Pagdala sa Primary ngadto sa Panimalay

Si Jesukristo Mao ang Anak sa Dios

Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.

Paghunahuna nga nagbiyahe latas sa disyerto. Ang biyahe dugay, untol-untol ang inyong pagsakay sa camel, ug wala gani mo magsunod og mapa! Hinoon, nagsunod kamo og usa ka bitoon. Unsa ang inyong bation? Kamo ba adunay hugot nga pagtuo sa pagpadayon?

Duha ka libo ka tuig na ang milabay, mao kanay gibuhat sa mga Mago. Nakakita sila sa hayag nga bitoon sa silangan ug mibiyahe padulong sa Bethlehem aron sa pagpasidungog sa bata nga si Kristo uban sa maanindot nga mga gasa. Ug dili lang ang mga Mago ang nagtan-aw sa bitoon. Tabok sa kadagatan, sa kontinente sa Amerika, ang mga Nephite nakakita sa bitoon ug nasayud nga si Jesukristo, ang Anak sa Dios, natawo.

Karon, ang paghunahuna niana nga bitoon nagpahinumdom nato sa Manluluwas. Mihayag kini sa kangitngit ug nagpakita sa mga Mago sa agianan, sama nga si Jesus nagpakita nato unsaon sa pagpuyo. Ang bitoon makanunayon, sama sa gugma sa Manluluwas alang nato. Sa sunod higayon nga kamo motan-aw sa mga bitoon, hinumdumi nga si Jesukristo mao ang Anak sa Dios ug ang Kahayag sa Kalibutan!

Kanta ug Kasulatan

• “The Nativity Song,” Children’s Songbook, 52–53 [“Awit sa Pagkatawo,” Songbook sa mga Bata].

• Doktrina ug mga Pakigsaad 11:28

Kalihokan sa CTR: Mga Simbolo sa Manluluwas

Si Jesukristo mitandi sa Iyang Kaugalingon ngadto sa daghang mga butang. Pinaagi sa pagtuon niini nga mga pagkumpara, makat-on kita og dugang mahitungod Kaniya. Basaha kini nga mga kasulatan isip usa ka pamilya ug hisguti unsa ang ikasulti niini nga mga simbolo mahitungod sa Manluluwas.

Magbalantay (tan-awa sa Salmo 23:1)

Kordero (tan-awa sa Juan 1:29)

Tubig (tan-awa sa Juan 4:14)

Tinapay (tan-awa sa Juan 6:51)

Bato (tan-awa sa 2 Nephi 8:1)

Kamo Lang

Paghimo og dayandayan sa Pasko aron makahinumdom sa unsa nga paagi mipanalangin ang Manluluwas sa inyong kinabuhi. Paggunting og mga bitoon ug ipapilit sa baga nga papel. Sa luyo sa dayan-dayan, pagpapilit og litrato sa inyong kaugalingon o sa inyong pamilya ug pagsulat unsay inyong gustong buhaton sa pagsunod ni Jesukristo, ang Kahayag sa Kalibutan. Guntinga ang mga lungag sa ibabaw ug butangi og lambo ang mga lungag aron mahuman ang mga dayan-dayan.

Sa wala: mga paghulagway pinaagi ni Adam Koford; tuo: mga paghulagway ni Thomas S. Child, iStockphoto.com, and iStockphoto.com/Adyna