Gikan sa Natad sa Misyon
Pagpakaon Niadtong Kinsa Gigutom
Pinaagi sa gagmay nga mga paagi makahimo kita sa pagtubag sa dagkong mga panginahanglan—sa pisikal ug sa espiritwal.
Paghulagway pinaagi ni Carolynn Vibbert
Niadtong Disyembre 2004, nagserbisyo ako isip usa ka full-time misyonaryo sa Lins, São Paulo, Brazil. Ang lokal nga ward ug branch nakahukom sa pag-apil sa tinuig nga programa nga “Natal sem Fome” sa Brazil (Pasko nga Walay Gutmon). Nakigtambayayong sa ubang mga grupo—lakip sa mga sundalo sa Brazil, sa mga tighatud og sulat, ug sa mga miyembro sa laing relihiyon—gisuhid namo ang daghang kasilinganan nangolekta og pagkaon nga ihatag unya ngadto sa timawa sa siyudad. Gigamit usab namo kini nga oportunidad sa paghatag og pass-along cards, o “friendship cards” nga maoy among tawag niini. Mga 2,000 ka mga kard ang nahatag.
Daghang mga miyembro ang mikomentaryo sa nindot kaayo nga mga pagbati nga ilang gibati samtang sila nagserbisyo ug nakigbahin sa diwa sa Pasko ubos sa mainit nga adlaw sa Brazil. Nindot kaayo tan-awon ang mga sundalo nga nanghatag og pass-along cards gikan sa usa ka simbahan nga dili gani sila miyembro.
Paglabay sa usa ka semana dihay 127 ka mga tawo nga nangayo og Joy to the World Christmas DVD nga nagpakita sa Mormon Tabernacle Choir. Pagkasunod semana nakadawat kami og 22 pa. Ang akong kompanyon ug ako nagsugod sa pagtudlo niining mga tawhana ug nakasulod sa daghang mga panimalay isip resulta niini nga proyekto.
Dili gayud ako makalimot sa kalipay ug gugma nianang espesyal nga proyekto, sa dihang kami mitabang sa pagsangyaw sa ebanghelyo ug paghupay sa kagutom sa daghang mga pamilya. Ang espiritwal ug pisikal nga kagutom naminusan.
Nasayud ako nga pinaagi sa gagmay ug yanong mga butang (sama sa pass-along card) daghang dagko ug talagsaong mga butang (sama sa kaluwasan sa mga kalag sa mga tawo) ang mahinabo. Kini nga kasinatian maoy ebidensya nga daghang mga oportunidad ang naglibut nato panahon sa Pasko ug sa ubang mga panahon sa pagsangyaw niining katingalahan ug kahibulungan nga buhat.