ʻOku Fakahoko ʻe he Siasí ʻa e Nāunau Fakalēsoni Foʻou maʻá e Toʻu Tupú ki he 2013
ʻE kamata he māhiná ni hono fakahoko kakato ʻe he kau faiako mo e kau taki ʻi he Siasí kotoa ʻa e nāunau fakalēsoni foʻou maʻá e toʻu tupú ko e, Haʻu ʻo Muimui ʻIate Au: Ko ha Maʻuʻanga Tokoni Fakaako maʻá e Toʻu Tupú, ʻa ia ne ʻuluaki fakahā ʻi ha tohi ʻa e Kau Palesitenisī ʻUluakí ʻi Sepitema.
ʻE lava ke maʻu ʻe he kau faiako mo e kau taki ʻo e Kau Finemuí, Lakanga Taulaʻeiki Faka-ʻĒloné, mo e Lautohi Faka-Sāpaté e ngaahi lēsoní ʻi he lea fakafonua ʻe 23 ʻi he lds.org/youth/learn, ʻE lava ke paaki kotoa e ngaahi lēsoní. ʻOku totonu ke fetuʻutaki ʻa kinautolu ʻoku ʻikai haʻanau ʻInitanetí ki heʻenau taki lakanga fakataulaʻeiki fakalotofonuá ke ʻiloʻi pe ʻe founga fēfē hono fakahoko ʻo e Haʻu ʻo Muimui ʻIate Aú ʻi honau feituʻú.
ʻOku pehē ʻi he tohi ʻa e Kau Palesitenisī ʻUluakí, “[ʻOku fakatahaʻi ʻe he nāunau fakalēsoni foʻoú e ngaahi tefitoʻi tokāteline ʻo e ongoongoleleí pea pehē ki he ngaahi tefitoʻi moʻoni ʻo e faiako ʻi he founga ʻa e Fakamoʻuí.] ʻOku mau falala te [ne] faitāpuekina e toʻu tupú ʻi heʻenau feinga ke ului kakato ki he ongoongolelei ʻo Sīsū Kalaisí.
ʻI he Haʻu ʻo Muimui ʻIate Aú, ʻoku vahe ha tefito fakatokāteline ki he māhina takitaha ʻo e taʻú, pea ʻe ako ʻe he ngaahi kalasi kotoa ʻo e Lautohi Faka-Sāpaté, Kau Finemuí, mo e Lakanga Taulaʻeiki Faka-ʻĒloné ʻa e tefito ko iá ʻi he māhina ko iá.
ʻOku konga fā e lēsoni takitaha: teuteu fakalaumālie maʻá e kau faiakó, ngaahi fakakaukau ke fakafeʻiloaki ʻaki e tefitó, ngaahi fakakaukau pau ki ha ʻekitivitī, mo ha konga ke fakaafeʻi e toʻu tupú ke fai ha ngāue. ʻOku kole ki he kau faiakó ke fekumi ki he ueʻi ʻa e Laumālié ʻi hono fili mo liliu e ngaahi lēsoní ke feʻunga ʻo makatuʻunga ʻi he ngaahi fie maʻu ʻa ʻenau kau akó.
ʻOku ʻi he uepisaití foki ha ngaahi vitiō ʻaonga ʻoku nau fakamatalaʻi e founga fakahoko ʻo e nāunau fakalēsoni foʻoú, ngaahi fakakaukau ki hono teuteu ʻo ha ngaahi ʻekitivitī ako fakamānako, mo ha tohi fakahinohino foʻou ko e, Akoʻi e Ongoongoleleí ʻi he Founga ʻa e Fakamoʻuí.
Caption
Credit