Mga Gasa nga Dili Ninyo Maputos

Ni Elyse Alexandria Holmes

Sa panahon sa pasko nagpokus kita sa kasagaran sa paghatag og mga gasa niadtong atong gimahal. Apan hinumdumi nga ang pipila ka importante kaayo nga mga gasa mao kadtong dili ninyo maputos. Aniay pipila ka dili makalimtan nga mga gasa nga inyong mahatag sa inyong mga ginikanan.

Serbisyo

Usa sa labing importante nga mga gasa nga inyong mahatag mao ang pagserbisyo. Ang inyong ginikanan ganahan niini.

Paglimpyo sa balay.
Pagtanyag nga mobantay sa bata.
Pagpahimutang ug paghawan sa lamesa.
Pagluto og panihapon alang sa inyong pamilya.
Paghugas sa mga plato ug pagsilhig sa salog.
Pagtabang sa igsoon sa iyang homework.
Depende sa klima diin kamo magpuyo, paghawan sa agianan o pagguna sa tanaman.

Panahon sa Pamilya

Bisan og busy ang inyong iskedyul, paggahin og panahon alang sa inyong pamilya. Ang inyong presensya makatabang og suporta sa inyong mga ginikanan, ug magpasalamat sila sa inyong mga paningkamot.

Pag-apil sa family home evening (nga dili na kinahanglang pahinumduman pa niini).
Pakigdula sa inyong mga igsoon.
Pag-apil sa panihapon sa pamilya sa saktong oras.
Pakigsulti ug paminaw sa mga miyembro sa pamilya.
Pag-apil sa pag-ampo sa pamilya ug pagbasa sa kasulatan.
Paggahin og panahon uban sa inyong pamilya imbis sa inyong mga higala lang, o pangimbitar sa inyong mga higala ngadto sa mga kalihokan sa pamilya (dunay pagtugot sa inyong ginikanan).

Pasalig

Pahibaloa ang inyong mga ginikanan nga kamo mopasalig sa butang nga importante. Ang labing maayong paagi sa pagpakita sa inyong pasalig mao ang pagsugod karon ug sa pagpadayon.

Pag-andam sa pagserbisyo og misyon (alang sa batan-ong mga lalaki). Pagsugod karon pinaagi sa pagtigum alang sa misyon kon posible.
Pagtuon sa mga kasulatan kada adlaw.
Pagtigum sa inyong mga kinitaan.
Pag-eskwela nga dili magbagulbol ug pagbuhat sa inyong homework dayon.
Pagtambong sa seminary. Kon kamo motambong sa seminary sa buntag, pagmata nga kamo-kamo lang.
Pagpangandam alang sa kaminyoon sa templo. Paglista sa importante nga mga hiyas nga pangitaon sa umaabut nga kapikas ug dayon palamboa kadto nga mga hiyas sa inyong kaugalingon.

Kinaiya

Ang inyong mga ginikanan mopasalamat sa maayong kinaiya ngadto nila ug sa inyong ubang mga sakop sa pamilya.

Pagbaton og positibo nga kinaiya.
Ayaw pangitag sayop sa inyong mga ginikanan o mga igsoon.
Pag-anad sa pagsulti og salamat, bisan sa gagmayng mga butang.
Pagsulat og sulat pasalamat ngadto sa inyong mga ginikanan alang sa tanan nilang gihimo alang kaninyo.
Pagsulbad sa mga panagsumpaki uban sa inyong mga ginikanan o mga igsoon nga walay kasuko o panaglalis.
Pag-ihap sa inyong mga panalangin—sa literal nga paagi. Paglista sa mga butang nga inyong nahimo tungod sa suporta sa inyong mga ginikanan, ug ipakigbahin ang lista uban nila.