ʻI he Siasí Fakakātoa

ʻAho Ngāue Tokoni Fakataʻu hono Ono ʻi ʻAfiliká kātoa

Ne fakatahataha mai ʻi he ʻaho Tokonaki, 18 ʻo ʻAokosi 2012, ha Kāingalotu ʻe lauiafe ʻi honau tukui koló ʻi ha ngaahi fonua ʻi ʻAfilika ne laka hake he onó, ke kau ki he ʻAho Nima Fietokoni ʻa e Māmongá hono onó ʻi ʻAfilika kātoa, ʻa ia ʻoku fakahoko fakataʻu.

Naʻe tohi ʻa ʻEletā C. Teli Uona, ko e faifekau ʻi he fetuʻutaki mo e kakaí ʻi ha ʻī-meili ʻo pehē, “Ne ʻalu atu e ngaahi uōtí mo e ngaahi koló fakakātoa ke fakahoko ha ngāue tokoni mahuʻinga. Ne nau uki mai ha ngaahi hoa ngāue; naʻa nau fili e ngaahi ngāue ko ia naʻe mahuʻinga tahá, neongo hono faingataʻá. Ne tokolahi ʻaupito e haʻu ko e fie tokoní, pea naʻa nau fakakaungāmeʻa moʻoni maʻá e Siasí.”

Ko e fakamatala ʻeni ʻa ʻEletā ʻAtesina J. ʻOlukani, talēkita ʻo e fetuʻutaki mo e kakaí maʻá e ʻĒlia ʻAfilika Hihifó ʻo kau ki he ʻaho ngāue tokoní, “Ko e founga faingofua taha ia ʻe lava ke tau tali ʻaki ki he ui ʻa e palōfitá ke angaʻofa ki hotau kaungāʻapí, ke tokoni ki heʻenau fie maʻú, ke foaki atu kae ʻikai ko e maʻu mai. Ko e founga faingofua taha ia ke malanga ʻaki e ongoongoleleí—ʻi he faʻifaʻitakiʻanga.”

Fakaʻaongaʻi e Lea Fakafonua ʻe 20 he Mormon.org he Taimí ni

ʻOku maʻu he taimí ni e Mormon.org ʻi he lea faka-ʻAmēniá, Sepuano, Siaina, Hōlani, Pilitānia, Falanisē, Siamane, ʻInitonēsia, ʻĪtali, Siapani, Kōlea, Lativia, Pōlani, Potukali, Lūsia, Sipeini, Sueteni, Takāloka, Taileni, mo e faka-ʻIukuleini.

ʻOku poupouʻi e kakaí fakafoʻituituí ke faʻu ʻenau fakamatala fakatāutahá ʻi he Mormon.org ʻi he lea fakafonua ʻoku nau fie maʻú pea vahevahe ia mo e niʻihi kehé.

Lolotonga e kau atu ʻa e kāingalotu ʻo e Siasí ki he Nima Fietokoni ʻa e Māmongá ʻi ha ngaahi ngāue ʻi ʻAfilika kātoa, naʻa nau fakahoko ai ha tokoni mahuʻinga, faʻufaʻu ha ngaahi vā fetuʻutaki mo e ngaahi tui fakalotu kehé, fakatupu hano fakatokangaʻi ʻo e Siasí, pea langa hake ʻenau ngaahi fakamoʻoni ki he ʻofa faka-Kalaisí.

Faitā ʻa TJ Thomas