Giimbitar ang mga Miyembro sa Pagpakigbahin sa Ebanghelyo pinaagi sa mga Subskripsyon sa Magasin
Isip supervisor sa Church’s Materials Management sa Thailand, si Kanogwan Wongwiraphab kanunay moatiman sa mga hangyo sa mga miyembro sa mga ekipo ug suplay sa Simbahan sama sa sagrado nga sinina ug mga publikasyon sa LDS.
Apan nasurprisa siya nga usa ka adlaw niana usa ka babaye mibisita sa iyang opisina aron magpa-renew sa iyang subskripsyon sa magasin sa Simbahan. Niana nga bahin sa kalibutan, ang mga miyembro sa kasagaran magpa-renew sa ilang mga subskripsyon pinaagi sa ilang representante sa magasin. Ang babaye, hinoon, mipasabut nga wala siyay representante sa ward. Usa siya ka Buddhist ug nakahibalo mahitungod sa mga magasin sa Simbahan sa dihang usa niya ka higala nga miyembro sa Simbahan miregalo niya og subkripsyon.
“Nagsugod siya sa pagsulti nako og talagsaong mga butang mahitungod sa mga magasin sa Simbahan ug unsa kini ka bililhon ngadto sa iyang mga anak,” sulat ni Sister Wongwiraphab. “Inig abut sa iyang mga anak gikan sa eskwelahan ug makakita sa mga magasin, madasig kaayo sila, ug sila mobasa ug mahuman dayon.”
Midayeg ang babaye sa “dakong bili” sa mga magasin ug sa pagtudlo sa iyang mga anak og maayo nga mga moralidad ug bokabularyo. Nadasig siya sa pagpa-renew sa iyang kaugalingong subskripsyon ug miregalo og mga subskripsyon ngadto sa iyang mga kauban sa trabaho aron ang ilang mga anak makabenepisyo usab niini.
“Bisan ang dili mga miyembro mobati ug makakita sa bili [sa mga magasin], ug [sila] gustong mopakigbahin niini sa uban,” sulat ni Sister Wongwiraphab.
Ang mga lider sa Simbahan kanunay nga nag-awhag sa mga miyembro sa Simbahan sa pagbasa sa mga magasin sa Simbahan ug mopakigbahin niini sa uban.
Si Elder L. Tom Perry sa Korum sa Napulog Duha ka mga Apostoles mipasabut og maayo sa malungtarung mga benepisyo sa mga magasin. “Ang maayong espiritu niini nga mga magasin makatabang sa pagpuno sa inyong mga panimalay uban sa kadasig, sa gugma, ug sa kalig-on sa ebanghelyo,” miingon siya (“Ang Kamahinungdanon sa Pamilya,” Liahona, Mayo 2003, 42).
Si Elder Craig A. Cardon sa Seventy nagserbisyo isip Assistant Executive Director sa Priesthood Department ug Editor sa mga magasin sa Simbahan, ug nakakita sa bili nga ikahatag niini sa kada indibidwal.
“Ang mga magasin sa Simbahan mga importante nga bahin sa tingog sa Simbahan nga may awtoridad, nga pinaagi niini ang mapanagnaon nga tambag gikan sa Ginoo maanaa sa tanang mga anak sa atong Amahan sa tanang mga panahon sa mga butang nga importante sa kalibutan karon,” miingon siya. “Kada bulan, makapaikag ug madanihon nga mga artikulo naghisgot sa mga sirkumstansya nga sagad sa tanang mga tawo sa tibuok yuta, sa miyembro o dili miyembro sa Simbahan. Ang tanang matinguhaong nagpangita sa kamatuoran nakabenepisyo og maayo pinaagi sa dinasig nga mga pagtulun-an ug giya nga mabasa diha niini.”
Kon ang kada nag-subscribe sa mga magasin sa Simbahan mohatag og regalo nga subkrispsyon ngadto sa dili miyembro nga higala o paryente, dul-an sa 1.7 ka milyon ka bag-ong mga subscriber ang madala ngadto sa mahigalaon, binulan nga pagkontak uban sa Simbahan.
Pinaagi sa Online Store sa Simbahan—store.lds.org—ang mga indibidwal dali ug sayon nga maka-subscribe og usa o daghang mga magasin o moregalo og subskripsyon sa mga magasin ngadto sa usa ka sakop sa pamilya o higala. Ang Friend, ang New Era, ug ang Ensign anaa sa Iningles lamang, samtang ang Liahona, nga naglakip sa mga artikulo niining tulo ka magasin nga giprinta lang karon sa Iningles, anaa sa daghang mga pinulongan.
Usa ka bishop sa Arizona’s Peoria Stake nakakaplag nga ang paghatag og regalo nga usa ka tuig nga subskripsyon sa Friend ngadto sa mga bata sa iyang ward usa ka epektibo nga paagi sa pagtabang nila nga palibutan sa mga pulong sa buhi nga mga propeta ug mga apostoles.
Si Penélope B. Woodward sa Texas, USA, mipadala og regalo nga subskripsyon sa Liahona sa iyang ig-agaw, ingon man usab sa usa ka higala ug magtutudlo sa laing nasud.
“Nanghinaut ko nga makatabang kini [sa akong ig-agaw] nga makat-unan ang kaimportante sa paghimo ug pagsunod sa mga pakigsaad,” siya misulat. Mipadayon siya, nag-ingon nga ang regalo nga subskripsyon usa ka paagi sa “pag-andam sa [sa akong higala] sa umaabut nga makadungog ug modawat sa gipahiuli nga ebanghelyo.”
Sa pag-order o pagregalo og subskripsyon, adto sa store.lds.org. Ang impormasyon sa pag-order og magasin anaa sa wala nga bahin sa pahina. Ang proseso sa pag-order diha sa internet mogiya sa mga indibidwal sa mga pag-renew, bag-ong mga subskripsyon, ug regalo nga mga subskripsyon.
Ang Store.lds.org anaa sa Chinese, English, French, German, Italian, Japanese, Korean, Portuguese, Russian, ug Spanish. Kadtong dili makasulti niadto nga mga pinulongan o kinsa walay Internet access maka-order o makaregalo og mga magasin pinaagi sa pagkontak o pagbisita sa mga sentro sa tigpang-apud-apod sa Simbahan, nga nahimutang sa daghang mga nasud.
Ang mga miyembro giawhag sa pagpakigbahin sa ebanghelyo ngadto sa dili miyembro nga mga higala ug pamilya sa tanang panahon, mga relihiyon, ug kahimtang pinaagi sa pagregalo og subskripsyon sa mga magasin sa Simbahan.
Gilitratohan ni Rick Wallace