Ang Ebanghelyo ni Jesukristo Gipahiuli pinaagi ni Propeta Joseph Smith

Human sa Paglansang sa Krus sa Manluluwas ug sa kamatayon sa Iyang mga Apostoles, giusab sa mga tawo ang pipila sa mga doktrina ug mga ordinansa sa ebanghelyo. Bisan tuod daghang mga tawo ang mituo ni Jesukristo ug naningkamot sa pagsabut ug pagtudlo sa Iyang ebanghelyo, ang kahingpitan sa kamatuoran nawala na. Ang resulta mao ang nagkadaiyang ang-ang sa apostasiya sa nahabiling mga Kristiyano. Aduna man silay daghang mga kamatuoran, apan wala kanila ang hingpit nga mga doktrina, mga ordinansa, o priesthood ni Kristo.

Ang atong Langitnong Amahan nahibalo nga kining hinay-hinay nga pagkawala sa kamatuoran mahitabo, busa Iyang gipreserbar ang kahingpitan sa ebanghelyo ni Jesukristo sa karaang volume sa mga kasulatan nga ikatandi sa Biblia. Sa sayong mga 1800, ang langitnong mensahero nga si Moroni migiya ni Joseph Smith kon asa kining balaang kasulatan gitagoan sulod sa mga siglo. Gisulat sa bulawang mga palid, kini nga rekord naglangkob sa mga sinulat sa mga propeta nga naghisgut sa pakigsandurot sa Dios ngadto sa pipila ka karaang mga lumulupyo sa Amerika. Gihubad ni Propeta Joseph Smith ang mga sinulat niining mga palid pinaagi sa gasa ug gahum sa Dios. Kini nga rekord mao ang Basahon ni Mormon: Lain nga Tugon ni Jesukristo.

Ang proseso sa paghubad sa Basahon ni Mormon nakahatag ni Joseph Smith sa edukasyon sa mga doktrina sa Dios—ang Espiritu mao ang iyang magtutudlo, ug ang Basahon ni Mormon mao ang iyang teksto. Sa dihang si Joseph Smith may pangutana, siya nag-ampo ngadto sa Dios ug gipadayag sa Dios ang tubag ngadto kaniya. Kini nga proseso nagtudlo ni Joseph Smith, ang batan-ong lalaki nga walay kinaadman, sa mahinungdanong mga kamatuoran nga importante sa iyang call isip Propeta sa Pagpahiuli.

Si Propeta Joseph Smith Nagpamatuod

“Ako sa tinuod nakakita og usa ka kahayag, ug sa taliwala niana nga kahayag ako nakakita sa duha ka mga Personahe, ug sila sa kamatuoran namulong ngari kanako; ug bisan pa ako gikasilagan ug gigukod sa pag-ingon nga ako nakakita og usa ka panan-awon, apan kini tinuod; … Ako nasayud niini, ug ako nasayud nga ang Dios nasayud niini, ug ako dili makalimud niini, ni ako mangahas sa pagbuhat niini.”¹
“Pinaagi sa gahum sa Dios akong gihubad ang Basahon ni Mormon gikan sa sinulat sa karaang Ehipto [hieroglyphics], ang kahibalo nga nawala sa kalibutan, diin ang talagsaong hitabo nagbarug akong nag-inusara, usa ka batan-on nga walay kinaadman, sa pagpakig-away sa kaalam sa kalibutan ug gidugang sa pagkaignorante sa ikanapulog walo nga siglo, uban sa bag-ong pagpadayag.”²
“Ako misulti sa mga kaigsoonan nga ang Basahon ni Mormon mao ang labing tukma sa bisan hain nga basahon dinhi sa yuta, ug ang sukaranan sa atong tinuohan, ug ang tawo labi pa nga maduol sa Dios pinaagi sa pagsunod sa iyang mga lagda, kay sa bisan hain nga basahon.”³
“Ako … naghupot sa mga yawe sa katapusan nga gingharian, diin ang dispensasyon sa kahingpitan sa panahon gipamulong sa mga ba-ba sa tanan nga mga balaang Propeta sukad sa sinugdanan sa kalibutan, ubos sa gahum sa Melchizedek Priesthood sa pagbugkos.”⁴ (Tan-awa sa D&P 27:12–13.)
“Ang Simbahan ni Jesukristo sa mga Santos sa Ulahing mga Adlaw natukod pinaagi sa laktud nga pagpadayag, isip tinuod nga Simbahan sa Dios sukad pa kaniadto, … ug pinaagi sa kabubut-on ug mga panalangin sa Dios, ako nahimong instrumento diha sa Iyang mga kamot, hangtud karon, sa pagpalambo sa katuyoan sa Zion.”⁵
“[Ang Basahon ni Mormon] nagsaysay kanato nga ang atong Manluluwas mihimo sa Iyang pagpakita dinhi niining dako nga yuta [ang Amerika] human sa Iyang pagkabanhaw; nga Iyang gitanom ang Ebanghelyo dinhi sa iyang tibuok kahingpitan, ug kabuhong, ug gahum, ug panalangin.”⁶

Samtang nagtuo kita nga si Joseph Smith mao ang propeta sa Dios, kita nagsimba sa atong Langitnong Amahan ug sa Iyang Anak, si Jesukristo.

Gikan sa wala: Pagdayeg sa Tawo, ni Jon McNaughton; Unang Panan-awon ni Joseph Smith, ni Greg Olsen, dili mahimong pakopyahan; Si Joseph Smith Naghubad sa Basahon ni Mormon, ni Del Parson © 1996; Propeta sa Ginoo, ni David Lindsley, Dili Mahimong Pakopyahan; detalye gikan sa Ang Pagpahiuli sa Melchizedek Priesthood, ni Liz Lemon Swindle, dili mahimong pakopyahan; Ang Simbahan ni Kristo Giorganisar, 1830, ni Joseph Brickey, dili mahimong pakopyahan; Tan-awa, ang Inyong Gagmay nga mga Bata, ni David Lindsley © 1983