ʻE Lava ke Foaki Mai Haku Tāpuaki?
ʻAti Kuleita, Niu ʻIoke, USA
ʻI he ngaahi taʻu lahi kuo hilí, ne u ʻalu ai mo Misa Saafi, ko ha tangata ne u faiako fakaʻapi ki ai, ke foaki ha tāpuaki fakataulaʻeiki ki hono uaifí ʻi fale mahaki pea toki fai hono tafá. Naʻe loki fakataha ʻa Sisitā Saafi mo ha fefine ko Ane Lita, ko ha taha naʻe moʻua he kanisaá pea he ʻikai pē ke toe sai pea naʻe ʻikai ha ʻamanaki ia ʻe toe fuoloa atu ʻene moʻuí.
Ne u ala atu ke toho e puipui he vahaʻa ʻo e ongo mohengá kae toki kamata foaki e tāpuakí, ka naʻe ʻai ʻeku tuʻu. Naʻe ʻikai ke u loto ke taʻe fakakau ki ai ʻa Ane, ko ia ne u fakamatalaʻi ange e meʻa te ma faí mo fehuʻi ange pe te ne fie sio he foaki tāpuakí. Naʻá ne talamai ʻio. Kuo mālōlō hono husepānití pea naʻá ne faifekau ʻi ha tui fakalotu ʻe taha, pea naʻá ne fie ʻilo ki he meʻa naʻa tau tui ki aí. Ne hoko atu ʻema foaki tāpuaki mo Misa Sāfí kae fanongo pē ʻa Ane.
Hili ha ngaahi ʻaho siʻi mei ai, kimuʻa pea ʻatā ʻa Sisitā Saafi mei fale mahakí, naʻe kole ange ʻa Ane pe ʻe lava ke foaki ange muʻa mo hano tāpuaki fakataulaʻeiki. Ne ma foki fiefia atu mo Misa Saafi ki fale mahaki ke foaki hono tāpuakí. Naʻe ʻikai sai e kanisā ʻo Ané, ka naʻe fakalakalaka lahi ʻene moʻuí.
Naʻá ne fie ʻilo lahi ange ki he ongoongoleleí, ko ia ne u kole ki he ongo faifekaú ke na ō mai ki fale mahaki ʻo akoʻi ia. Naʻá ne fakaava hono lotó ʻi heʻene fanongo ki he pōpoaki ʻo e ongoongoleleí peá ne fili ke papitaiso ia. Hili hono papitaisó ne ma ō ki fale mahaki ʻi he uike kotoa pē ke ʻave ʻa Ane ki he lotú ʻi hono sea teketeké.
Naʻe faingataʻa ke ʻalu holo ʻa Ane koeʻuhi ko ʻene puké, ka naʻe vave pē ʻa e founga naʻá ne maʻu ke ne ngāue ai maʻá e ʻEikí. Naʻá ma ʻoange ʻene mīsini taipe pea naʻá ne fakamoleki ha ngaahi houa lahi ʻi he ʻaho kotoa pē ʻi fale mahaki ʻi hono fai ʻo e hisitōlia fakafāmilí. Naʻe lōloa e moʻui ʻa Ané ʻaki ʻa e taʻu ʻe tolu ʻi he taimi naʻe ʻamanaki te ne moʻui aí, pea naʻá ne teuteuʻi ha ngaahi hingoa fakafāmili ʻe laungeau ki he temipalé peá ne toki mālōlō.
Hili e mālōlō ʻa Ané, naʻe fai ʻe Sisitā Saafi e ngāue fakafofonga he temipalé maʻá ha tokolahi ʻo e kakai fefine ko e ngaahi kui ʻa Ané.
Ko ʻeku ʻiloʻí, ko Ane tokotaha pē ʻi hono fāmilí naʻe kau ki he Siasí. Naʻe ʻikai ʻaupito pē tokanga hono fāmili naʻe moʻuí ki heʻene kau mo ngāue ʻi he Siasí, ka ʻoku ou ʻilo fakapapau naʻe hounga ki he tokolahi ʻo hono fāmili kuo pekiá ʻa e ngāue fakafofonga naʻe fai maʻanautolú.
ʻOku ʻikai ke tau teitei ʻiloʻi pe ʻoku mateuteu e kakai ʻoku tau feʻiloaki mo iá ke tali e ongoongoleleí. ʻOku ou fakamālō ne u lava ke u mamata ki ha tenga—ʻa ia ne tō ʻi he loto ʻo Ané hili ʻene mamata ʻi hono foaki ha tāpuaki fakataulaʻeiki—pea tupu moʻui ia ʻo faitāpuekina ai ha laungeau ʻo e fānau ʻa e Tamai Hēvaní.