Kiʻi Faifekau ʻa e Kui-fefine ko Tení
ʻOku nofo ʻa ʻEmilia Malia Kuimalaesi Kōlea ʻi he Vahefonua Fetaloló, Palāsila.
“He ʻo ka lea ha tangata ʻi he mālohi ʻo e Laumālie Māʻoniʻoní, ʻoku fakahū ia ʻe he mālohi ʻo e Laumālie Māʻoniʻoní ki he loto ʻo e fānau ʻa e tangatá” (2 Nīfai 33:1).
ʻOku nofo ʻa Vitoa mo ʻene faʻeé pea mo hono tuofefiné ʻi he ʻapi ʻo ʻene Kui Fefine ko Tení. Ne puke ʻe kui fefine ʻa Vitoá pea ʻikai toe lava ʻo mavahe mei hono mohengá ʻi ha ngaahi uike lahi. Naʻe taʻelata ʻi heʻene nofo tokotaha ʻi hono lokí.
Naʻe fakakaukau leva ʻa Vitoa ke hoko ko ha fakafeʻao ʻo ʻene Kui-fefine ko Tení. Ko e taimi naʻe foki mai ai mei he akó ʻi he ʻaho kotoa pē, naʻá ne ʻave ha tatau ʻo e Liahona ki he loki ʻo ʻene Kui-fefiné ʻo lau ki ai ha ngaahi talanoa mei he ʻū peesi ʻa e fānaú.
ʻI he ʻosi ʻo ʻene lau e tatau kotoa ʻo e Liahoná ne maʻu ʻe hono fāmilí, naʻá ne kamata laukonga ange leva ʻa e Tohi ʻa Molomoná mo e Tohi Tapú ki ai. Naʻa ʻikai ke kau ʻa e Kui-fefine ko Tení ki he Siasí, ka naʻe saiʻia ke fanongo ki he laukonga ange ʻa Vitoa ki aí. Naʻe fiefia ke ʻilo ki he ongoongoleleí.
Naʻe fai ʻe he Kui-fefiné ha ngaahi fehuʻi lahi. Kapau naʻe ʻikai ke ʻilo ʻe Vitoa ʻa e talí, naʻá ne ʻeke ia ki heʻene faiako Palaimelí pe kumi ʻi he folofolá. Naʻe ui ʻe he Kui-fefiné ʻa Vitoa ko ʻene kiʻi faifekau.
Naʻe talaange ʻe he Kui-fefiné kia Vitoa kuó ne ako ha meʻa lahi meiate ia. Naʻe palōmesi ange ʻe ʻalu ki he lotú mo ia ʻi haʻane sai. Naʻe ʻai ʻe he meʻa naʻá ne akó ke ne fakaʻamu ke fai mo sai pea ako lahi ange ki he ongoongoleleí.
ʻI he sai e Kui-fefiné, naʻá ne tauhi ʻene palōmesi. Naʻá ne ʻalu ki he lotú mo Vitoa ke ako lahi ange ki he meʻa naʻá ne akoʻi ange ki aí. Naʻe ʻikai fuoloa kuo papitaiso mo hilifakinima ʻa e Kui-fefiné. Naʻe tokoniʻi ia ʻe Vitoa ke ne ʻilo ʻoku moʻoni ʻa e ongoongoleleí.
Ko e taimi naʻe lahi hake ai ʻa Vitoá, ne hoko ko ha faifekau ʻi he Misiona Positoni Masasūsetí. Naʻe ʻalu ki he temipalé mo e Kui-fefine ko Tení, ki muʻa pea toki mavahé.
Ngaahi taá ʻi he angalelei ʻa Emilia Maria Guimarães Correa