Kae ʻOua Ke Tau Toe Feʻiloaki
Ko e Lēsoni Miniti-ʻe-Nimá
Naʻá ku tōmui ki he fakanofonofó ʻaki ha miniti pē ʻe nima. Meʻa ní ʻe taʻofi au ʻe ha kiʻi taimi pehē mei heʻeku kau atu ki heʻeku tānaki tuʻunga ʻosi mei he ʻunivēsití.
ʻI he fakaʻosinga ʻo hoku taʻu fakaʻosi ʻi he ʻunivēsití, naʻe fie maʻu ke u kau atu ki ha tānaki tuʻunga ʻa ia ʻe maʻu ai ʻe he kau tānaki tuʻunga foʻoú honau mataʻitohí mei ha tokotaha ne ʻaʻahi fakapuleʻanga mai pea nau tui e teunga angamahení ko ha tatā mo ha pulupulu. Naʻá ku nofo ʻo ʻamanaki atu ki he momeniti ko ʻení, ko ha kātoangaʻi ʻo ha ngaahi taʻu ako faingataʻa ʻe fā. Naʻá ku maʻu ha tohi mei he ʻunivēsití ʻi he pongipongi ʻo e kātoangá, ka naʻe ʻikai ke u fakaava ia.
Naʻe kamata ʻa e ouau fakalāngilangí ʻi he 1:30 hoʻataá, pea ne u ʻosi aleaʻi ke fai ha faitā kimuʻa pea kamatá. Ko e meʻapangó, naʻe ʻi ai ha laine lōloa ki he faitaá, peá u vakai atu ki he uasí kuo ofi e taimi ke kamata ai e polokalama tānaki tuʻungá. Ka kuo fuoloa ʻeku tatalí peá u kīkīvoi pē ke ʻai hoku taá. Ne faifai pea ʻosi kuo toe pē ʻa e miniti ʻe 10 pea kamata e tānaki tuʻungá, naʻá ku lele atu leva ki he holó.
ʻI he taimi naʻá ku aʻu atu aí, kuo tāpuni e matapaá ia pea ʻi ai mo ha kau tangata leʻo. Naʻá ku kole ange ke u hū ki loto, ka naʻe ʻikai tali ʻe he kau leʻó, ʻo nau talamai naʻe pau ke u ʻi heni ʻi ha miniti ʻe 15 ki muʻa ʻi he fakanofonofó. Ko e fuofua taimi ia naʻá ku fanongo ai ki ha faʻahinga tuʻutuʻuni pehē, pea ne u fakafekiki mo kinautolu. Ka naʻe ʻikai ʻunua ai e kau tangata leʻó. Naʻá ku ngāue ʻi ha taʻu ʻe fā ke maʻu ai ʻa e mataʻitohi ko ʻení, pea naʻe ʻikai te u lava ke maʻu ia ʻi he ouau fakalāngilangí. Naʻe pau ke u tangutu ʻi he nofoʻanga ʻi ʻolungá fakataha mo e kau mamatá.
ʻI he taimi naʻá ku foki ai ki ʻapí ʻo fakaava hake ʻa e tohi naʻá ku maʻu ʻi he pongipongi ko iá, naʻá ku lau ha fakahinohino mahino ʻaupito ke u ʻi hoku nofoʻangá ʻi ha miniti ʻe 15 kimuʻa, ka ʻikai he ʻikai ngofua ke u hū ki loto. Naʻá ku ongoʻi ʻo hangē ko ha taha e kau tāupoʻou vale ʻi he talanoa fakatātā ʻa e Fakamoʻuí:
“Pea lolotonga ʻenau ʻalu [ʻa e kau tāupoʻou valé] ke fakataú, mo ʻene haʻu ʻa e tangata taʻané; pea ko kinautolu naʻe teuteú naʻe hū mo ia ki he taʻané: pea tapuni ʻa e matapaá.
“Hili iá, mo ʻene haʻu foki ʻa e kau tāupoʻou naʻe ʻalú, ʻo nau pehē, ʻEiki, ʻEiki, toʻo kiate kimautolu.
“Ka naʻe lea ia, ʻo pehēange, ʻOku ou tala moʻoni atu kiate kimoutolu, ʻoku ʻikai te u ʻiloa kimoutolu” (Mātiu 25:10–12).
Neongo ʻe ngali ne tōtuʻa e nunuʻa ʻo ha fehalaaki siʻisiʻi pehē ke taʻofi au mei ha kātoanga mahuʻingá, ka ʻoku ou ʻiloʻi ʻoku pehē pē ʻetau ngaahi filí mo e ngaahi nunuʻá. ʻI he taimi ʻoku ou toʻo hake ai ha mui ʻakau ʻe taha ʻo e vaʻakaú mei he kelekelé, ʻoku ou toe toʻo hake ai mo e muiʻi ʻakau ʻe tahá. ʻOku pehē pe ha faʻahinga fili, he ʻoku ʻikai ngata pē ʻi heʻeku fili ʻa e ngāué ka ʻoku kau foki mo e nunuʻa ʻoku muimui mai aí—neongo pe ko e hā e nunuʻa ko iá.
ʻOku fie maʻu ʻe Sētane ke tau tokanga pē ki he ngaahi filí kae tukunoaʻi e ngaahi nunuʻá. ʻOkú ne faʻa fakataueleʻi kitautolu ke tau nofotaha pē ki heʻetau ngaahi fie maʻu fakaesinó, “[ʻa e] holi fakakakanó” (2 Nīfai 2:29), mo e fakafiemālieʻi he taimi pē ko iá.
ʻI he tafaʻaki ʻe tahá, ʻokú finangalo ʻetau Tamai Hēvaní ke nofotaha ʻetau tokangá ki he fiefiá mo e ngaahi tāpuaki taʻengatá. ʻOkú Ne finangalo ke tau fakakaukau ki he ngaahi nunuʻá ʻi he taimi ʻoku tau fakahoko ai e ngaahi filí pea ke hoko e ngaahi nunuʻá ko e konga ia ʻo ʻetau taumuʻa ngāué: “ʻOku nau tauʻatāina ke fili ʻa e tauʻatāiná mo e moʻui taʻengatá, tuʻunga ʻi he Fakalaloa lahi ʻo e faʻahinga kotoa ʻo e tangatá, pe fili ʻa e pōpulá mo e maté.” (2 Nīfai 2:27).
Neongo ʻoku ʻikai ke u houngaʻia ʻi he mole ʻa e faingamālie ki hono maʻu fakalāngilangi hoku mataʻitohí, ka ʻoku ou houngaʻia ʻi hono akoʻi au ʻe he ʻausia ko ʻení ʻi he tuʻunga ʻo e taʻengatá—ke ʻoua naʻá ku teitei fai ha fili te ne taʻofi hono talitali lelei au ʻe he ʻEiki Taʻané. Koeʻuhi ke ʻoua naʻa taʻofi au ʻaki ʻa e “ʻoku ʻikai te u ʻiloa ʻa kimoutolu,” ʻoku ou feinga ke fai ha ngaahi fili te ne ʻai au ke u fanongo ki Haʻane folofola mai, “Hū koe ki he fiefiaʻanga ʻo hoʻo ʻeikí” (Mātiu 25:21).
Faitā ʻe © Photospin