“Unsaon nako sa pagtubag sa mga pangutana sa akong mga higala kabahin sa templo kon ako mismo wala kaayo masayud niini?”

Lisud ang paghisgot og butang nga wala nimo masabti, ug adunay daghan nga dili nato masabtan mahitungod sa templo hangtud nga kita mismo makasulod didto. Sa gawas sa templo magbantay kita unsaon sa paghisgot ang mga ordinansa sa templo tungod kay sagrado kini. Hinoon, makahisgot gihapon kita sa mga panalangin ug mga katuyoan sa templo. Makasulti kita sa atong mga higala nga sa templo, ang mga miyembro makat-on sa mahangturong mga kamatuoran, makadawat og sagrado nga mga ordinansa alang sa ilang mga kaugalingon, ug makapahigayon niini nga mga ordinansa alang sa ilang mga katigulangan ug sa uban nga patay na.

Kon mas daghan ang imong nahibaloan mahitungod sa mga templo, mas andam ka sa pagtubag sa mga pangutana sa imong mga higala. Aron makat-on og mas daghan, pakigsulti sa imong mga ginikanan o mga lider sa Simbahan. Ikaw ug ang imong mga higala makabasa usab sa espesyal nga isyu sa Liahona bahin sa mga templo (Oktubre 2010) ug makakita og mga tubag sa Mormon.org ubos sa “Temples” sa Frequently Asked Questions [Mga Pangutana nga Kanunayng Gipangutana].

Mahimo usab nimong ipaambit unsay imong gibati mahitungod sa templo. Kon nakaadto ka sa templo aron paghimo og mga bunyag o nakaanha sa nataran sa templo, makasulti ka sa imong mga higala mahitungod sa kalinaw nga imong gibati samtang didto ka.

Kon ang imong mga higala mangutana ngano nga ang templo dili bukas alang sa tanan, makapasabut ka nga tungod sa sagrado nga buhat nga gihimo diha sa templo, kadto lamang kinsa andam sa espirituhanon ug adunay balido nga rekomend sa templo ang makasulod. Sa dili pa ipahinungod ang bag-ong mga templo, ang open house maoy higayon sa mga tawo sa komunidad sa pag-tour sa templo ug magkat-on og dugang mahitungod niini. Human mapahinungod ang templo, si bisan kinsa ang maka-tour sa mga nataran. Kon posible, imbitara ang imong higala ngadto sa open house sa templo o sa pagbisita sa mga nataran sa templo uban nimo.

Pagpakatakus sa Templo

Akong sultihan ang akong mga higala unsa ang templo alang nako: kalipay, kalig-on, sakripisyo, ug mahangturong mga pamilya. Akong ipasabut unsaon nga magpabiling takus. Kon makakita sila nga ako nagpakabuhi nga ang templo mao ang usa sa akong labing importante nga mga tumong, ilang bation ang gahum sa templo. Ang tanan makakita sa kaanindot sa templo sa gawas, apan pinaagi sa pagpakabuhi sa matarung nga paagi, akong ikapakita sa akong mga higala ang paglaum ug kalipay nga ikahatag sa pagsulod sa templo.

Emma R., edad 18, Utah, USA

Pangimbitar sa Imong mga Higala sa Pagkat-on Pa

Sultihi ang imong mga higala sa tanan nimong nahibaloan—basta lang tarong lang kini. Sultihi sila nga dili kita maghisgot og pipila ka mga butang mahitungod sa templo tungod kay sagrado kini. Kon sila mangutana og butang nga wala ka kahibalo, sultihi sila sa tinuod nga wala ka kahibalo. Ug kon sila gusto pang makahibalo, imbitara sila ngadto sa simbahan ug sultihi sila nga ang Dios mopanalangin niadtong kinsa motuman sa Iyang mga sugo og dugang nga espirituhanong kahibalo. Nagtuo kita sa pagkat-on og espirituhanong mga butang pagtulun-an human sa usa ka pagtulun-an, ladga human sa usa ka lagda.

Carmela B., edad 18, Pilipinas

Pag-ampo alang sa Espiritu nga Mohunghong Nimo sa Tubag

Sa pagtubag sa mga pangutana sa akong higala, nag-ampo una ko sa Langitnong amahan kon unsay akong isulti. Nagkinahanglan ni og pasensya, apan bililhon kaayo sa paghulat sa Espiritu nga mohunghong unsay isulti. Ikaduha, adto sa simbahan ug sa bunyaganan sa templo aron makadawat og dugang espirituhanong kahibalo. Sa dihang ang akong higala nangutana mahitungod sa templo, giingnan nako siya nga ang mga bunyag pagahimoon alang sa atong namatay nga mga katigulangan nga walay kahigayunan nga mahimong kabahin sa ebanghelyo samtang buhi pa sila. Dayon didto sa langit sila makapili sa pagdawat o pagsalikway sa ordinansa.

Lydia P., edad 13, Florida, USA

Pangimbitar sa Imong mga Higala sa Pagpakigkita sa mga Misyonaryo.

Kon ang mga higala mangutana nako mahitungod sa templo, ako moingon nga kini balay sa Ginoo, diin makapahigayon kita og espesyal nga mga ordinansa nga makapaduol nato ngadto sa atong Langitnong Amahan ug naghimong posible nga kita makabalik ngadto Kaniya. Akong gipangutana usab ang akong mga higala kon gusto ba sila nga makigkita sa mga misyonaryo aron makat-on og dugang. Kon moingon sila og dili, akong isulat ang ilang mga pangutana ug ako ang mangutana mismo sa mga misyonaryo. Dayon akong pahibaloon ang akong mga higala unsay akong mahibaloan. Niining paagiha makakat-on pa usab ako og dugang mahitungod sa templo.

Kimmie H., edad 13, Montana, USA

Pagpakita og mga Litrato sa mga Templo

Ganahan ko nga mobasa og mga libro nga nagpakita sa mga templo sa tibuok kalibutan. Sa dihang gipangutana ko sa usa ka higala mahitungod sa mga templo, nasayud ko nga ang akong pagpasabut dili igo sa pagtabang niya nga makasabut. Mao nga akong gidala ang akong mga libro sa mga templo ug gipakita kaniya unsa ang templo, ang katuyoan sa templo, ug unsa kita ka mapasalamaton sa pagbisita sa templo. Nakahukom ko sa pag-imbitar niya sa pagsimba sa Dominggo, diin ang mga misyonaryo ug ang mga magtutudlo sa Sunday School makatabang niya sa pagkat-on og dugang.

Jessica A., edad 18, Indonesia

Pakigsulti sa Imong mga Ginikanan

Pagpangita og mga tubag. Pagbasa sa mga kasulatan ug pangutana sa mga magtutudlo sa Sunday School. Ang mga pangutana matubag kanunay; ang buhaton lang nimo mao ang pagpangita. Pag-ampo kabahin niini! Kon ako adunay mga pangutana mahitungod sa templo, mangutana ko sa akong mga ginikanan. Sayon sila nga pakigsultihan ug andam nga motabang.

Bryson B., edad 18, Utah, USA

Adto sa Templo

Kon maningkamot kita sa pag-adto sa templo kanunay kutob sa mahimo, mas makakonektar kita sa atong Langitnong Amahan. Nagpasabut kana nga kita makaampo ngadto Kaniya mahitungod sa mga pangutana sa atong mga higala. Kon kita wala kaayoy nahibaloan sa templo, nagpasabut kana nga kinahanglan kitang magtuon pa. Kada higayon sa dili pa moadto sa templo, pagtuon ug pag-ampo mahitungod kon unsay imong hunahunaon samtang anaa sa templo. Dayon makatubag kita sa mga pangutana sama sa “Unsay imong gibati didto sa templo?”

Sara T., edad 14, Idaho, USA