Ne Tupukoso Pē Nai ʻEmau Fetaulakí?

Palesiteni Thomas S. Monson, “Fakakaukau ki he Ngaahi Tāpuakí,” Liahona, Nōvema 2012, 88.

ʻI ha pō Tokonaki mokoʻīʻī ʻe taha he lolotonga ʻo e faʻahitaʻu momoko ʻo e 1983–84, ne ma fononga meʻalele ai mo Sisitā Monisoni ʻi ha ngaahi maile ki he teleʻa he tafamoʻunga Mitiuei ʻi ʻIutā, he ʻoku ʻi ai ha ma ʻapi. Ko e momoko he pō ko iá naʻe maʻulalo ʻaki e tikilī ʻe 24 Fahrenheit (–31°C), pea naʻá ma loto ke fakapapauʻi naʻe lelei e meʻa kotoa ʻi homa ʻapi ko iá. Naʻá ma vakaʻi ʻo ʻilo ʻoku lelei pē, peá ma mavahe leva ke foki mai ki Sōleki Siti. ʻI heʻema meimei aʻu pē ki he hala lahí kuo mate ʻema kaá. … Ne ma mātuʻaki faingataʻaʻia. …

Naʻá ma kamata lue māmālie leva ki he kolo ofi tahá, kae fakalaka hake pē ngaahi kaá. Fāifai pea tuʻu ha kā, pea loto ha talavou ke tokoni mai. … Naʻe ʻave kimaua ʻe he talaovu angaʻofá ni ki homa ʻapi ʻi Mitiueí (Midway). Naʻá ku feinga ke totongi ia … , ka … naʻá ne pehē ko ha Boy Scout ia pea naʻe loto ke fai ha lelei. Naʻá ku talaange leva au ki ai peá ne talamai ʻene fiefia ke tokoní. ʻI heʻeku fakakaukau ʻoku ʻi he taʻu ngāue fakafaifekaú, naʻá ku ʻeke ange ai pe ʻoku palani ke ngāue fakafaifekau. Naʻá ne talamai ʻoku ʻikai ke ne fakapapauʻi pe ko e hā te ne fie faí.

ʻI he pongipongi Mōnite hono hokó naʻá ku fai ai ha tohi ki he talavou ko ʻení ʻo fakamālō ange ʻi heʻene angaʻofá. Naʻá ku poupouʻi ia ʻi he tohí ke ngāue fakafaifekau taimi kakato. …

Hili nai ha uike ʻe taha mei ai kuo telefoni mai e faʻē ʻa e talavoú ʻo fakahā mai ko ha talavou lelei ʻene tamá ka koeʻuhí ko ha faʻahinga mālohi ʻoku hoko heʻene moʻuí, kuo hōloa ai ʻene fakaʻamu fuoloa ke ngāue fakafaifekaú. Naʻá ne talamai naʻe faʻa ʻaukai mo ʻene tamaí pea mo lotu ke liliu hono lotó. Naʻá na ʻosi fokotuʻu hono hingoá ʻi he lisi lotu he Temipale Polovo ʻIutaá. Naʻá na fakaʻamu, pehē ange mai ʻe ʻi ai ha founga, ʻe liliu ai hono lotó. … [Naʻá ne loto] keu ʻiloʻi ʻokú ne lau ʻa e meʻa ne hoko ʻi he pō momoko ko iá ko ha tali ʻo ʻena lotua iá. Naʻá ku talaange, “ʻOku ou tui ki ai.”

Hili ha ngaahi māhina pea lahi ange fetuʻutaki mo e talavou ko ʻení, kuó ma fiefia lahi mo Sisitā Monisoni ke kau he polokalama fakamāvae ʻa e faifekaú ni ʻi heʻene mavahe ke ngāue he Misiona Kānata Venikuvá.

Naʻe hoko noa pē nai ʻemau fetaulaki he pō momoko ko ia ʻo Tīsemá? ʻOku ʻikai ke u teitei tui ki ai. Ka, ʻoku ou tui ko ʻemau fetaulakí ko ha tali ia ʻo e lotu ongo ʻo e lotó ʻa ha faʻē mo ha tamaí maʻá e foha naʻá na fakamahuʻingaʻí.

Fakakaukau ke hiki hoʻo ngaahi fakakaukaú ʻi hoʻo tohinoá pe aleaʻi ia mo ha niʻihi kehe.