Pagtulun-an human sa usa ka Pagtulun-an
1 Mga Taga-Corinto 15:20–22
Niini nga mga bersikulo si Apostol Pablo namahayag nga ang Pagkabanhaw ni Kristo nagpasabut nga ang tanan mabuhi pag-usab.
Siya Buhi, ni Simon Dewey
20 Apan ang tinuod mao nga si Kristo gibanhaw gikan sa mga patay, ang nahaunang gibanhaw sa mga nangamatay.
21 Kay maingon nga pinaagi sa usa ka tawo miabut ang kamatayon, pinaagi usab sa usa ka tawo nahiabut ang pagkabanhaw sa mga patay.
22 Kay maingon nga diha kang Adan ang tanan nangamatay, maingon man usab diha kang Kristo ang tanan mangabuhi.
Karon Si Kristo Nabanhaw gikan sa mga Patay
“Walay mga pulong sa Kristiyanos nga adunay mas dakong kahulugan ngari kanako kay sa gipamulong sa anghel ngadto sa naghilak nga si Maria Magdalena ug sa lain nga Maria sa ilang pagduol sa lubnganan aron atimanon ang lawas sa ilang Ginoo: “Ngano nga ang buhi anhi man ninyo pangitaa sa mga patay? Wala Siya dinhi, kondili nabanhaw” (Lucas 24:5–6).
“Niini nga pamahayag, kadtong kinsa nabuhi ug namatay, kadtong buhi karon ug sa umaabut mamatay, ug kadtong wala pa matawo ug wala pa mamatay naluwas.
“Isip resulta sa kadaugan ni Kristo ibabaw sa lubnganan, kitang tanan mabanhaw. Mao kini ang katubsanan sa kalag.”
Presidente Thomas S. Monson, “Wala Na Siya Dinhi, Kondili Nabanhaw,” Liahona, Abr. 2011, 4.
Nahaunang Gibanhaw sa mga Nangamatay
Unang mga bunga—ang mga bunga, mga utanon, ug mga lugas nga pinakasayo nga nahinog sa pag-ani.
Ubos sa balaod ni Moises, ang unang mga bunga ihalad isip balaan nga sakripisyo ngadto sa Ginoo sa pagpakita og pagpasalamat ug debosyon. Tungod kay ang unang mga bunga mao ang timailhan nga nagsugod na ang ani ug daghan pang mga bunga ang anihon pa, si Apostol Pablo nag-ingon nga si Jesukristo mao ang unang gibanhaw gikan sa mga patay (“sa nangamatay”) sa pagbangon pag-usab ug nga daghan pa ang mabanhaw.
Kay Maingon nga diha Kang Adan ang Tanan Nangamatay
Tungod nga si Adan ug Eva napukan, kita maingon; ug pinaagi sa iyang pagkapukan miabut ang kamatayon (tan-awa sa 2 Nephi 9:6; Moises 6:48).
Maingon Man Usab Diha Kang Kristo Ang Tanan Mangabuhi
“Naghunahuna ko kon hingpit ba gayud natong nasabtan ang kaimportante kaayo sa atong pagtuo sa usa ka literal, masangkarong pagkabanhaw. Ang kasiguroan sa pagka-imortal importante sa atong tinuohan. …
“Sa atong mahangturong panaw, ang pagkabanhaw mao ang dakong posting timaan nga nagpasabut sa katapusan sa mortalidad ug ang sinugdanan sa pagka-imortal. … Nasayud usab kita, gikan sa moderno nga pagpadayag, nga kon wala ang pagkahiusa pag-usab sa atong mga espiritu ug sa atong mga lawas diha sa pagkabanhaw dili kita makadawat sa ‘kahingpitan sa himaya’ (D&P 93:33–34).”
Elder Dallin H. Oaks sa Korum sa Napulog Duha ka mga Apostoles, “Resurrection,” Liahona, Hulyo 2000, 17.