Mensahe sa Unang Kapangulohan
Pagdiskobre og Usab sa Diwa sa Pasko
Mga tuig ang milabay isip usa ka batan-ong elder, gitawag ko uban sa pipila sa pag-adto sa usa ka ospital sa Siyudad sa Salt Lake sa paghatag og mga panalangin sa mga batang masakiton. Sa among pagsulod, nakamatikod mi og Christmas tree nga may mahayag ug madanihon nga mga suga ug nakakita og maayo kaayong pagkaputos nga mga gasa sa ubos niini. Dayon miagi mi sa mga pasilyo diin ang mga batang lalaki ug babaye—pipila kanila adunay mga plaster cast sa ilang bukton o bitiis, ang uban may mga sakit nga tingali dili dayon maayo—miabi-abi kanamo uban sa ilang mapahiyumong panagway.
Usa ka bata, nga masakiton gayud nga batang lalaki nangutana kanako, “Unsay imong ngalan?”
Gisultihan nako siya sa akong ngalan, ug mihangyo siya, “Mahimo bang mohatag ka nako og panalangin?”
Gipanalanginan nako siya, ug sa among pagbiya sa iyang higdanaan, siya miingon, “Salamat kaayo.”
Nakalakaw nami og pipila ka lakang, ug dayon nakadungog ko niyang misulti, “Oy, Brother Monson, maayong Pasko kanimo.” Dayon talagsaong pahiyum ang nakita sa iyang hulagway.
Kadto nga batang lalaki adunay diwa sa Pasko. Ang diwa sa Pasko mao ang usa ka butang nga akong gilauman nga maanaa sulod sa kasingkasing ug kinabuhi natong tanan—dili lamang niining piho nga panahon apan sa tibuok katuigan.
Kon anaa kanato ang diwa sa Pasko, ato Siyang hinumduman kansang pagkatawo atong gisaulog niining panahon sa tuig: “Kay alang kaninyo natawo karon sa lungsod ni David ang Manluluwas, nga mao ang Kristo nga Ginoo” (Lucas 2:11).
Sa atong panahon, ang diwa sa paghatag og mga gasa may dakong bahin sa pagsaulog sa panahon sa Pasko. Naghunahuna ko kon kini ba makatabang nato kon pangutan-on nato atong kaugalingon, Unsa kahay mga gasa nga gusto sa Ginoo nga akong ihatag Kaniya o sa uban niining bililhong panahon sa tuig?
Mahimo bang mosugyot ko nga ang atong Langitnong Amahan buot nga kitang tanan mohalad Kaniya ug sa Iyang Anak sa gasa sa pagkamasulundon. Mibati usab ko nga Siya mohangyo kanato sa pagtabang sa uban ug dili maghinakog o maghinangol o magsige og pangaway, sama sa gisugyot sa Iyang Anak diha sa Basahon ni Mormon:
“Sa pagkatinuod, sa pagkatinuod, siya nga may espiritu sa panagbingkil dili gikan kanako, apan gikan sa yawa, kinsa … nagkutaw sa mga kasingkasing sa mga tawo sa panagbangi uban ang kasuko, sa usag usa.
“Tan-awa, kini dili mao ang akong doktrina, sa pagkutaw sa mga kasingkasing sa mga tawo sa kasuko, usa batok sa usa; apan mao kini ang akong doktrina, nga ang ingon niini nga mga butang pagahunungon” (3 Nephi 11:29–30).
Niining talagsaon nga dispensasyon sa kahingpitan sa mga panahon, ang atong mga kahigayunan sa paghigugma ug pagtabang sa uban walay kinutuban, apan mahimo usab kini nga mawala. Karon adunay mga kasingkasing nga angayang lipayon, mga mabinationg pulong angayang isulti, mga maayong buhat nga angayang buhaton, ug mga kalag nga angayang luwason.
Usa ka tawo nga may maayong pagsabut sa diwa sa Pasko misulat:
Ako ang Diwa sa Pasko—
Mosulod ko sa panimalay sa kabus, makapasiga sa mga mata sa nangluspad nga mga bata, sa tumang kalipay.
Pabukharon nako ang nagkumkom nga kamot sa tawo nga hakog ug sa ingon makapahalipay sa iyang kalag.
Mapahinumduman nako ang mga tigulang sa ilang kabatan-on ug makapatawa kanila sama sa mas batan-on pa sila.
Mapadayon nako ang gugma diha sa kasingkasing sa pagkabata, ug mapanindot ang pagkatulog uban sa mga damgo nga puno sa mahika.
Makapahimo ako sa tawo sa pagtabang sa uban, nga makapahingha kanila sa kaayo sa kalibutan.
Makapahunong ako sa bisyo sa tawo nga usikan, ug makapadala og gamayng butang ngadto sa nahingawa nga minahal nga makapatulo sa luha sa kalipay—mga luha nga mopawala sa kaguol.
Mosulod ko sa ngitngit nga prisohan, nagpahinumdom sa nadaot nga pagkatawo sa mahitabo unta ug naghatag og paglaum sa mga adlaw nga moabut.
Hinay-hinay kong mosulod sa hilum, puti nga panimalay sa kasakit, ug ang mga ngabil nga dili makabuka igo lang nga mokurog sa hilum, larinong pagpasalamat.
Sa daghang mga paagi, akong mapalantaw ang nagguol nga kalibutan ngadto sa panagway sa Dios, ug sa makadiyot makalimot sa mga butang nga gagmay ug makapasubo.
Ako ang Diwa sa Pasko.1
Unta atong madiskobrehan pag-usab ang diwa sa Pasko—gani ang Espiritu ni Kristo.
Pagtudlo Niini nga Mensahe
Samtang inyong ipakigbahin ang mensahe ni Presidente Monson ngadto sa pamilya, ikonsiderar ang paghatag og gibug-aton sa iyang gipangutana kon unsa nga mga gasa ang gusto sa Ginoo nga atong ihatag Kaniya o sa uban niining panahona. Awhaga ang mga sakop sa pamilya sa pagrekord sa ilang mga hunahuna ug ideya (o, alang sa mga bata, pa-drawinga og litrato) kon unsaon nga “madiskobrehan pag-usab ang diwa sa Pasko—gani ang Espiritu ni Kristo.”
Si Kristo ug ang Dato nga Batan-ong Magmamando, ni Heinrich Hofman, sa maayong kabubut-on sa C. Harrison Conroy Co.