Ko ha Palani maʻa Homau Fāmilí
“ʻE lava ke fakataha ʻa e ngaahi fāmilí ʻo taʻengata ʻi he palani ʻa e Tamai Hēvaní” (Children’s Songbook, 188).
Ne u tangutu pē he mohenga ʻo e fineʻeikí mo e tangataʻeikí ʻo ʻofa lahi kiate kinaua, mo e tatangi ʻa e telefoní.
Naʻe pehē mai e tangataʻeikí, “ʻE Līvai. Mateʻi mai pe ko e hā. Naʻe fāʻeleʻi ho kiʻi tuofefine ko Nolá ʻanehoʻatā!”
Naʻe lava pē ke u tala e fiefia ʻa e tangataʻeikí, ka naʻe ongo faikehe mai hono leʻó—hangē naʻe ʻi ai ha meʻa naʻe hohaʻa ki aí.
Ne u ʻeke ange. “ʻOku lahi fēfē?” mo ʻeku fifili pe ne u fie maʻu moʻoni koā ke u ʻiloʻi e talí.
Ne ʻai e kiʻi longo ʻa e tangataʻeikí. Naʻá ne pehē mai, “Kiʻi lahi siʻi hake pē he pāuni ʻe uá (kk ʻe 0.9). Naʻe mahino lelei mai ʻeni ʻa e hohaʻa hono lotó. Naʻe totonu ke fāʻeleʻi ʻa Nola he taimi Kilisimasí, ka ko Sepitema pē ʻeni. Ne hoko atu e fakamatala ʻa e tangataʻeikí. “ʻOkú ne siʻisiʻi ʻaupito. Līvai, manatuʻi ke ke fai ha lotu maʻana. Pea lotua foki mo kimaua ke ma lava ʻo falala ʻoku ʻafioʻi ʻe he Tamai Hēvaní ʻa e meʻa ʻoku lelei taha maʻa hotau fāmilí.”
ʻI heʻeku tāpuniʻi e telefoní, ne u ʻalu ki peito ʻo toʻo mai ha tangai piini naʻe palani e fineʻeikí ke ngaohi ʻaki ha supo. Naʻe ʻasi he kofukofú naʻe meimei mamafa tatau pē ia mo Nola he taimí ni. Ne u pukepuke ia ʻi hoku nimá mo feinga ke u sio loto atu pe ʻoku hā fēfē ha kiʻi pēpē ʻoku lahi tatau pē mo ia.
Ne u manatuʻi e meʻa ne u ako ʻo kau ki he maama fakalaumālié mo e palani ʻo e fakamoʻuí peá u fakakaukau, “Naʻe toki nofó ni pē hono laumālié mo e Tamai Hēvaní.” Naʻá ku ʻiloʻi kapau ʻe mate ʻa Nola, te mau toe sio pē ki ai he kuo ʻosi silaʻi kotoa kimautolu ko ha fāmili. Ka naʻá ku toe ʻamanaki pē foki te ne nofo mo kimautolu ʻi māmani.
ʻI he ngaahi māhina siʻi hono hokó, naʻe lahi e ʻalu ʻa e ongomātuʻá ki fale mahakí. Naʻe haʻu ʻeku kuifefiné mo e kuitangatá ki homau ʻapí ke tokoni ʻi hono tokangaʻi au mo hoku ngaahi tokoua mo e tuofāfine iiki angé. Naʻe ʻaukai mo lotu e uōtí maʻa homau fāmilí, pea taimi ʻe niʻihi naʻe ō ange ha kau fefine lelei mei he Fineʻofá mo ʻemau meʻakai ki he efiafí. Naʻe fie ʻilo ʻa e tokotaha kotoa pē pe naʻe fēfē ʻa Nola.
ʻI he efiafi ʻe taha, naʻe ui kotoa kimautolu ʻe he fineʻeikí mo e tangataʻeikí ki he loki talanoá. Naʻe talamai ʻe he tangataʻeikí te na ō mo e pīsope ʻo faingāue kia Nola. Hili e mavahe atu ʻa e tangataʻeikí ʻi hono sutí mo e hēkesí, naʻe fakatahatahaʻi kotoa mai kimautolu ʻe he fineʻeikí ke mau takatakai he seá ʻo fai ha lotu.
Naʻe lotu ʻa e fineʻeikí, “Fakamolemole ʻo tāpuakiʻi e tangataʻeikí ʻi heʻene faingāue kia Nolá.” Naʻe ongo vaivai ange hono leʻó. “Pea fakamolemole muʻa, kapau ko Ho finangaló ia, pea tuku muʻa ke ne haʻu ki ʻapí ni pea ke ne moʻui lelei.”
ʻI he fai ʻemau lotú, naʻe lava ke u ongoʻi ʻa hono fakafonu ʻe he Laumālie Māʻoniʻoní ʻa e lokí ʻaki ʻa e melino mo e ʻofa. Hangē ia naʻe talamai ʻe he Tamai Hēvaní kiate au, ko e hā pē ha meʻa ʻe hoko kia Nola, ko e konga kotoa pē ia ʻo ʻEne palaní.
Naʻe foki mai e tangataʻeikí kimui ange he poó ʻo talamai naʻe hoko ha meʻa fakaofo ʻi he fale mahakí. Naʻe faʻa longoaʻa maʻu pē mo leʻolahi e loki ʻo Nolá. Naʻe lahi e ngaahi mīsiní ai mo e ngaahi monitoa naʻe ʻi ai e ngaahi meʻa fakatokangá pea ulo lahi honau ngaahi māmá, pea naʻe fakatovave holo maʻu pē e kau nēsí mo e kau toketaá ke tokoni ki he fanga kiʻi pēpē iiki naʻe ʻi aí. Ka ʻi he aʻu atu ʻa e tangataʻeikí mo e pīsopé, naʻe kehe ia. Naʻe fakalongolongo kotoa e ngaahi mīsiní. Naʻe tangutu pē e kau nēsí he tafaʻaki ʻo e fanga kiʻi pēpeé ʻo fai haʻanau lautohi pe tokangaʻi kinautolu. Naʻe lava ke faingāue ʻa e tangataʻeikí mo e pīsopé kia Nola ʻo ʻikai ha meʻa ke fakahohaʻasi kinaua.
ʻOku ʻikai te u ʻiloʻi pe ʻe tupu hake ʻa Nola ʻi māmani pe ko ʻene foki ʻi ha taimi vavé ni pē ke nofo mo e Tamai Hēvaní. Ka ʻoku ou ʻiloʻi ʻoku fanongo mai mo tali ʻe he Tamai Hēvaní ʻetau ngaahi lotú, pea ʻoku ou ongoʻi ʻa e melino ʻi he taimi ʻoku ou manatuʻi ai ʻoku ʻi ai ʻEne palani maʻá e mēmipa kotoa pē ʻo hoku fāmilí.
Ngaahi tā fakatātā ʻa Ben Simonsen