Tuʻu ʻi he Potu Māʻolunga Angé
ʻOku toʻo ʻa e kaveinga ʻo e Mutualé ki he 2013 mei he Tokāteline mo e Ngaahi Fuakava 87:8: “Ko ia, mou tuʻu ʻi he ngaahi potu toputapú, pea ʻoua ʻe hiki mei ai, kae ʻoua kuo hokosia ʻa e ʻaho ʻo e ʻEikí.” Ko e fehuʻi ʻeni ʻoku ou ʻamanaki ʻe fakalaulauloto ki ai ʻa e talavou kotoa pē ʻi he taʻú ni kotoá, ʻOku ou tuʻu nai ʻi he ngaahi potu toputapú?
ʻI heʻeku feʻiloaki mo e kau talavou loto toʻa ʻi māmani kotoá, kuó u mamata tonu ʻi hamou toko lauiafe ʻoku mou fakahoko ʻeni ʻi ha ngaahi founga lahi. ʻOku mou tuʻu ʻi he ngaahi potu toputapu tahá ʻi he taimi kotoa pē ʻoku mou hū ai he temipalé ke fakahoko e papitaiso maʻá e kakai pekiá. ʻOku ou poupou atu ke fakaʻaongaʻi e faingamālie kotoa pē ʻoku mou maʻu ke hū ai he temipalé pea ke mou moʻui taau maʻu pē ke fakahoko ia. ʻI he ʻaho takitaha ʻoku mou fakahoko ai homou fatongia ki he ʻOtuá, ʻoku mou tuʻu ʻi he ngaahi potu toputapú pea ʻoku mou ʻi ha tuʻunga ke hiki hake mo ha niʻihi kehe. ʻOku mou tuʻu ʻi he ngaahi potu toputapú ʻi he taimi ʻoku mou teuteuʻi ai, tāpuakiʻi, pea tufa e sākalamēnití ʻi he Sāpate takitaha. ʻOku mou tuʻu ʻi he ngaahi potu toputapú ʻi hoʻomou vahevahe ʻa e ongoongoleleí pea ʻi he taimi ʻoku mou hoko ai ko ha faifekau ʻoku tuʻu tatali—ko ha taha ʻokú ne malava, loto fiemālie, pea moʻui taau maʻu pē ke tokoni mo fakamālohia e niʻihi kehé.
ʻI hoʻo hoko ko e tokotaha maʻu Lakanga Taulaʻeiki Faka-ʻĒloné, kuo tuku kiate koe ʻa e fatongia ke ke fakatokanga, fakamatala, naʻinaʻi, akonaki, mo fakaafeʻi ʻa e kakai kotoa pē ke haʻu kia Kalaisi (vakai, T&F 20:59). Naʻe pehē ʻe Palesiteni Hāloti B. Lī (1899–1973): [“He ʻikai te ke lava ʻo hiki hake ha tokotaha kehe kae ʻoua ke ke tuʻu ʻi ha feituʻu ʻoku māʻolunga ange ʻi he feituʻu ʻokú ne tuʻu aí. … He ʻikai te ke lava ʻo tutu ha maama ʻi he moʻui ʻa ha tokotaha kehe kae ʻoua ʻoku ulo ia ʻi ho loto ʻoʻoú.”]1 Kau talavou, ʻoku ʻuhinga ʻeni ki he totonu ke hokohoko atu hoʻomou ngāue ke fakamālohia hoʻomou fakamoʻoní pea loto fiemālie maʻu pē ke vahevahe ia mo e niʻihi kehé.
ʻOku ʻi ai ho fatongia toputapu ke hoko ko ha meʻangāue ʻi he toʻukupu ʻo e ʻEikí. ʻI hoʻo lotu mo ako e ngaahi folofolá, feinga ke tauhi e ngaahi fekaú, pea fakafanongo ki he ngaahi ueʻi ʻa e Laumālie, te ke ʻilo ʻokú ke ʻi ha potu māʻolunga ange. Ko hono olá ko e lava ke hoko ha feituʻu pē ʻokú ke ʻi ai ko ha potu toputapu. Pea ʻi heʻene hoko leva ha ngaahi meʻa, te ke maʻu ʻa e ivi, lototoʻa, mo malava ke tokoni ʻi hono hiki hake ʻo ha niʻihi kehe. Te ke maʻu ʻa e mālohi mo e maluʻi ko ia ne talaʻofa ʻaki ʻe he ʻEikí kiate kinautolu ʻoku tuʻu ʻi he ngaahi potu toputapú.
ʻOku ou manako ʻi he lea ʻa Palesiteni Tōmasi S. Monisoni ʻo kau ki he ngaahi talaʻofa ko ʻení ʻi heʻene fakapapauʻi mai kiate kitautolu, ʻi heʻetau ʻunuʻunu ofi ki he ʻEikí, “te tau ongoʻi ʻa Hono laumālié ʻi heʻetau moʻuí, pea te tau maʻu ai ha holi mo e loto toʻa ke tuʻu mālohi mo taʻeueʻia ʻi he anga māʻoniʻoni—ʻo ‘tuʻu … ʻi he ngaahi potu toputapú pea ʻoua ʻe hiki mei ai’ (T&F 87:8).
“ʻI he takatakaiʻi kitautolu ʻe he ngaahi matangi ʻo e liliú pea tau mamata tonu pē ki he kei hokohoko atu ʻene ʻauʻauha ʻa e angamaʻá ʻi heʻetau nofo ʻa sosaietí, tau manatuʻi angé ʻa e talaʻofa mahuʻinga naʻe fai ʻe he ʻEikí kiate kinautolu ʻoku falala kiate Iá: ‘ʻOua naʻá ke manavahē; he ʻoku ou ʻiate koe: ʻoua ʻe loto vaivai; he ko au ko ho ʻOtuá: te u fakamālohia koe; ʻio, te u tokoniʻi koe’ (ʻIsaia 41:10).”2