Tokāteline mo e Ngaahi Fuakava 87:8

ʻOku akoʻi kiate kitautolu ʻe he kaveinga ʻo e Mutualé ki he taʻu ní ʻa e feituʻu ke tau tuʻu ai ka tau malú.

8 Ko ia, mou tuʻu ʻi he ngaahi feituʻu toputapu, pea ʻoua ʻe hiki mei ai kae ʻoua ke hokosia ʻa e ʻaho ʻo e ʻEikí; he vakai, ʻoku haʻu vave ia, ʻoku folofola ʻe he ʻEikí. ʻĒmeni.

Mou Tuʻu

“ʻOku fakaafeʻi kitautolu ʻe he ʻEikí, ‘ʻUnuʻunu mai kiate au pea te u ʻunuʻunu atu kiate koe; fekumi faivelenga kiate au pea te mou ʻiloʻi au.’ ʻI heʻetau fai iá, te tau ongoʻi ai ʻa Hono Laumālié ʻi heʻetau moʻuí, pea te tau maʻu ai ha holi mo e loto toʻa ke tuʻu mālohi mo taʻeueʻia ʻi he anga māʻoniʻoni—ʻo ‘tuʻu … ʻi he ngaahi potu toputapú pea ʻoua ʻe hiki mei ai.’”

Palesiteni Thomas S. Monson, “Tuʻu ʻi he Ngaahi Potu Toputapú,” Liahona, Nōvema 2011, 86.

ʻI he Ngaahi Potu Māʻoniʻoní

“Ko e hā ʻa e … [‘ngaahi potu toputapu’]? ʻOku kau moʻoni ai ʻa e temipalé mo hono tauhi totonu ʻo e ngaahi fuakavá. ʻOku kau moʻoni ai ha ʻapi ʻoku fakamahuʻingaʻi ai ʻa e fānaú pea mo fakaʻapaʻapaʻi ai ʻa e mātuʻá. ʻOku kau moʻoni ʻi he ngaahi potu [toputapú] ʻa hotau ngaahi lakanga kuo vahe mai ʻe he mafai ʻo e lakanga fakataulaʻeikí, kau ai ʻa e ngāue fakafaifekaú mo e ngaahi lakanga ʻoku fakahoko ʻi he faivelenga ʻi he ʻū koló, uōtí, mo e ngaahi siteikí.”

ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá, “Teuteu ki he Hāʻeleʻanga Ua Maí,” Liahona, Mē 2004, 10; ko e toki tānaki atu hono fakamamafaʻí.

ʻOua ʻe Hiki Mei Ai

Ko ha ngaahi founga ʻeni ke fakapapauʻi ʻaki ʻoku ʻikai hiki ha meʻa ʻo ʻave mei ai:

Ko ha taula—“Ko e ʻamanaki leleí … ʻoku hoko [ia] ko ha taula ki he laumālie ʻo e tangatá” (ʻEta 12:4).
Ko ha makatuʻunga mālohi—“ʻOku makatuʻunga ʻi he maka ʻo hotau Huhuʻí, ʻa ia ko Kalaisi, ko e ʻAlo ʻo e ʻOtuá, kuo pau ke mou langa ai homo makatuʻungá … , ʻa ia ko e makatuʻunga mālohi” (Hilamani 5:12).
Pau e meʻa ʻoku tuʻu aí—He ʻikai lava ke tuʻu ho vaʻe ʻe taha ʻi Saione pea vaʻe ʻe taha ʻi māmani, he “ko e tangata ʻoku lotolotouá, ʻoku taʻemaau ʻi heʻene anga kotoa pē” (Sēmisi 1:8).
Ngaahi siteiki ʻo e tēnití—ʻOku tokoni e ngaahi siteiki (tuki poupou) ʻo e tēniti ʻo Saioné ke tuʻu ʻaliʻaliaki mo mālohi ʻa e Siasí, lolotonga iá ʻokú ne fakamalumalu kitautolu: “Pea ke hoko ʻa e tānaki fakataha ki he fonua ko Saione, pea ki hono ngaahi siteikí, ko ha maluʻanga, pea ko ha ungaʻanga mei he afaá” (T&F 115:6).

ʻAho ʻo e ʻEikí

ʻAho ʻo e ʻEikí—Ko e Hāʻele ʻAngaua Mai ʻa Sīsū Kalaisí

ʻOku Haʻu Vave Ia

“ʻOku totonu ke tau fakatokangaʻi e ngaahi fakaʻilongá [ʻo e Hāʻele ʻAngauá], ʻoku totonu ke tau moʻui faivelenga ʻo hangē ko ia te tau malavá. … Ka kuo pau ke ʻoua naʻa tuʻu ʻetau moʻuí ʻo ʻikai ke tau toe fai ha meʻa koeʻuhí pē he kuo ʻamanaki ke hoko ʻa e Hāʻele ʻAngauá mo e ngaahi meʻa ʻoku hoko fakataha mo iá. He ʻikai lava ke tuʻu ʻetau moʻuí. Ka ʻoku totonu ke tau moʻui ʻo toe lelei ange ia ʻi he founga ne tau moʻui ʻaki ʻi ha toe taimi.”

ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Kuonga Maʻongoʻonga Taha ʻEni He Ngaahi Kuongá Kotoa,” Liahona, Siulai 2007, 19–20.