Pīkale, Tēnipi, mo e Fakamoʻoní Ueʻi Fakalaumālie mei he Moʻui mo e Ngaahi Akonaki ʻa Lolenisou Sinoú
ʻI hoʻo ako e ngaahi akonaki ʻa Palesiteni Lolenisou Sinoú he taʻu ní, te ke ʻiloʻi ai ia ko ha palōfita, tangata kikite, mo e tangata maʻu fakahā ʻa ia ʻoku fakaofo e kaunga ʻene faleʻí ki he kuongá ni.
Kapau kuó ke sio ʻi ha tā ʻo Lolenisou Sinou, ʻa e Palesiteni hono nima ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, te ke manatuʻi pē ʻa hono kava tea loloá mo hono fofonga ʻofá. Pea kapau kuó ke tuʻu siʻi hifo ʻo vakavakaiʻi hano tā pehē, mahalo te ke fakatokangaʻi ʻa e fofonga ʻo Palesiteni Sinoú—helaʻia kae ʻikai ongosia, toulekeleka kae fonu ʻi he longomoʻui mo e maama.
Mahalo pē kuó ke fanongo ʻi hono ueʻi ʻo Palesiteni Sinou ke ne malangaʻi e vahehongofulú, pea mahalo ʻokú ke manatuʻi haʻo lau ʻo kau ki ha meʻa toputapu naʻá ne aʻusia ʻi he Temipale Sōlekí.
Ka ʻokú ke ʻiloʻi nai ʻa e meʻa naʻe tupu mei ai e meʻa ko ʻeni naʻá ne aʻusia ʻi he temipalé mo hono olá? ʻOkú ke fie maʻu ke ke ʻiloʻi e talanoa kau ki he fakahā naʻá ne maʻu ʻo kau ki he fono ʻo e vahehongofulú?
Pea fēfē hono ongo kanoʻimatá mo hono fofongá. Hili ha feʻiloaki ʻa ha faifekau ʻo ha tui fakalotu kehe mo Palesiteni Sinou, naʻá ne tohi: Ko hono fofongá ko ha mālohi ia ʻo e melino; ko ʻene ʻi aí ko ha tāpuaki ʻo e melinó. Naʻe ʻikai ke ngata mei he hā ʻi he nonga ʻa hono ongo kanoʻimatá ko e ʻfaiʻanga ia ʻo e lotu liló. … ka ko e nofoʻanga foki ʻo e ivi fakalaumālie. … Naʻe ʻalu hake ʻiate au ʻa e ongo faikehe, ko e potu toputapu ʻeni ʻoku ou tuʻu aí.’”1 Te ke fie ʻilo nai ki he ngaahi fononga, ʻahiʻahi, ikuna, mamahi, fiefia, mo e ngaahi fakahā naʻe fakatahaʻi ke fakatupu ai ha fofonga pehē?
ʻE ako he taʻú ni ʻe he kau Fineʻofá mo e kau maʻu Lakanga Taulaʻeiki Faka-Melekisētekí ʻa e Ngaahi Akonaki ʻa e Kau Palesiteni ʻo e Siasí: Lolenisou Sinou. ʻI hoʻo ako mei he ngaahi akonaki ʻa Palesiteni Sinoú pea aleaʻi ia he lotú pea ʻi ʻapí, te ke ʻiloʻi ai ʻoku ʻikai ko ha tangata mata ʻofa pē ia ʻi ha tā valivali motuʻa. Te ke ʻiloʻi ko ha tangata ia ʻa e ʻOtuá—ko e palōfita, tangata kikite, mo e tangata maʻu fakahā ʻa ia ʻoku fakaofo e fekauʻaki ʻene faleʻí mo e kuongá ni.
Ko ha ngaahi sīpinga pē ʻeni ʻe niʻihi ʻo e ngaahi akonaki mo e ngaahi talanoa te ke maʻu he lēsoni ʻo e taʻu ní ke ne ngaohi koe ke lahi ange haʻo fie lau ia. ʻI he ngaahi palakalafi hoko haké, ʻoku ʻuhinga e vahé mo e pēsí ki he Ngaahi Akonaki ʻa e Kau Palesiteni ʻo e Siasí: Lolenisou Sinou.
Mahalo pē te ke manatuʻi ʻa e lea mālie ʻi ha konifelenisi lahi naʻe fakafehoanaki ai ʻe ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e founga ʻo e uluí ki hano pīkaleʻi ha kiukamipā.2 Naʻe ʻikai ko ʻEletā Petinā pē ʻa e fuofua ʻAposetolo ke ne fai ʻa e fakafehoanakí ni. Naʻe vahevahe ʻe Palesiteni Sinou ʻa e fakakaukau tatau ʻi he taʻu ʻe 150 kimuʻa aí:
“Faʻo ha foʻi kiukamipā ʻi ha foʻi hina ʻoku ʻi ai ha vinika, pea ʻi he ʻosi ʻa e ʻuluaki houa ʻe tahá, pe ʻuluaki houa ʻe 12, ʻoku ʻikai ha fuʻu loko meʻa ʻe hoko ki ai. Hanga ʻo vakavakaiʻi ia pea te ke ʻilo ko e kiʻi liliu siʻi pē ʻoku hoko ki he kilí, he ʻoku fie maʻu ha taimi lōloa ange kae hoko ko ha pīkale. ʻOku ʻi ai e meʻa ʻoku hoko ki ha taha ʻi hono papitaiso ki he siasí ni, ka ʻoku ʻikai hoko hake pē ia he taimi ʻoku papitaiso aí. ʻOku ʻikai fokotuʻu ʻi hono lotó ʻa e fono ʻo e meʻa ʻoku totonú mo e fatongiá lolotonga ʻa e ʻuluaki houa ʻe 12 pe 24 pē; kuo pau ke ne nofo maʻu ʻi he siasí, ʻo hangē ko e foʻi kiukamipaá ʻi he viniká, kae ʻoua kuo nofoʻia kakato ia ʻe he laumālie totonú.”3
ʻI he taimi naʻe lea ai ʻa Palesiteni Sinou ʻo kau ki he fakauluí, naʻá ne lea mei ha meʻa pē kuó ne aʻusia. Naʻá ne faʻa fakamatala ki ha meʻa ʻe ua naʻe hoko—ko e taha naʻe hoko ia kimuʻa peá ne kau ki he Siasí pea hoko ʻa e tahá ʻi he hili siʻi pē hono papitaiso mo hilifakinimá—ʻo tokoni ke “nofoʻia kakato ia ʻe he laumālie totonú.” ʻE lava ke ke lau e ngaahi fakamatala ki he ngaahi meʻa ko ʻeni naʻá ne aʻusiá ʻi he peesi 1, 3, 59, mo e 61–62.
Naʻe fehuʻi kia Palesiteni Sinou ʻi he taimi ʻe taha, [“Ko e hā ʻoku ui ai [ha] tangata ke hoko ko ha palesiteni ki ha kakaí? ʻOku ʻuhingá ke ne maʻu ha ivi tākiekina peá ne toki fakaʻaongaʻi fakahangatonu ia ke maʻu hano lāngilangi? ʻIkai, ʻoku fehangahangai ia, ʻoku ui ia ke ngāue ʻi ha faʻahinga tuʻunga pehē ʻi he ʻuhinga tatau naʻe foaki ai e lakanga fakataulaʻeikí ki he ʻAlo ʻo e ʻOtuá, ke Ne fai ha ngaahi feilaulau. Maʻana? ʻIkai, ka ki he lelei ʻa e kakai ʻokú ne tokangaʻí. … Ke hoko ko ha tamaioʻeiki ki hono kāingá, ʻo ʻikai ko hanau pule, pea mo ngāue ʻi he meʻa te nau sai mo lelei aí.]”4
Naʻe fakaʻaongaʻi ʻe Palesiteni Sinou ʻa e tefitoʻi moʻoni ko ʻení ʻi heʻene hoko ko e taki ʻo e Siasí, pea naʻá ne mohu founga he taimi ʻe niʻihi ʻi hono fakahoko iá. Hangē ko ʻení, naʻe tuʻo taha ʻene fakaʻaongaʻi e tēnipí, tupenu kafú, mo e mohuku mōmoá ke langaki hake ʻaki e laumālie ʻo ha Kāingalotu faingataʻaʻia. ʻOku maʻu e fakamatala ko ʻení he vahe 7. Vakai ki he vahe 18 ke lau ai ha niʻihi ʻo ʻene ngaahi akonaki kau ki he tuʻunga fakatakimuʻa ʻi he Siasí.
Ko ha taki mohu ivi, mohu founga, mo ngāue ola lelei ʻa Palesiteni Sinou he naʻá ne ʻiloʻi ʻa e Taki moʻoní. Naʻá ne akonaki ʻo pehē, “Ko e ngāue maʻongoʻonga ʻoku fakahoko he taimi ní—ʻa hono tānaki ʻo e kakaí mei he ngaahi puleʻanga ʻo e māmaní naʻe ʻikai tupu ia mei ha fakakaukau ʻa ha faʻahinga tangata pe kau tangata; ka naʻe tupu ia mei he ʻEiki Māfimafí.”5 ʻI ha tali ki ha kāingalotu ʻo e Siasí ne fakataha mai ke fakalāngilangiʻi ia ʻi hono taʻu 85, naʻa ne pehē, “ʻOku ou ongoʻi ko e hā pē ha meʻa ne u lavaʻi naʻe ʻikai ko Lolenisou Sinou, pea ko e ngaahi meʻa ne u foua ʻou aʻu ai ki he tuʻunga ko ʻeni ko e Palesiteni ʻo e Siasí—ʻoku ʻikai ko Lolenisou Sinou, ka ko e ʻEikí naʻá ne fakahokó.”6
Naʻá ne akoʻi e moʻoni ko ʻení he taimi kotoa naʻá ne ngāue fakafaifekau aí, ka naʻe toe fakamanatu ange ki ai ʻi ha founga toputapu mo fakatāutaha kimuʻa siʻi peá ne hoko ko e Palesiteni ʻo e Siasí. Naʻá ne hoko ko e ʻAposetolo pule ʻi he Siasí he pekia ʻa Palesiteni Uilifooti Utalafi ʻi he ʻaho 2 ʻo Sepitema, 1898. Naʻá ne lau ʻoku ʻikai ke ne feʻunga ke fua ʻa e fatongiá ni, ko ia naʻá ne ʻalu toko taha ai ki ha loki ʻi he Temipale Sōlekí ke lotu. Naʻá ne tangi ke maʻu ha fakahinohino ka ne ʻikai maʻu ha tali ki heʻene lotú, ko ia naʻá ne mavahe mei he lokí hili ha kiʻi taimi ʻo ne hū atu ki he holó. Naʻe maʻu ai ʻa e talí. Naʻe tuʻu ʻi muʻa ʻiate ia ʻa Sīsū Kalaisi kuo toetuʻú, ʻi ha fute nai ʻe tolu (m ʻe 1) mei he falikí, ʻo fakahā kiate ia ke hoko atu ʻene tataki e Siasí. Ke ʻilo lahi ange kau ki he meʻa ko ʻeni naʻe hokó, vakai ki he vahe 20.
ʻOku ʻiloa ʻa Palesiteni Sinou ʻi heʻene maʻu fakahā kau ki he fono ʻo e vahehongofulú. Ki he kāingalotu ʻo e Siasí ʻi he 1899, naʻe kamata ʻaki e fakahaá ni ha tala mamafa: “Kuo hokosia e taimi ki he taha kotoa pē ʻi he kāingalotu ʻo e Ngaahi ʻAho Kimui Ní, ʻokú ne holi ke mateuteu ki he kahaʻú pea mo fokotuʻu maʻu hono vaʻé ʻi ha fakavaʻe ʻoku totonú, ke ne fakahoko ʻa e finangalo ʻo e ʻEikí pea mo totongi kakato ʻene vahehongofulú. Ko e folofola ia ʻa e ʻEikí kiate kimoutolú.”7
Naʻe tali faivelenga ʻe he Kāingalotú ʻa e faleʻi ʻa honau palōfitá, pea naʻe tāpuakiʻi fakafoʻituitui mo fakakātoa ai kinautolu ʻe he ʻEikí. ʻOku kei hokohoko atu pē he ʻahó ni e ivi tākiekina ʻo e fakahā ko iá, ʻi hono maʻu kotoa ʻe he kāingalotu ʻo e Siasí ʻi māmani kātoa ʻa e ngaahi tāpuaki fakalaumālie mo fakatuʻasino ʻi heʻenau talangofua ki he fono ʻo e vahehongofulú. Ke lau ʻa e meʻa naʻe hoko ʻo tupu ai ʻa e fakahā ko ʻení mo e ngaahi tāpuaki ne maʻu aí, vakai ki he vahe 12.
Naʻe fai ʻe Palesiteni Sinou ha fakamoʻoni mālohi kia Sīsū Kalaisi, ʻo hangē ko e kau palōfita kotoa pē. Naʻá ne akonaki ʻo pehē: “ʻOku tau fakafalala kotoa kia Sīsū Kalaisi, ki Heʻene hāʻele mai ki māmani ʻo fakaava ‘a e hala te tau lava ai ‘o maʻu ‘a e nongá, fiefiá, mo e hakeakiʻí. Pea kapau naʻe ʻikai ke ne fakahoko ʻa e ngaahi ngāue ko ʻení, naʻe ʻikai ke tau teitei mei malava ke maʻu ʻa e ngaahi tāpuaki mo e ngaahi faingamālie kuo fakapapauʻi mai kiate kitautolu ʻi he ongoongoleleí.”8 Naʻá ne fakamoʻoni ki he ʻaloʻi ʻo e Fakamoʻuí, ngāue fakafaifekaú, Fakaleleí, ʻEne kaunga fakatāutaha ʻi Hono Siasi kuo toe fakafoki maí, mo e Hāʻele ʻAngauá. Ki ha ngaahi fakamoʻoni lahi ange kau kia Sīsū Kalaisí, vakai ki he vahe 24.
Ko e moʻoni, ko e kiʻi meʻa siʻi pē ʻoku lava ke ʻoatu ʻe he fakamatala nounoú ni kau ki he moʻui mo e ngāue ʻa Palesiteni Sinoú. ʻI haʻo ako ʻa e Ngaahi Akonaki ʻa e Kau Palesiteni ʻo e Siasí: Lolenisou Sinoú, te ke ʻilo ai mo ha ngaahi talanoa fakalaumālie kehe, kau ai e ngaahi fakamatala ki hono ʻuluaki faingamālie ke faiako ʻi heʻene hoko ko ha faifekaú, ʻene fuʻu ʻohovale ʻi hono ui ia ke ne ngāue ʻi he Kōlomu ʻo e Kau ʻAposetolo ʻe Toko Hongofulu Mā Uá, ʻa e ongo naʻá ne maʻu ʻi heʻene ʻi ha vaka ʻi he ʻŌseni ʻAtalanitikí lolotonga ha fuʻu matangi lahi, mo e tuʻo fā hono fakahaofi ʻe he mālohi ʻo e lakanga fakataulaʻeikí ha kakai (kau ai mo Lolenisou Sinou pē) mei he maté. Te ke lava ʻo ʻilo ha meʻa lahi mei heʻene ngaahi akonakí fekauʻaki mo ha ngaahi tefito kehekehe, kau ai e uouangatahá, loto fakatōkilaló, ngaahi fuakavá, ngāue fakatemipalé, ngaahi fetuʻutaki fakafāmilí, feinga ki he haohaoá, lakanga fakataulaʻeikí, Fineʻofá, mo e fiefia ʻo hono vahevahe ʻo e ongoongoleleí mo ha niʻihi kehé.
Kapau kuó ke tuku ha taimi ke lau mo fakalaulauloto ai ki ha niʻihi ʻo e ngaahi fakamatala mo e ngaahi akonaki ʻoku lau ki ai ʻi he fakamatala ko ʻení—pe naʻa mo haʻo fakapapauʻi pē te ke lau kinautolu ʻi ha taimi vavé ni mai—ʻoku lava ke fakapapauʻi atu ʻe fiefia ʻa Palesiteni Sinou ʻi hoʻo feinga ke fai iá. Naʻá ne ako ʻi he kotoa ʻo ʻene moʻuí peá ne akoʻi ʻoku totonu ke tau “ngāueʻi ʻa e taumuʻa ke tau fakalakalaka ʻi he ngaahi tefitoʻi moʻoni ʻo e māmá mo e ʻiló.”9 Naʻá ne tapou mai, “ʻOku totonu ke hoko ʻa e ʻaneafí pe uike kuo ʻosí ko e lelei taha ia kuo tau aʻusiá, pea ʻoku totonu ke tau fakalakalaka ki muʻa he ʻaho takitaha, ʻi he ʻiló mo e potó pea mo ʻetau malava ke fai leleí.”10
Fakatauange ʻe fakalahi atu ha ngaahi meʻa hoʻo moʻuí he taʻú ni ʻi hoʻo ako ʻa e Ngaahi Akonaki ʻa e Kau Palesiteni ʻo e Siasí: Lolenisou Sinou. ʻI hoʻo ako iá, ʻe lava ke ke aʻusia ʻa e meʻa tatau mo ia naʻe hoko ki he tangata faifekau lelei naʻe fesiofaki mata-ki he-mata mo Palesiteni Sinoú. ʻI he laka atu hoʻo vakaí ʻi he fofonga ʻofa mo e kanoʻimata nonga ko iá, ʻe lava foki ke ke ongoʻi ʻokú ke tuʻu ʻi ha potu toputapu—ʻo ʻikai koeʻuhí ʻokú ke ʻiloʻi ʻa Lolenisou Sinou, ka koeʻuhi kuó ke ʻunuʻunu ʻo toe ofi ange ki hoʻo Tamai Hēvaní mo Sīsū Kalaisi, ʻa ia naʻá ne hoko ko e fakamoʻoni kiate kinaua.
Naʻe akonaki ʻa Palesiteni Sinou ʻo pehē ʻoku ʻomi ʻe he totongi vahehongofulú ʻa e ngaahi tāpuakí. Naʻe faʻa tali e vahehongofulú ʻi he ngaahi ʻōfisi tatau mo ia ʻoku hā atu hení (Sōleki Siti, ngaahi taʻu ʻo e 1880). Toʻohemá: ʻI ha teuteu ʻa Palesiteni Sinou ke talitali hono ngaahi kaungāmeʻa, naʻá ne ngaohi ʻaki e ngaahi foʻi tēnipi ha tuʻuʻanga teʻelango ke maama ai hono ʻapi naʻe langa ʻaki e kupukupuʻi ʻakaú.
Naʻá ne aʻusia ha meʻa naʻe toputapu ʻi heʻene mamata ki he ʻEiki toetuʻú ʻi he Temipale Sōlekí.
Toʻohemá: ʻata mei muí © Artbeats; tā valivali ʻa John Willard Clawson © IRI; toʻomataʻú: faitā ʻa Robert Casey
Mei toʻohemá: tā fakatātā ʻa Brian Call; faitā ʻa Robert Casey; taá ʻi he angalelei ʻa e Laipeli Hisitōlia ʻo e Siasí
Taá ʻi he angalelei ʻa e Laipeli Hisitōlia ʻo e Siasí; konga naʻe toʻo mei he Ko e Hāʻele ʻAngauá, tā ʻe Grant Romney Clawson © IRI