Unsa ang mahitungod sa Dating?

Ni Larry M. Gibson

Unang Magtatambag sa Kinatibuk-ang Kapangulohan sa Young Men

Ang pagpakig-atubang sa ubang mga tawo gikinahanglan aron sa paglig-on og tinud-anay nga panaghigalaay.

Samtang duna koy pribelihiyo sa pagpakigsulti sa batan-ong mga lalaki ug batan-ong mga babaye sa tibuok Simbahan, kanunay akong makadungog nga samtang daghan kaayo kaninyo ang interesado sa paghimo og mas maayo nga panaghigalaay uban sa kaatbang nga sekso, kasagaran naglisud kamo kon unsaon kana pagbuhat.

Ingon og uban sa tanang social media, mas sayon nga kita magkakonektar kay sa kaniadto. Sa mga paagi, hinoon, ang teknolohiya mamahimong hinungdan nga dili kaayo makahuluganon ang atong mga relasyon. Ang pag-tweet, pag-text, pag-e-mail, ug pagdugang isip higala diha sa internet dili makahimo og maayong relasyon. Ang aktwal nga pagpakig-atubang sa ubang mga tawo gikinahanglan aron sa paglig-on og tinud-anay nga panaghigalaay.

Panahon na alang ninyo, among talagsaong kabatan-onan, sa pagpabalik sa daang kahulugan sa dihang ang batan-ong mga lalaki ug batan-ong mga babaye magkapundok alang sa sosyal nga kasinatian. Nakadungog na tingali mo sa termino; kini nga kasinatian kaniadto gitawag og date.

Mga Tubag sa Frequently Asked Questions [Mga Pangutana nga Kanunayng Gipangutana]

Daghan ninyo ang dunay mga pangutana kabahin sa pagpakig-date ug sa tambag nga gihatag diha sa bag-ong pamphlet Alang sa Kalig-on sa mga Kabatan-onan. Aniay pipila nga gipangutana kanako, uban sa mga tubag gikan niining talagsaong giya nga basahon.

Dili ko sigurado kon andam ba ko nga makig-date. Aduna bay espesyal nga mga rason nganong makig-date ko?

Ang pakig-date importante sa daghang mga rason. Ang Alang sa Kalig-on sa mga Kabatan-onan nagpasabut nga ang pagpakig-date “nagtugot sa usa ka batan-ong lalaki ug batan-ong babaye nga mas magkainilhanay sa usag usa. Sa mga kultura diin ang pagpakig-date gidawat, makatabang kini kaninyo sa pagkat-on ug pagpraktis sa sosyal nga mga kahanas, pagpalambo og panaghigalaay, paglingaw-lingaw sa tinarung nga paagi, ug sa katapusan makakita og mahangturong kauban.”¹

Nakadungog kita nga kita kinahanglang dili makig-date sa dili pa kita moabut og 16 anyos ug dili magseryoso sa pagpakig-date ni bisan kinsa samtang bata pa kita. Ngano man?

Ang Alang sa Kalig-on sa mga Kabatan-onan nag-ingon: “Kinahanglan nga dili kamo makig-date hangtud kamo moabut og labing minus 16 anyos. Kon kamo magsugod sa pagpakig-date, kuyog sa usa o mas daghan pa nga mga kauban. Likaye ang kanunay nga pakig-date sa samang tawo. Ang sayo kaayo nga pag-ugmad og seryoso nga relasyon sa kinabuhi molimitar sa gidaghanon sa laing mga batan-on nga inyong ikahimamat ug tingali mahimong mosangput sa imoralidad.”²

Usa ka batan-ong lalaki gustong makig-date kanako, apan wala nako batia nga siya dunay sama nga mga sumbanan nako. Unsay akong buhaton?

Ang Alang sa Kalig-on sa mga Kabatan-onan, nagtudlo: “Pilia nga makig-date lamang niadtong kinsa adunay taas nga moral nga mga sumbanan ug kansang pakigkuyog makapatunhay sa inyong mga sumbanan. … Magmabination ug magmatinahuron sa kanunay kon mohangyo kamo sa pagpakig-date o kon kamo modawat o mobalibad niini.”³

Usahay wala koy mahunahunaan nga bisan unsa nga mga ideya alang sa mga date gawas sa pagtan-aw og sine. Unsay akong buhaton?

Ang Alang sa Kalig-on sa mga Kabatan-onan mihatag niining makatabang nga mga baruganan: “Pagplano og mga kalihokan sa pagpakig-date nga luwas, positibo, ug dili gasto ug makatabang kaninyo nga makaila sa usag usa. Adto lamang sa mga dapit diin kamo makapadayon sa inyong mga sumbanan ug magpabilin nga duol sa Espiritu.”⁴

Kadtong upat nga yanong kriterya—mga pakig-date nga luwas, positibo, dili mahal, ug diin ang Espiritu magpabilin nga duol—maghatag og daghang talagsaong mga pakig-date.

Samtang ako namalandong sa among unang mga kasinatian sa pagpakig-date uban sa akong asawa, kadtong nindot kaayo mao kadtong mga panahon diin gamay o walay gasto, sa dihang kami uban sa laing usa ka parisan, ug nga kami adunay makahuluganon nga mga panag-istoryahanay ug inter-aksyon.

Pagpanalipod sa Hiyas sa Usag Usa

Tuguti ko nga motapos uban sa laing importante nga kinutlo gikan sa Alang sa Kalig-on sa mga Kabatan-onan ug dayon katapusan nga punto. Una, “Hinumdumi nga ang usa ka batan-ong lalaki ug usa ka batan-ong babaye nga nag-date responsable sa pagpanalipod sa dungog ug hiyas sa usag usa.”⁵ Kon mag-date mo, siguroha nga wala moy buhaton nga inyong ikaulaw. Sama sa gitudlo ni Presidente Thomas S. Monson, “Sa pagpakig-date, tahura ang inyong ka-date, ug dahuma nga ang inyong ka-date mopakita sa samang pagtahud kaninyo.”⁶

Ang Kalainan Tali sa Pagpakig-date ug Pagpangulitawo

Sa katapusan, bisan kon ang uban mihatag og kahulugan sa pagpakig-date nga “pagpangulitawo”, ang pagpakig-date diha sa Simbahan sa mga kabatan-onan wala magpasabut nga “manag-uyab” na o dili na maka-date sa uban. Base sa mga sumbanan sa Simbahan, ang pagpakig-date gitumong nga usa ka kahigayunan alang sa sosyal nga relasyon nga makaestablisar og daghang mga panaghigalaay.

Sa inyo nang pagsugod sa pagkahamtong—human sa mga misyon sa batan-ong mga lalaki—nan ang Ginoo moingon, “Hinoon, diha sa Ginoo ang babaye dili gawas sa lalaki ni ang lalaki gawas sa babaye” (1 Mga Taga-Corinto 11:11). Mao kini ang panahon nga ang pagpakig-date mahimong pagpangulitawo nga gipasabut sa Alang sa Kalig-on sa mga Kabatan-onan: “Hatagi og taas nga prayoridad ang pagpakig-date ug ang pagminyo. Pangita og usa ka kauban kinsa takus nga moadto sa templo aron mabugkos nganha kaninyo alang sa karon ug sa tibuok kahangturan. Ang pagminyo sa templo ug pagmugna og mahangturong pamilya mahinungdanon sa plano sa kalipay sa Dios.⁷