Nagdungan Pagdako isip mga Deacon

Bisan og lahi kaayo ang ilang hitsura, kining duha ka batan-ong mga lalaki adunay daghang kapareha sa usag usa.

Gilitratohan ni Mindy Raye Friedman

Si Tyler W. unom ka pye (1.8 m) ang gitas-on, dunay pula nga buhok, ug nagsul-ob og 13 nga gidak-on nga sapatos. Si Gerrit V. upat ka pye ug walo ka pulgada (1.4 m) ang gitas-on, dunay brown nga buhok, ug nagsul-ob og 2 1/2 nga gidak-on sa sapatos. Apan bisan og sila lahi sa pisikal, ang ilang mga pamilya mitawag nila og “kaluha” tungod kay suod sila nga mga higala ug adunay daghan nga pareha sa usag usa.

Si Gerrit ug Tyler 12 anyos ug kauban sa samang korum sa mga deacon. Sila ganahan nga magdula og sport, maggahin og panahon sa ilang mga pamilya, ug magkat-on og bag-ong mga butang. Sila usab adunay mga pagpamatuod sa ebanghelyo ug naningkamot sa pagtahud sa Aaronic Priesthood. “Kinahanglan kitang motuman sa atong mga katungdanan sa priesthood aron nga kita makat-on,” miingon si Gerrit.

Silang duha ganahan nga motuman niadtong mga katungdanan sa pagpaambit sa sakrament ug sa pagkolekta sa mga halad sa puasa.

Motabang usab sila sa pag-fellowship sa ubang mga deacon sa ilang ward pinaagi sa pag-imbitar nila nga moduol ngadto ni Kristo. “Kon dunay wala diha, usa namo ang mosulat ngadto niya mosulti sa tanang mga butang nga among nakat-unan sa simbahan. Dayon among ihatag kini ngadto niya, mag-ingon, ‘Palihug simba,’” miingon si Gerrit.

Si Gerrit ug Tyler nagtuman usab sa Katungdanan ngadto sa Dios. Matag usa nila nagplano nga mobasa pa og dugang sa mga kasulatan. Makatabang gayud kini sa inyong pagtuo ug makapalig-on sa inyong pagpamatuod,” miingon si Tyler.

Kini nga mga batan-ong lalaki mga deacon sama ninyo o sa uban nga inyong nailhan. Adunay mga butang nga makapahimo nila nga lahi ug mga butang nga makapahimo nila nga pareha. Apan ang labing importante, sila mga anak sa Dios ug gustong moserbisyo Kaniya, nagkahiusa diha sa ilang korum sa priesthood.