē tokua ʻoku feʻunga pē ʻa e feʻofaʻakí ke ne ʻai ke hoko ʻa e meʻa kotoa peé, pea faʻa ʻai ai ʻe he meʻá ni au ke u taʻetokanga ki he ngaahi meʻa ʻoku mahuʻinga tahá.”
Ka ne kei ʻamanaki pē ʻa ʻAlesia ki ha toe fakataha fiefia mo hoko atu ʻa e feohí ʻi he ʻosi e ngāue fakafaifekau hono kaumeʻá. Neongo ia, ʻi heʻene foki maí, naʻe taimi nounou pē e feohi ʻa e ongo meʻá ni peá na māvae. ʻOku pehē ʻa ʻAlesia, “Ko e taha ia ʻo e ngaahi momeniti fakamamahi taha ʻoku ou lava ke manatuʻi.”
Fakatatau mo ʻena takitaha taukeí, naʻe aʻu ʻo fakatou fakatokangaʻi ʻe Toti mo ʻAlesia neongo ne liliu ha feohi mahuʻinga ʻi heʻena moʻuí, he ʻikai ke na lava ʻo liʻaki ʻena talangofua pea mo ʻena fakaʻapaʻapa ki he ʻEikí. Naʻá Ne hoko ko hona makatuʻu ʻi he taimi naʻe feliliuaki mo taʻepau ai ʻa e meʻa kotoa pē.
ʻOku pehē ʻe Toti, “Naʻe ʻikai ke u ʻiloʻi pe ko e hā ne u maʻu ai ha fakamahino ke u mali mo ha tahá pea naʻe ʻikai ke hokó. Ka kuó u fakatokangaʻi naʻe ʻikai haʻane mahuʻinga. Ko e meʻa naʻe mahuʻingá ko ʻeku kei maʻu ʻa e tui kia Kalaisí, pea naʻe pau ke u fakaʻaongaʻi ʻa e tui ko iá ke falala ki ha meʻa pē kuo teuteu ʻe he ʻEikí maʻaku.”
Naʻe ʻilo ʻe ʻAlesia ʻe ʻomi ʻe he tukupā kakato ia ki he ʻEikí ʻa e ivi naʻá ne fie maʻú. ʻOkú ne pehē, “Naʻe mahino kiate au kuo hoko ʻa e momeniti ke u fili ai pe ko e hā ʻa e faʻahinga fefine ʻoku ou fie aʻusiá. Te u kei moʻui fakakonga ai pē, pe te u kamata ʻi ha hala ke hoko ko ha ākonga moʻoni ʻo Kalaisi? Naʻá ku fie maʻu ke ʻiloʻi moʻoni Ia, ʻofa moʻoni ʻiate Ia, mo feinga ke hoko ko ha taha lelei ange ʻaki haʻaku talangofua ki Heʻene ngaahi fekaú kotoa—ʻo ʻikai fakamamata pē ki tuʻa ka ʻi hoku lotó ʻi he fakamoʻomoʻoni.”
Ko Hono Fakatupulaki ha Falala ki he Kahaʻú mo ha Tui kia Kalaisi
Naʻe fāifeinga ʻa e kakai lalahi kei talavoú ni kotoa ʻe toko fā ke maʻu ha lototoʻa ke moʻui ʻi he lolotongá pea mo palani ki he kahaʻú, hili ʻenau fehangahangai mo e ngaahi meʻa fakaholomui taʻeʻamanekiná. Ka ne nau fakatokangaʻi naʻe tupulaki ʻenau tui ki he ʻEikí.
ʻOku manatuʻi ʻe Sungi ʻIuni naʻe hili e tō ʻene siví, naʻe faingataʻa haʻane feinga ke fai ha ngaahi meʻa foʻou. Ka naʻe hoko mai ha ʻilo foʻou mahuʻinga: “Naʻá ku fakatokangaʻi ko e tō moʻoní ko haʻate kei nofo ai pē he kuo hilí ʻo ʻikai fai ha kiʻi feinga ke ngāueʻí. Ne u pehē ai he ʻikai ke u kei loto mamahi ai pē, ka te u liliu ʻa e taimi faingataʻa ko ʻení ko ha faingamālie ke ako. Naʻe lahi mo loloto ange ʻa e malava ke mahino kiate au ʻa e moʻuí, pea ne u fakatokangaʻi ʻoku ʻomai maʻu pē ʻe ha ngataʻanga ʻo ha meʻa ha kamataʻanga ʻo ha meʻa ʻe taha.” Kuó ne ʻosi toe fakahoko mo lavaʻi ʻa e siví pea kuó ne hoko he taimí ni “ko ha faiako fiefia ʻoku manako ke ngāue mo e fānau akó he ʻaho kotoa pē.”
Naʻe fili ʻa Tina ke tui ʻoku ʻi ai ha meʻa ʻoku tatali mei muʻa, neongo naʻe faingataʻa ke fehangahangai mo ha kahaʻu taʻeʻiloa. ʻOkú ne fakamatala ʻo pehē, “Naʻá ku pehē ke u toe hū ki he akó, pea naʻá ku ako ai ʻi he malaʻe ʻo e ʻātí mo e tekinolosiá, ko ha tafaʻaki naʻá ku fakaʻamu ke u kau ai ka naʻe ʻikai ke u maʻu ʻa e ngaahi poto naʻe fie maʻú. Kuó u mateuteu ke toe kamata ha fononga ʻe taha, ha taha ʻoku toe lelei ange, kae fakamālō pē ki he poto ʻo ʻeku Tamai Hēvaní.”
Naʻe hoko atu ʻa Toti ʻo feinga ke teiti ʻi ha taʻu nai ʻe ono mo feinga ke fakatupulaki ha falala ki he ʻEikí. Aʻu ai pē ki heʻene fetaulaki mo e kakai fefine naʻe manako lahi aí, naʻe pau ke ne feinga ke taʻofi ʻene ngaahi veiveiua mei he kuo hilí ke ʻoua te nau maumauʻi ʻene ʻamanaki lelei ki he kahaʻú. ʻOkú ne pehē, “Naʻe ʻikai faingofua ʻa e feinga ke maʻu ha loto lahi ke ʻoua ʻe tukulolo ki heʻeku ngaahi veiveiua he taʻu ʻe ono kuo hilí. Ka naʻá ku toʻa ʻi heʻeku feinga ke fakamoʻoniʻi kiate au naʻá ku falala moʻoni ki he ʻEikí pea mo ʻEne ngaahi ueʻí, neongo naʻá ku ʻita ai ki muʻa.” Ne ʻi ai ha feohi foʻou ne fakaiku ki ha mali temipale.
ʻOku pehē ʻe Toti, “ʻOku ou faʻa fifili pe ko e hā ne tāpuakiʻi ai au ʻe he ʻEikí ʻaki ha taha lelei pehē hangē ko hoku uaifí ʻi he taimi naʻá ku fāifeinga taimi lōloa ai ke falala kakato ki he ngaahi ongo ʻo e Laumālié. Ko ha fakamoʻoni ia kiate au ʻoku tatali ʻa e ʻEikí ke tāpuakiʻi kitautolu, kae fakatatau maʻu pē mo ʻene taimi tēpilé.”
ʻI hono toe fakatapui ʻe ʻAlesia ia ki he ʻEikí, naʻá ne fakatupulaki ai ha fakamoʻoni mālohi mo fakafoʻituitui. “Naʻe hoko ʻo moʻoni kiate au ʻa e palani ʻo e fakamoʻuí, pea fakaʻau ʻo mālohi ange kiate au ʻeku ngaahi fuakavá pea mo loloto. Naʻe ʻikai ke kei hoko ʻe Fakalelei ʻa Kalaisí ko ha fakakaukau pe faʻahinga meʻa ne u lau ai, mahalo ʻo ʻikai fuʻu hā moʻoni. Ne hoko ha fuʻu liliu lahi ʻo e lotó ʻi loto, pea ne u maʻu ha fakamoʻoni pau.” ʻOkú ne pehē he ʻahó ni, ʻokú ne ongoʻi hangē ha taha foʻoú.
Tatau ai pē pe ko e hā ʻa e huʻunga ʻo e fononga ʻo e moʻuí, ko e taumuʻa folau fakaʻosi ʻo e moʻui taʻengatá ko e meʻa ia ʻoku palani ʻe he Tamai Hēvaní maʻa ʻEne fānaú (vakai, Mōsese 1:39). ʻE ʻi ai siʻa niʻihi te nau toki ʻilo ta ko e “palani fika 2” ko ha founga pē ia hono ʻai ʻEne “palani Fika 1” ke hokó.
Tā fakatātaaʻi ʻe Neil Webb