Fale ʻe 2 Naʻe Nofo Ai ʻa Siosefa Sāmitá

Fai ʻe Jan Pinborough

Ngaahi Makasini ʻa e Siasí

Haʻu ʻo vakai holo ʻi ha feituʻu mahuʻinga ʻi he hisitōlia ʻo e Siasí!

Ko Palemaila, ʻi Niu ʻIoké, ʻa e feituʻu naʻe kamata ai ʻa hono Toe Fakafoki Mai ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi he taʻu ʻe 193 kuohilí. Naʻe ʻaʻahi ʻa Luke, Lesieli mo Sūlia S. ki he feituʻu makehe ko ʻení ke ʻilo ha meʻa lahi ange kau ki he feituʻu naʻe nofo ai ʻa e Palōfita ko Siosefa Sāmitá mo e founga naʻá ne tokoni ai ki hono toe fakafoki mai ʻo e Siasí ki māmaní.

Ko e Fale ʻAkaú

Naʻe langa e fale ʻakau ko ʻení ke ʻasi tatau pē mo e fale naʻe nofo ai ʻa Siosefa mei hono taʻu 12 ki he 19.

1.Naʻe ʻi ai e ngaahi tokoua ʻe toko nima mo e tuofāfine ʻe toko tolu ʻo Siosefa. Ko ha kiʻi fale siʻisiʻi ia ki ha kakai ʻe toko 11!

2.Naʻe faʻa nofo takatakai e fāmilí he tēpile ʻi he peitó ke lau e Tohi Tapú. ʻI he taʻu 14 ʻa Siosefá, naʻá ne lau ʻa e Sēmisi 1:5: “Ka ai hamou taha ʻoku masiva he potó, ke kole ʻe ia ki he ʻOtuá.” Naʻe ʻi ai haʻane fehuʻi mahuʻinga ke fai ki he ʻOtuá.

3.Naʻe ʻalu hengihengia ʻa Siosefa ʻi he ʻaho ʻe taha he faʻahitaʻu failau ʻo e 1820 ki ha vao ʻakau ofi pē ki hono fale ʻakaú ʻo lotu pe ko e siasi fē naʻe totonu ke ne kau ki aí. Naʻe hā mai ʻa e Tamai Hēvaní mo Sīsū Kalaisi ʻo talaange ke ʻoua naʻa kau ki ha taha ʻo e ngaahi siasí. Naʻe talaange ʻe Sīsū ʻe tokoni ʻa Siosefa ki hono toe fakafoki mai ʻo e Siasi ʻo e ʻEikí ki he māmaní.

4.Naʻe mohe kotoa e fānau tangata ʻe toko ono he fāmilí ʻi ha loki ʻi ʻolunga. ʻI ha pō ʻe taha he taʻu 17 ʻa Siosefá, naʻe hā tuʻo tolu mai e ʻāngelo ko Molonaí ʻo fakahā ange ʻa e ngaahi peleti koula ʻe liliu ʻe Siosefa pea pulusi ko e Tohi ʻa Molomoná. Naʻe maʻu ʻe Siosefa e ngaahi peletí hili ha taʻu ʻe fā mei ai.

Ko e Fale Papá

ʻI he taʻu 19 ʻa Siosefá, naʻe hiki hono fāmilí ki ha fale foʻou. Naʻá ne nofo ai ʻi he taimi naʻá ne maʻu ai e ngaahi peletí mei he Moʻunga ko Komolá.

5.Naʻe ō mai ha kakai ʻo feinga ke kaihaʻasi e ngaahi peletí. Naʻe fufuuʻi kinautolu ʻe Siosefa ʻi lalo ʻi he ngaahi foʻi piliki ʻi muʻa he tafuʻanga afi ko ʻení.

6.Naʻe mohe e ongo tuofāfine ʻo Siosefa ko Sōfolonia mo Kataliná ʻi he kiʻi loki mohe siʻisiʻi ko ʻení. Naʻe kofukofuʻi ʻe Siosefa e ngaahi peletí ʻaki ha tupenu he pō ʻe taha ʻo fufuuʻi he vahaʻa ʻo e ongo tamaiki fefiné ʻi hona mohengá.