Unsaon sa Paghatag og mga Gasa ngadto ni Kristo
Gikan sa 2010 nga pakigpulong sa Debosyonal sa Pasko sa Unang Kapangulohan “Ang Gasa sa Manluluwas.”
Ang diwa sa Pasko nagbutang diha sa atong mga kasingkasing og tinguha sa paghatag og hingpit nga kalipay ngadto sa ubang tawo. Ang pagsaulog sa Pasko nagtabang kanato nga makatuman sa atong saad sa kanunay nga mohinumdom sa Ginoo ug sa Iyang mga gasa kanato. Ug kana nga handumanan nagmugna og tinguha ngari kanato sa paghatag og mga gasa ngadto Kaniya.
Iya kitang gisultihan kon unsa ang atong ikahatag Kaniya nga makahatag Kaniya og hingpit nga kalipay. Una, kita, pinaagi sa hugot nga pagtuo Kaniya, makahatag og masulub-on nga kasingkasing ug mahinulsulon nga espiritu. Mahimo kitang maghinulsol ug mohimo sa sagradong mga pakigsaad uban Kaniya.
Ikaduha, kamo makahatag Kaniya sa gasa sa paghimo alang sa uban kon unsa ang buot Niyang buhaton alang kanila. Adunay taas nga lista sa mga posibilidad sa basahon ni Mateo. Diha atong mabasa ang mga pulong gikan sa Manunubos, nga gipangandoy natong tanan nga madungog ug ipanulti kon Siya ato nang makita human niining kinabuhia:
“Ug kaniya motubag ang mga matarung nga manag-ingon, Ginoo, kanus-a ba kami makakita kanimo nga gigutom ug amo ikawng gipakaon, o giuhaw ug amo ikawng gipainom?
“Ug kanus-a ba kami makakita kanimo nga nadumuloong ug amo ikawng gipasaka, o hubo ug amo ikawng gibistihan?
“Ug kanus-a ba kami makakita kanimo nga nagmasakiton o nabilanggo ug amo ikawng giduaw?
“Ug kanila motubag ang Hari nga magaingon, Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:37–40).
Niadto nga mga pulong giklaro sa Ginoo unsa nga mga gasa ang atong ikahatag Kaniya gikan sa atong pasalamat. Ang kada buhat sa kaayo ngadto ni bisan kinsa mahimong kaayo ngadto Kaniya tungod kay Siya nahigugma sa tanang mga anak sa Langitnong Amahan. Ug tungod kay makahatag kini og kalipay ngadto Kaniya, makahatag usab kini og kalipay sa Iyang Amahan, kinsa atong nautangan og pasalamat nga walay sukod.
Paghulagway sa litrato pinaagi ni Christina Smith
Daghan kaninyo ang mangita og mga paagi sa panahon sa Pasko sa paghatag og pagkaon ngadto sa mga tawo nga gigutom. Kon buhaton ninyo, makahatag kamo og kalipay sa Ginoo. Gani siya mitudlo nato nga dunay paagi sa paghatag og mas bililhon ug malungtarung gasa. Siya miingon “Ako mao ang tinapay nga nagahatag og kinabuhi; siya nga moari kanako dili gutumon; ug siya nga mosalig kanako dili gayud uhawon.” Juan 6:35 Uban sa tanang kaayo nga atong ihatag alang Kaniya, ang labing importante nga atong ikatanyag mao ang pagtudlo niadtong atong gimahal ug gialagaran ngadto Kaniya ang bugtong tinubdan sa kinabuhing dayon.