Tungod sa mga Pamilya
Nakahunahuna ba kamo sa tanan nga mga paagi nga napanalanginan mo tungod kay nahimong kabahin sa usa ka pamilya?
Walay duha ka mga pamilya nga managsama, apan ang Dios mi-orden sa pamilya nga mao ‘ang labing importante nga sosyal nga unit karon ug sa kahangturan.”1 Bisan asa pa kamo nagpuyo o unsang klase ang inyong pamilya, ang ebanghelyo makatabang kaninyo sa pagpalambo og lig-on nga mga relasyon ug espirituhanong kalig-on samtang kini makahatag og mas dakong kalipay sa inyong pamilya. Basaha unsay ikasulti niining mga tin-edyer gikan sa tibuok kalibutan nganong ang mga pamilya importante kanila.
Ang Pamilya Mahangturon
Si Erin, gikan sa North Carolina, USA, ug ang iyang pamilya (sa wala) dunay usa ka tumong nga naa sa hunahuna kanunay: nga mahimong mahangturong pamilya. Bisan pa, ang amahan ni Erin dili miyembro sa Simbahan.
“Dayag nga ang akong mama ug mga igsoon gusto nga si papa makaambit sa mga panalangin sa ebanghelyo. Ang ebanghelyo ni Jesukristo makapalipay namo, ug kami gusto nga si Papa makaambit niana nga kalipay. Gusto usab kaayo kami nga mabugkos isip pamilya,” miingon ni Erin.
Determinado nga mahimong mahangturong pamilya, si Erin ug ang iyang mga igsoon ug inahan naningkamot pag-ayo sa pagtuman sa mga sugo ug pagpalambo og hugot nga pagtuo, ug sila nag-ampo pagdungan nga matandog sa ebanghelyo ang kasingkasing sa ilang amahan.
Bisan og milungtad og daghang mga tuig, ang amahan ni Erin sa katapusan nabunyagan ug nakumpirmahan. Napulo ka adlaw human sa iyang bunyag, nakahimo siya sa pagbunyag sa mga manghud ni Erin. Sa dili madugay ang ilang pamilya makakab-ot sa ilang tumong nga mabugkos diha sa templo.
Ang Pamilya Makahatag og Kalig-on ug Suporta
Sukad pa sa pagkamatay sa ilang amahan, si Elizabeth ug ang iyang igsoong lalaki, si Enaw, sa Cameroon, Africa, nagsalig sa ilang inahan. “Siya ang tinubdan sa tabang namo sukad namatay ang among amahan. Ang Dios mipanalangin namo ug mipanalipod namo sa tanan namong gibuhat,” miingon si Elizabeth.
Ang pamilya ni Elizabeth (ibabaw) nagtinabangay human sa pagkamatay sa iyang amahan. Dayon, human sa ilang pagpasakop sa Simbahan niadtong 2010, si Elizabeth ug si Enaw nakakat-on sa mahangturong pagkaimportante sa pamilya.
“Usa sa importante nga mga butang nga among nakat-unan [gikan sa ebanghelyo] mao ang mahitungod sa kaimportante sa pamilya,” miingon si Elizabeth. “Ang pamilya importante kaayo nako tungod kay pinaagi sa akong pamilya, nahimo ako unsa ako karon.”
Ang Pamilya Makatabang sa Kalamboan ug Kalinaw
Si Adina, gikan sa Switzerland, nakat-on kon sa unsa nga paagi ang mga sakop sa pamilya makatabang sa usag usa nga makapalambo og mga talento samtang sila magkalingaw og maayo nga mga kalingawan.2 Ang iyang pamilya nagplano og binulan nga family outing diin sila makat-on pa sa mga hobby sa usag usa. “Kami dunay oportunidad sa paghatag sa among mga igsoon og lawom nga pagsabut sa among kinabuhi ug sa among mga tinguha,” miingon siya. Usa ka higayon niana, ang iyang amahan mitudlo sa iyang pamilya bahin sa pagbansay sa iro (ubos). “Nindot kaayo nga makakita sa iyang kadasig ug unsa siya kamalipayon nga nakigbahin sa usa ka importante nga bahin sa iyang kinabuhi ug hobby uban namo,” nahinumdom si Adina.
Pinaagi niining mga kalihokan sa pamilya, si Adina nakapalambo og daghang mga kahanas. Nakamatikod usab siya og dugang kalinaw sa iyang kinabuhi: “Ang pamilya mao ang dapit nga ako makapahulay gikan sa kakapoy sa kinabuhi kada adlaw ug makaginhawa nga malinawon, ingon man usab makaangkon og kalig-on ug masayud nga wala ako mag-inusara niining kinabuhia. Mapasalamaton ako niini tungod kay ang kalibutan karon paspas kaayo ug banha. Nalipay ako nga ako adunay dapit nga kapalagsikan ug kapahulayan.”
Bisan og ang ilang mga rason magkalahi, kini nga mga tin-edyer nakakaplag nga sila makasalig sa ilang mga pamilya alang sa suporta, kalinaw, ug gugma.
Mga litrato sa maayong kabubut-on sa mga pamilya