Ang Kinabuhi ni Presidente Monson Gisaulog uban sa Gabii sa Kanta, Musika, Pasidungog
Sa usa ka dako nga selebrasyon ug pasidungog sa ika-85 nga adlawng natawhan ni Presidente Thomas S. Monson, mga 20,000 ka mga tawo ang mipuno sa Conference Center niadtong Agosto 17, 2012, alang sa usa ka gabii sa musika, pagsaysay, ug pasidungog sa usa ka programa nga giulohan og “Bulawanong mga Adlaw: Usa ka Selebrasyon sa Kinabuhi.”
Ang mga seleksyon naglakip sa musika ug mga mensahe sa pipila ka paborito nga Broadway nga mga pasundayag ug ubang makapadasig nga mga kanta sa pagsaulog sa ika-85 nga adlawng natawhan, sa adlaw nga 21 sa Agosto.
Si Presidente Monson naglingkod sa unang laray diha sa mga tumatan-aw uban sa iyang asawa, nga si Frances Johnson Monson, ug mga sakop sa ilang pamilya.
Si Presidente Henry B. Eyring, Unang Magtatambag sa Unang Kapangulohan, misaysay sa pagkasaksi sa usa ka pasidungog ngadto ni Presidente Monson “sa usa ka dalan sa mga desierto sa Arizona” diin mihunong si Presidente Monson aron sa pagpakiglamano sa usa ka magtiayon ug sa ilang gagmay nga mga anak, apan misangpot hinoon sa pagtibaya sa daghan pa nga miabut.
Miingon si Presidente Eyring nga siya nakasaksi ni Presidente Monson nga “nagrepresentar sa Ginoo ngadto sa mga tawo,” sa kasagaran naglakip sa mga bata, sa tibuok kalibutan. “Dili lang kadtong iyang gitimbaya ang nahatagan og bulawanong kahigayunan, apan kami usab nga nakakita niini nga nahitabo,” miingon siya. “Dili na ako pareha, ni si bisan kinsa nga mga partisipante, tungod kay nakabati niana nga gugma, nausab kami.”
Si Presidente Dieter F. Uchtdorf, Ikaduhang Magtatambag sa Unang kapangulohan, mipahalipay usab ni Presidente Monson “sa kinabuhi nga puno sa bulawanong mga adlaw. … Presidente Monson, ikaw usa ka higala nga nagdala og kahayag ngadto sa kangitngit, ug ikaw ang propeta sa Dios sa atong panahon. Gimahal ka namo ug mopaluyo nimo. Mag-ampo mi alang nimo,” siya miingon.
Daghang ubang mga lider sa Simbahan, mga relihiyon, ug sibiko, ingon man usab sa dugay nang mga amigo, mipadala sa pasidungog ngadto ni Presidente Monson pinaagi sa girekord nang daan nga mga video. Giila usab siya alang sa iyang mga tuig sa pag-apil sa Scouting.
Sa panahon sa pagtapos sa programa si Presidente Monson misulti sa mga pulong sa tagsulat ug magbabalak nga Scottish nga si James Barrie, kinsa misulat, “Ang Dios mihatag nato og handumanan, aron kita adunay mga rosas sa Hunyo sa Disyembre sa atong mga kinabuhi” (tan-awa sa Laurence J. Peter, comp., Peter’s Quotations: Ideas for Our Time (1977), 335).
“Karong gabhiona akong nadawat ang daghang handumanan,” miingon si Presidente Monson.
Hapit makuha ang tanang importante nga detalye, ang Conference Center giadornohan og gatusan nga yellow nga mga rosas, simbolo sa “bulawanong” mga adlaw sa iyang kinabuhi.
“Bulawanong mga Adlaw: Usa ka Kasaulogan sa Kinabuhi” mipakita sa namingawan nga kinabuhi ni Presidente Monson—sa iyang pagkabata, kaminyoon, pagserbisyo sa militar, ug pagserbisyo sa Simbahan—pinaagi sa musika ug kanta.
Gilitratohan ni Debra Gehris