Ko e Mahuʻinga ʻo e Ako Fakaʻatamaí

Ko e akó ko ha konga mahuʻinga ʻaupito ia ʻo e ongoongoleleí pea mo e teuteu ke kau atu ki he ngaahi meʻa ʻa e sosaietí pea tauhi ʻaki ha taha mo hono fāmilí.¹ ʻOku fakamatala ʻa ʻEletā Craig A. Cardon ʻo e Kau Fitungofulú ki hono mahuʻinga ʻo e akó ʻi he peesi 54–55 ʻo e makasini ko ʻení.

ʻOkú ne tohi ʻo pehē, “ʻI he māmani ko ʻeni ʻoku fakautuutu e fihi hono ngaahi meʻá, ko e taha e akó ʻo e ngaahi meʻa mahuʻinga taha ke maʻu ʻi he moʻuí. Pea neongo ʻoku moʻoni ko e lahi ange ʻa e akó ʻe iku ia ki ha faingamālie ke toe lahi ange ai ʻa e ngaahi lelei fakamatelie ʻoku maʻú, ka ko hono mahuʻinga lahi ange ʻo e tupulaki ʻo e potó ko e faingamālie ko ia ʻoku tau maʻu ke hoko ai ko ha ivi tākiekina lahi ai ʻi hono fakahoko e ngaahi taumuʻa ʻa e ʻEikí.”

ʻOku pehē ʻi he Ki Hono Fakamālohia ʻo e Toʻu Tupú: “ʻOku totonu ke kau ʻi hoʻomou akó ʻa e ako fakalaumālié. Ako ʻa e ngaahi folofolá mo e ngaahi lea ʻa e kau palōfita ʻo e ngaahi ʻaho kimui ní. Kau ki he seminelí mo e ʻinisititiutí. Hokohoko atu hoʻo ako ki he palani ʻa e Tamai Hēvaní ʻi hoʻo moʻuí kotoa. ʻE tokoniʻi koe ʻe he ako fakalaumālie ko ʻení ke ke ʻiloʻi ʻa e ngaahi tali ki he ngaahi tukupā ʻo e moʻuí pea te ne fakaafeʻi mai ʻa e takaua ʻo e Laumālie Māʻoniʻoní.”²

Ngaahi Fokotuʻu ki hono Akoʻi ʻo e Toʻu Tupú

Lau e konga ki he akó ʻi he Ki Hono Fakamālohia ʻo e Toʻu Tupú. Vahevahe e ngaahi meʻa lelei kuó ke aʻusia ʻi he akó pea mo hoʻo ako e ongoongoleleí. ʻE lava heni ke ke aleaʻi ʻa e tuʻunga moʻui ko ʻení mo hoʻo fānau toʻu tupú pea tali ha faʻahinga fehuʻi ʻokú ne maʻu.
Tokoniʻi hoʻo fānau toʻu tupú ke ne fokotuʻu ha ngaahi taumuʻa fakangāue pe fakaako ʻo makatuʻunga ʻi hono ngaahi talēnití mo e ngaahi meʻa ʻoku manako aí. Tokoni kiate ia ke ne ʻiloʻi ha ngaahi sitepu ke kamata ngāue ai ki he ngaahi taumuʻa ko ʻení.
Fakakaukauʻi hano fakahoko ʻo ha efiafi fakafāmili ʻi ʻapi fekauʻaki mo hono mahuʻinga ʻo e akó (ko ha maʻuʻanga tokoni lelei e fakamatala ʻa ʻEletā Tāleni H. ʻOakesi mo Kilisiteni M. ʻOakesi ko e “Akó mo e Kāingalotu ʻi he Ngaahi ʻAho Kimui Ní,” Liahona, ʻEpeleli 2009, 26–31).
Hū ki he youth.lds.org pea lomiʻi he “For the Strength of Youth” ʻi he Youth Menu. Te ke maʻu ʻi lalo he “Education” ha ngaahi potufolofola fekauʻaki mo e akó, ngaahi vitiō, (hangē ko e “Surfing or Seminary?”), ngaahi polokalama fakaletiō ʻa e Mormon Channel, ngaahi fehuʻi mo e tali, ngaahi fakamatala, kau ai e ngaahi lea ʻa e Kau Taki Māʻolungá.

Ngaahi Fokotuʻu ki hono Akoʻi ʻo e Fānaú

ʻOku fakafiefia hono ako ʻo e ngaahi meʻa foʻoú, ka ʻe lava pē foki ke faingataʻa e akó. ʻOku kau ʻi he makasini ʻo e māhina ní ha talanoa ʻoku ui ko e “Mateuteu ke Laukonga” (peesi 66). ʻOku fakamatala e talanoá ki he fāinga ʻa ha taʻahine naʻe moʻua ʻi he mahaki ko e tailekisiā (dyslexia) ke ne laukonga leʻolahi pea mo hono fakalotolahiʻi ia ʻe he fānau he Palaimelí ke fai hono lelei tahá. Fakakaukauʻi hano lau mo hoʻo fānaú ʻa e talanoá ni pea mou aleaʻi e ngaahi fehuʻi ko ʻení:

Ko e hā e ongo ʻa Melé ʻi heʻene feinga ke fai ha meʻa naʻe faingataʻa? Ko e hā ʻoku mahuʻinga ai ke hokohoko atu pē ʻa e akó neongo ʻene faingataʻá?
Ko e hā e meʻa naʻe fai ʻe he fānau kehé ke tokoni ai kia Mele? Ko e hā ha meʻa te ke lava ʻo fai ke tokoniʻi ai ha niʻihi kehe ke nau ako ʻi ʻapi, ʻi he lotú, pea ʻi ʻapiako?

Tā fakatātaaʻi ʻe Taia Morley