Ang Tradisyon sa Kahayag ug Pagpamatuod
Gikan sa usa ka debosyonal nga pakigpulong niadtong Enero 24, 2012, sa Brigham Young University–Idaho. Alang sa kompleto nga teksto sa Iningles, bisitaha ang web.byui.edu/devotionalsandspeeches.
Siguradoa nga kamo nagmugna og mabungahong palibut diin ang inyong pamilya maghinam-hinam sa espesyal nga mga panahon sa tuig diin ang mga tradisyon makapahiusa kaninyo isip talagsaong unit sa mahangturong pamilya.
Ang Simbahan ni Jesukristo sa mga Santos sa Ulahing mga Adlaw sa tinuoray usa ka tibuok kalibutan nga Simbahan. Bisan pa niana, importante nga masayran nga ang Simbahan dili mahimo kon unsa kini karon kon wala mamugna ang bantugang nasud, ang Tinipong Bansa sa Amerika. Ang Ginoo nag-andam og bag-ong yuta sa pagdani sa mga tawo sa kalibutan kinsa nagtinguha og kalingkawasan ug kagawasan sa tinuohan. Kining bag-ong yuta napanalanginan og lig-ong mga lider kinsa mibati nga may obligasyon sa pag-establisar og gobyerno nga motugot sa mga indibidwal sa pagsimba sumala sa ilang kaugalingong konsyensya.
Ang mga Tigtukod sa Pundasyon sa Estados Unidos nagtuo nga ang pagtuo sa relihiyon mahinungdanon sa pag-establisar sa lig-on nga gobyerno. Daghang mga tawo sa kalibutan, hinoon, nalimot sa kamahinungdanon sa mga pagtuo sa relihiyon sa pagpanday sa mga polisiya, mga lagda, ug mga balaod sa gobyerno. Daghang mga Amerikano, sama pananglit, wala makasabut nga ang mga tigtukod nagtuo sa tahas sa relihiyon mahimong sama kaimportante karon sama sa ilang panahon. Ang mga tigtukod wala mokonsiderar sa relihiyon ug moralidad nga mga butang nga kinahanglang hunahunaon pa—sila mapugsanong mideklarar niini nga mahinungdanong butang sa maayo nga panggobyerno ug kalipay sa katawhan.
Kini nga baruganan gipamulong sa unang presidente sa U.S., si George Washington, sa iyang Panamilit nga Pakigpulong. Siya miingon:
“Sa tanang disposisyon ug pamatasan nga makadala ngadto sa paglambo sa politika, ang relihiyon ug moralidad mao ang gikinahanglan nga mga suporta. … Magmabinantayon kita sa pagtuo sa ideya nga ang moralidad magpabilin bisan walay tinuohan. … Ang rason ug kasinatian nagdili kanato sa pagdahum nga mopatigbabaw ang moralidad sa tibuok nasud kon walay baruganan sa tinuohan.
“Tinuod kaayo nga ang hiyas ug moralidad maoy kinahanglan nga sinugdanan sa panggobyerno.”1
Ang Estados Unidos mao ang yuta nga saad nga gipanagna diha sa Basahon ni Mormon—usa ka dapit diin ang balaanong paggiya miimpluwensya sa dinasig nga mga tawo sa pagmugna og mga kondisyon nga kinahanglanon sa Pagpahiuli sa ebanghelyo ni Jesukristo. Ang pagmugna sa Tinipong Bansa sa Amerika mao ang sinugdanan aron matapos ang Dakong Apostasiya, sa dihang ang kalibutan mangitngit tungod sa pagkawala sa mga propeta ug sa pinadayag nga kamatuoran. Dili sulagma nga ang kaanindot sa kabuntagon sa Unang Panan-awon nahitabo mga pipila lang ka dekada human maestablisar ang Estados Unidos.
Ang Unang Panan-awon mao ang sinugdanan sa daghang mga pinadayag nga mga kamatuoran. Gipahiuli ang kahibalo kabahin sa kinaiya sa Dios nga Kapangulohan. Usa ka bag-ong gihubad nga kasulatan naghatag og ikaduhang pagsaksi ug pagpamatuod ni Jesukristo. Ang pagpahiuli sa priesthood nakapanalangin og usab sa mga katawhan uban sa gahum ug katungod sa paglihok alang ug sa ngalan sa Dios sa pagpahigayon sa mga ordinansa sa priesthood ug sa pag-establisar og usab sa Simbahan ni Jesukristo dinhi sa kalibutan. Kita napanalanginan nga nahimong miyembro sa gipahiuli nga Simbahan.
Usa ka Plano alang sa Kasiguradoan sa Espirituhanon
Usa sa mga panalangin sa gipahiuli nga Simbahan mao ang buhing mga propeta. Si Presidente Harold B. Lee (1899–1973) adunay nindot nga klarong panabut sa mga prayoridad. Siya mitudlo, “Kadaghanan sa atong gibuhat pinaagi sa organisasyon [sa Simbahan] … nagsuporta, samtang nagtinguha kita sa paglig-on sa indibidwal, ug kinahanglan gayud nga dili kita masayop nga ang suporta mao ang sa kalag.”2
Wala gipakaminus ni Presidente Lee ang tahas sa Simbahan alang sa kaluwasan sa mga lalaki, mga babaye, ug mga pamilya. Gani, siya gamhanang mitudlo nga ang labing mahinungdanon sa ebanghelyo ni Jesukristo mao ang mga indibidwal, mga pamilya, ug mga panimalay, diin ang Simbahan nagsuporta niini.3 Busa, ang Simbahan mao ang suporta diin kita makatukod og mahangturong mga pamilya.
Nahilakip ko sa branch sa Wing family tree. Ang mga sakop sa pamilyang Wing nanag-iya gihapon sa pinakakaraan nga balay nga gitukod sa New England nga nagpabilin sa mao gihapong pamilya. Gitawag kini og Old Fort House. Kini mao ang panimalay ni Stephen Wing ug sa iyang pamilya sa ilang pag-abut sa Amerika niadtong mga 1635.
Ang tunga-tunga sa balay gitukod para proteksyon. Ang mga bong-bong niini mga duha ka pye (0.6 m) ang gibag-on, hinimo sa pinutol nga punoan sa tugas [oak] nga giugbok ngadto sa yuta nga napormang sama sa pagtukod sa garison sa New England. Aduna kini duha ka managlahi nga bong-bong. Ang space sa tunga-tunga niini puno sa sandstone para sa proteksyon batok sa mga pana ug mga bala. Ang fort [kota] mao ang sentro sa balay. Samtang nagkadako ang pamilyang Wing, gipalapdan ang mga kilid sa orihinal nga fort house. Apan ang fort nagpabilin nga ilang proteksyon, ilang dapit nga kadangpan.
Tingali matag usa kanato kinahanglang mokonsiderar sa pagtukod og mga estraktura alang sa atong espirituhanon nga kasiguradoan nga walay impluwensya sa kalibutan—mga dapit diin kita makaprotekta ug makatudlo sa mga sakop sa pamilya unsaon sa pagbuntog sa mga hagit sa kalibutan nga kanunayng mohulga sa labing mahinungdanong mga mithi sa ebanghelyo. Mas ganahan kong mas positibo, busa nagpadayon ko sa paglaum sa positibong kausaban sa kalibutan. Apan nagtuo usab ko sa reyalidad, busa naghimo usab ko og panagana nga plano inkaso og dili mahitabo ang positibong mga kausaban. Ang akong panagana nga plano alang sa espirituhanon nga kasiguradoan kinahanglang maglangkob sa tanan—maayo ug dautan—nga gipasiugdahan sa lain-laing mga media. Asa man ko modangup aron makat-on unsaon sa paghimo og panagana nga plano alang sa espirituhanon nga kasiguradoan sa akong pamilya? Modangup ko sa Simbahan—ang suporta diin ako makatukod og mahangturong pamilya.
Adunay duha ka dagkong rason nganong nakadayeg ko sa pasumbingay ni Presidente Lee sa Simbahan isip suporta sa atong mahangturong mga pamilya. Una, kini nakatabang kanako sa pagsabut unsa ang gitudlo sa Simbahan. Ikaduha, ug susama ka importante, akong nasabtan kon unsa ang wala gitudlo sa Simbahan.
Ang Simbahan isip suporta tingali maayo kaayo pagpasabut ni Propeta Joseph Smith sa iyang pamahayag nga iyang gihimo kabahin sa iyang tahas isip lider sa Simbahan. Siya miingon, “Ako mitudlo kanila sa husto nga mga baruganan, ug gidumala nila ang ilang mga kaugalingon.”4 Ang mahangturong mga baruganan mao ang suporta nga ikahatag sa Simbahan. Kining mahangturong mga baruganan anaa sa mga doktrina sa gingharian sa Dios ug makita sa Iyang mahangturong plano sa kalipay. Kita magpundok isip mga miyembro sa Simbahan aron sa pagtudlo ug pagkat-on gikan sa usag usa sa mga baruganan sa pagkamatarung ug sa pagdawat sa makaluwas nga mga ordinansa aron ang suporta anaa kanunay ug lig-on samtang kita magtukod sa atong mahangturong mga pamilya.
Bantayi nga ang Simbahan wala gituyo sa pagbuhat sa buluhaton sa mga ginikanan; apan, kini naggiya sa buluhaton sa mga ginikanan. Ang Simbahan nagtanyag og mahangturong sumbanan. Isip tigtukod sa mahangturong mga pamilya, kita gisiguro sa mga saad nga kon kita magtukod sumala niining mahangturong sumbanan, ang atong mga paningkamot makahatag og kaluwasan [safety] ug proteksyon nga atong gitinguha alang niadtong atong gimahal.
Ang atong hagit mao ang paggamit sa Simbahan isip suporta sa pagtukod og pamilya nga sa espirituhanong paagi lig-on o mas lig-on pa kaysa Old Fort House nga lig-on sa pisikal nga paagi. Unsaon ni nato pagbuhat?
Ang Importansya sa mga Tradisyon
Nagtuo ko nga ang mga tradisyon sa pamilya susama sa pinutol nga mga punoan sa tugas nga giugbok ngadto sa yuta sa pagtukod sa Old Fort House. Himoa nga ang pagpasidungog sa mga tradisyon sa pamilya—mga tradisyon sa holiday, birthday, ma-Dominggo, sa panihapon—ug ang pagmugna og bag-ong mga tradisyon usa ka prayoridad sa inyong kinabuhi. Pasidunggi kini, isulat kini, ug isiguro nga inyo kining buhaton. Ang pagsiksik nagpakita nga ang mga batan-on moapil og mga gang tungod sa tradisyon ug ritwal nga mahisakop sa usa ka butang nga mas dako pa kay kanila. Ingon ana gayud unta ang pamilya. Siguroa nga nagmugna kamo og mabungahong palibut diin ang inyong pamilya maghinam-hinam sa espesyal nga mga panahon sa tuig sa dihang ang mga tradisyon maghiusa kaninyo isip usa ka talagsaon nga mahangturong unit sa pamilya.
Sabta nga kini dili yano o sayon nga solusyon. Sama nga ang Rome wala gitukod sa usa lang ka adlaw, ni ang mga tradisyon sa pamilya. Ang mga tradisyon sa pamilya makahatag sa nag-una ug mahangturong suporta, apan daghan pa ang kinahanglang itukod palibut niini. Siguro ang mga tradisyon sa pamilya moepekto lamang kon kini nakamugna og tahas [role] sa matag sakop sa pamilya ug kon nagkahiusa sa pagtukod niini. Kini nagpasabut nga ang mga sakop sa pamilya kinahanglang mogahin og panahon ug magtinabangay sa usag usa. Kabahin sa pamilya, walay kalidad nga panahon kon walay piho nga paggahin sa panahon.
Kon inyong ikonsiderar ang pagpanarbaho, pananglit, hunahunaa pag-ayo kon pila ka oras ang inyong gikinahanglan sa pagtrabaho matag adlaw. Kini ba ang klase sa trabaho nga nagkinahanglan og 14 ka oras kada adlaw ug nakapugong kaninyo sa pag-uli sa balay hangtud nga makatulog na ang inyong mga anak? Wala ko mosugyot nga ang sama niini nga oportunidad sa pagpanarbaho dili angay nga ikonsiderar, apan kon imo kining pilion, kinahanglang magmamugnaon ka aron padayong konektado sa inyong pamilya. Ang suporta sa Simbahan makatabang sa pagpahinumdom kaninyo sa inyong mahangturong mga prayoridad.
Alang sa akong trabaho gipili nako ang retail business. Ang among tindahan abli unom ka adlaw sa usa ka semana gikan sa alas 10:00 sa buntag hangtud alas 10:00 sa gabii. Ang akong normal nga trabaho kada adlaw dili moubos og 10 ka oras, usahay 12 hangtud 15 ka oras. Nagmatngon ko nga aduna koy panahon para sa akong mga anak, ug nagtuo ko nga ang paglantaw sa Simbahan isip suporta kanunay nga nagpahinumdom kanako sa akong mahangturong mga prayoridad.
Sama pananglit, gipa-part-time job nako ang tanan nakong mga anak sa among tindahan. Ang akong kinamagulangang anak nga babaye mosulod ug mo-update sa halin aron kanunay updated ang akong report ug makakompara ko sa matag tuig. Ang akong anak nga lalaki makatrabaho sa accounts payable atol sa bakasyon sa ting-init. Gitudloan nako ang akong kinamanghuran nga babaye unsaon sa paggamit sa cash register aron makatrabaho siya og part-time cashier. Kini naghatag kanamo og oportunidad nga magkita matag adlaw, magdungan og paniudto sa pipila ka adlaw matag semana, ug mogahin og talagsaong panahon sa kadausa sa akong mga anak. Ang labing maayong panahon mao ang dungan nga pagsakay namo padulong ug gikan sa trabaho.
Suporta sa Atong Propesyonal nga mga Kinabuhi
Nagtuo usab ko nga ang Simbahan makasuporta sa atong propesyonal nga mga kinabuhi. Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita nagrepresentar sa Manluluwas ug sa Iyang Simbahan. Alang kanato, ang sama lang ka buotan sa usa ka tawo nga sakop sa laing simbahan dili paigo. Si Presidente George Albert Smith (1870–1951) mitudlo niining leksyon sa dihang siya miingon:
“Sulod sa miaging tuig, ako adunay pribilehiyo sa pakighimamat ug pakigsulti mahitungod sa ebanghelyo uban sa pipila ka mga tawo kinsa nagpuyo niini nga komunidad [Siyudad sa Salt Lake], nga dili mga miyembro sa atong Simbahan. Ang usa ka tawo nagpuyo dinhi sulod sa baynte na ka tuig, usa ka tawo kansang kinabuhi dili masaway, usa ka maayong lumulupyo, usa ka buotan nga negosyante, usa ka tawo kinsa adunay malumo nga mga pagbati ngadto sa atong katawhan. Misulti siya kanako nga nagpuyo siya dinhi baynte na ka tuig, ug iyang napamatud-an nga kita pareha ra ka maayo sa atong mga silingan kinsa mga miyembro sa lain nga mga simbahan; siya walay makitang kalainan ngari kanato.
“Gusto ko nga mosulti kaninyo, akong mga kaigsoonan, nga kini dili usa ka pagdayeg alang kanako. Kon ang ebanghelyo ni Jesukristo wala makapahimo kanako nga usa ka mas maayo nga tawo, nan wala ako molambo ingon sa gikinahanglan nga ako molambo, ug kon ang atong mga silingan nga dili kauban niini nga Simbahan makapuyo uban kanato sulod sa mga katuigan ug walay makita nga ebidensya sa mga kaayohan nga moabut gikan sa pagsunod sa mga sugo sa Dios sa atong kinabuhi, nan adunay panginahanglan sa pag-usab diha sa Israel.5
Ang usa ka miyembro sa Simbahan kinsa angayan sa usa ka rekomend sa templo kinahanglang kanunay nga makit-ang talagsaon sa bisan asang propesyonal nga pundok siya malakip. Paningkamot nga mahimong lahi. Ayaw og kabalaka nga masilo ang uban kon magsunod kamo sa mga baruganan sa Simbahan. Mosaad ako kaninyo nga pinaagi sa pagsunod sa mga baruganan aron mahimong takus sa rekomend sa templo makapanalangin ug dili mopasakit kaninyo sa bisan unsang sitwasyon nga maanaa kamo.
Pagpakita sa Kahayag sa Manluluwas
Samtang nagbasa ug nagtan-aw ko og mga balita matag adlaw, natingala ko sa mga kalisud nga kita-kita ra ang nagmugna. Samtang ang mga panahon ug kondisyon mausab ug mahimong mas lisud, morag nagkagamay ang mga indibidwal nga makahimo sa mga responsibilidad nga makadala og positibong kausaban. Hagiton ko kamo mga lider ug mga lider sa umaabot sa pag-ila nga ang kalibutan pas-pas kaayong nausab. Adunay dakong panginahanglan og mga lider kinsa makahimo ug maisugon sa pagsagubang sa dakong mga hagit nga giatubang nato karon.
Ang moral nga pundasyon sa lig-ong tradisyon sa Hudeo-Kristiyano nagkahuyang sa Estados Unidos ug sa ubang mga nasud. Kini nga tradisyon nakabase sa hustisya, kalooy, ug pagtahud sa dignidad sa tawo. Wala kini nakabase sa mga balaod ug regulasyon apan diha sa Kahayag ni Kristo sa matag buotan ug desente nga lungsuranon.
Ang gidaghanon sa mga tawo nga midawat niini nga mga pagtuo ug mithi nagkagamay, apan ikaw ug ako nagpabiling matinud-anon. Kita nakigsaad sa Manluluwas sa pagrepresentar Kaniya. Pinaagi sa pagrepresentar ni Jesukristo ug sa pagpakita sa Kahayag ni Kristo sa atong kinabuhi, kita makatabang sa atong mga kaigsoonan nga mahinumduman ang ilang tradisyon ug panulundon sa Hudeo-Kristiyano.
Kita kinahanglang maisugon sa atong mga pagdeklarar ug pagpamatuod sa kabalaan ni Jesukristo. Buot natong ipahibalo sa uban nga kita nagtuo nga Siya ang mahinungdanong tawo sa kasaysayan sa katawhan. Ang iyang kinabuhi ug mga pagtulun-an mao ang sentro diha sa Biblia ug sa ubang mga basahon nga atong gikonsiderar nga balaang mga kasulatan. Ang Daang Tugon naghulagway sa mga panghitabo sa wala pa ang mortal nga pangalagad ni Kristo. Ang Bag-ong Tugon naghulagway sa Iyang mortal nga pangalagad. Ang Basahon ni Mormon naghatag kanato sa ikaduhang saksi sa Iyang mortal nga pangalagad. Siya mianhi sa kalibutan sa pagdeklarar sa Iyang ebanghelyo isip pundasyon sa tanang katawhan aron ang tanang mga anak sa Dios makakat-on kabahin Kaniya ug sa Iyang mga pagtulun-an. Iyang gihatag ang Iyang kinabuhi aron mahimo natong Manluluwas ug Manunubos. Pinaagi lang kang Jesukristo nga ang kaluwasan posible. Mao kini ang rason nganong nagtuo kita nga Siya ang mahinungdanong tawo sa kasaysayan sa katawhan. Ang atong mahangturong kapaingnan anaa kanunay sa Iyang mga kamot. Usa ka mahimayaong butang ang pagtuo Kaniya ug pagdawat Kaniya isip atong Manluluwas, atong Ginoo, ug atong Agalon.
Hinumdumi ang tanan nga gihimo, gipanghimo, ug mahimo sa Simbahan alang kaninyo ug sa inyong pamilya. Ug hinumdumi nga dili lang ni ordinaryo nga simbahan; kini ang gipahiuli nga Simbahan ni Jesukristo.
Paghulagway sa litrato pinaagi ni John Luke © IRI
Paghulagway pinaagi ni Dan Burr
Ang Ginoong Jesukristo, ni Del Parson, © 1983 IRI; paghulagway sa litrato © IRI