Mensahe sa Visiting Teaching
Visiting Teaching, usa ka Buhat sa Kaluwasan
Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.
Hugot nga Pagtuo, Pamilya, Kahupayan
Ang visiting teaching naghatag sa kababayen-an og oportunidad sa pag-amuma, paglig-on, ug pagtudlo sa usag-usa—kini sa tinuoray usa ka buhat sa kaluwasan. Pinaagi sa visiting teaching, ang mga sister mangalagad alang sa Manluluwas ug sa pagtabang sa pag-andam sa mga babaye sa mga panalangin sa kinabuhing dayon.
“Kinahanglan kita nga ‘magpasidaan, magpatin-aw, mag-awhag, ug magtudlo, ug magdapit [sa uban] sa pagduol ngadto kang Kristo’ (D&P 20:59), sumala sa giingon sa Ginoo sa Iyang pagpadayag,” miingon si Presidente Spencer W. Kimball (1895–1985). Gidugangan niya, “Ang inyong pagpamatuod usa ka maayo kaayo nga pamaagi.”1
Kon kita isip mga visiting teacher mopalambo sa atong kahibalo sa mga kamatuoran sa ebanghelyo, ang atong pagpamatuod molig-on ug mosuporta sa mga sister kinsa nangandam nga mabunyagan ug makumpirmahan. Kita makatabang sa bag-ong mga miyembro nga maangkla diha sa ebanghelyo. Ang atong mga pagbisita ug paghigugma makatabang aron “makabalik kadtong mga nahisalaag [ug] sa pagpainit niadtong nabugnaw sa ebanghelyo.”2 Ug among gi-awhag ang mga sister sa pagduol ngadto kang Kristo pinaagi sa pagtambong sa templo.
“Makaluwas kamo og mga kalag,” miingon si Presidente Kimball ngadto sa mga visiting teacher, “ug kinsay nasayud nga daghan sa maayo og aktibong mga miyembro karon nahimong aktibo tungod kay didto kamo sa ilang mga panimalay ug mihatag kanila og bag-ong mga panglantaw, usa ka bag-ong panan-awon. Inyong giwaling ang tabil. Inyong gipalapdan ang ilang palibut. …
“Tan-awa, kamo wala lamang magluwas niini nga mga sister, apan tingali usab sa ilang mga bana ug ilang panimalay.”3
Gikan sa mga Kasulatan
Gikan sa Atong Kasaysayan
Sa dihang giorganisar ni Propeta Joseph Smith ang Relief Society, siya miingon nga ang kababayen-an dili lamang mag-atiman sa mga kabus apan sa pagluwas usab sa mga kalag. Gitudlo usab niya nga ang mga babaye sa Simbahan may mahinungdanong tahas sa plano sa Langitnong Amahan sa kaluwasan.4 Giniyahan sa mga baruganan nga gitudlo ni Propeta Joseph Smith, kita isip mga sister sa Relief Society magtinabangay sa pag-andam sa kababayen-an ug sa ilang pamilya sa dagkong mga panalangin sa Dios.
“Himoa nga kita adunay pagkamanggiloy-on diha sa matag-usa,” miingon si Presidente Brigham Young (1801–77), “ug tuguti nga ang mga lig-on mabination nga moamuma sa mga huyang ngadto sa pagkalig-on, ug himoa nga kadtong makakita mogiya sa buta hangtud nga sila makakita sa agianan sa ilang mga kaugalingon.”5
Paghulagway sa Litrato pinaagi ni Robert Casey