Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni.
“Tuʻunga Fakaākongá ʻi he Taimi Kotoa pē, ʻi he Meʻa Kotoa pē, ʻi he Feituʻu Kotoa pē,” peesi 22: Fakakaukau ke fakaafeʻi homou fāmilí ke fakakakato ʻa e “discipleship experiment” ʻoku aleaʻi ʻi he fakamatala ko ʻení. Ako ʻi he faʻa lotu ʻi ha uike ʻe taha ha akonaki pau ʻa Sīsū Kalaisi pe talanoa kau ki ai. ʻE lava ke lipooti ʻe he kau mēmipa ʻo e fāmilí e ngaahi meʻa ne nau aʻusiá mo ʻenau ngaahi fakakaukaú ʻi he efiafi fakafāmili ʻi ʻapi hono hokó.
“Maama … Meʻa Faitaá … Kamata!”, peesi 48: Hili hano lau ʻo e fakamatala ko ʻení, aleaʻi mo homou fāmilí ʻa e mahuʻinga hono fili ʻo e mītia ʻoku leleí. Fakakaukau ke fakaafeʻi e kau mēmipa ʻo e fāmilí ke vahevahe mai ha sīpinga ʻe taha ʻo e mītia lelei ʻoku nau manako taha aí mo e founga kuo tokoni ai kiate kinautolú. Mahalo te ke fie fakaʻaliʻali ha fakatātā ʻo Sīsū Kalaisi lolotonga hoʻomou aleaʻi e founga ʻoku totonu ke tau fili ʻaki e mītia te tau ongoʻi fiemālie ke mamata aí pe fanongo ki ai kapau naʻe ʻi ai e ʻEikí. (ʻOku maʻu he peesi 9 ha ngaahi fakakaukau lahi ange ki hono akoʻi ʻo e tefitó ni.)
“Ko Hono ʻOmi ʻo e Palaimelí ki ʻApi,” peesi 64: Fakakaukau ke mou ʻeva lalo fakafāmili ke mou ʻiloʻi e lahi ʻo e ngaahi meʻa ʻoku mou mamata ki aí ʻa ia naʻe fakatupu ʻe he Tamai Hēvaní. Mahalo e fie tānaki ʻe he kau mēmipa ʻo e fāmilí ha ngaahi meʻa, tā ha ngaahi fakatātā, pe faitaaʻi e ngaahi meʻa ʻi he fakatupú ʻoku nau saiʻia taha aí. ʻE lava ke mou fakaʻosi ʻaki hono hivaʻi ʻo e “ ʻOku ʻOfa ʻEku Tamai Hēvaní ʻIate Au” (Tohi Hiva ʻa e Fānaú, 16).
Ko ʻEku Efiafi Fakafāmili he Ngāue Fakafaifekaú
Ko ha ului foʻou au ki he Siasí, pea ʻoku ou saiʻia maʻu pē ke tokoni ki he kau faifekau ʻi hoku uōtí. Ne u faʻa mamata ki he fiefia ʻa e kau fiefanongó ke kau ki he efiafi fakafāmili ʻi ʻapí neongo ʻoku ʻikai ke nau ongoʻi fiemālie ke fanongo ki he ngaahi lēsoní.
Taimi ʻe taha ne u fakaafeʻi ai e ongo faifekau taimi kakató mo ha fāmili kakato ʻoku ʻikai ke nau Siasí ki heʻeku efiafi fakafāmili ʻi ʻapí. Kimuʻa pea nau aʻu angé, naʻá ku ʻaukai mo lotua ke ʻi ai e Laumālié peá ne fakaava hake honau lotó ki he ongoongoleleí. Naʻa mau mamata ʻi ha foʻi vitiō ki he ngāue fakafaifekaú fekauʻaki mo hono tokoniʻi e ngaahi fāmilí ke nau fakalakalaka pea tupulaki ʻenau falalá. Hili iá ne mau vahevahe ʻemau ngaahi ongo fekauʻaki mo e vitioó. Naʻe mālohi fau e Laumālié.
ʻOku loto fiemālie he taimí ni e fāmili fakaʻofoʻofa ko ʻení ke ako lahi ange ki he ongoongoleleí ʻaki haʻanau feʻiloaki mo e kau faifekaú. Kuo fakaafeʻi kitautolu kotoa ke tokoni ʻi he ngāue fakafaifekaú, pea kuó u ʻosi mamata ʻi he hoko ʻa e ngaahi efiafi fakafāmili ʻi ʻapí ko ha founga ʻoku ola lelei ki hono vahevahe mo e niʻihi kehé ʻa e fiefia ʻo hono maʻu ʻo e ongoongoleleí ʻi heʻeku moʻuí.
Malia ti losi ʻEnisilesi Vilika Sepalosi, Pelū