Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni.

“Ko e Misiona mo e Ngāue Fakafaifekau ʻa Sīsū Kalaisí,” peesi 18: Ko hono vahevahe ʻe ʻEletā Lāsolo M. Nalesoni ʻa e ngaahi tafaʻaki ʻe nima ʻo e moʻui ʻa Sīsū Kalaisí te tau lava ʻo faʻifaʻitaki ki aí. Fakakaukau ke aleaʻi ʻa e ngaahi tafaʻaki ko ʻení pea mo e founga ke fakaʻaongaʻi ai kinautolu heʻetau moʻuí. Mahalo te mou fie lau ʻa e talanoa fakafolofola mei he moʻui ʻa e Fakamoʻuí pe mamata ʻi ha vitiō ʻo e Tohi Tapú ʻi he (biblevideos.lds.org) ʻokú ne fakafōtunga ha taha ʻo e ngaahi tafaʻaki ko iá. Te mou lava ʻo fakaʻosi ʻaki hano fai ha ngaahi fakamoʻoni ki Heʻene moʻuí mo ʻene ngāué mo hivaʻi ʻa e “Fakatapui Au” (Ngaahi Himi, fika 64).

“Ko e Hā ʻa e Kaungāmeʻa Moʻoni?” peesi 52: Mahalo te ke fie kamata ʻaki haʻo fehuʻi ange pe ko e hā ʻa e kaungāmeʻa moʻoni? Lau ʻa hono fakaʻuhingaʻi mo fakamatalaʻi ʻe ʻEletā Lōpeti D. Heili ʻa e faʻahinga kaungāmeʻa ʻoku totonu ke tau hoko ki aí. Fakakaukau ke fakamatalaʻi ha aʻusia ʻi ha taimi naʻe hangē ai ha taha ko ha kaungāmeʻa moʻoni kiate koe, pea mou talanoa ki he ngaahi ʻulungaanga ʻe lava ʻo tokoni ki he kau mēmipa ʻo e fāmilí ke nau hoko ko ha ngaahi kaungāmeʻa lelei ange ki he niʻihi kehé.

“ Kātoangaʻi Fiefia ʻo e Temipalé!” peesi 62: Vakai mo ho fāmilí ki he ngaahi tā ʻo e ngaahi founga kehekehe ne kātoangaʻi ai ʻe he fānaú ʻa e temipalé. Fakakaukau ke fakaʻaliʻali ha fakatātā ʻo e temipale ofi taha atú mo talanoa ki he ʻuhinga ʻoku mahuʻinga ai ʻa e ngaahi temipalé. Fakamamafaʻi ange ko e temipalé pē ʻe taha ʻe lava ke silaʻi ai ʻa e ngaahi fāmilí. Mahalo te mou fie fakaʻosi ʻaki haʻamou hivaʻi ʻa e “ʻE Lava ke Taʻengata ʻa e Ngaahi Fāmilí” (peesi 65).

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua kehekehe ʻi he languages.lds.org.