Naʻe Fakafoki Mai ʻe Sīsū Kalaisi Hono Siasí ʻi he Ngaahi ʻAho Kimui Ní.

ʻE lava ke ke fakaʻaongaʻi e lēsoni mo e ʻekitivitī ko ʻení ke lahi ange ai hoʻo ʻilo ki he kaveinga ʻa e Palaimelí ki he māhina ní.

Fakakaukau ʻokú ke ʻalu ʻo kumi ha koloa. Te ke kumi ʻa e koloá ki fē? Te ke ʻilo fēfē ia? ʻE ʻi ai ha puha tukuʻanga koloa? Ko e hā ʻe ʻi lotó?

ʻOku ʻi ha ngaahi puha koloa ʻe niʻihi ha ngaahi siueli mo ha ngaahi foʻi paʻanga mahuʻinga. Ka ʻi heʻetau hoko ko e kāingalotu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻoku tau maʻu ha koloa ʻoku toe mahuʻinga ange; ko e ongoongolelei ʻo Sīsū Kalaisí.

ʻOku tokolahi ha kakai ʻoku ʻikai ke nau ʻilo ki he koloa ko ʻení, ʻoku hoko ai ko ha taha hotau ngaahi fatongiá ke vahevahe ia mo e tokolahi taha te tau lavá.

Hili e pekia ʻa Sīsū mo ʻEne kau ʻAposetoló, naʻe mole ha ngaahi akonaki mahuʻinga ʻo e ongoongoleleí pea mo ha ngaahi ouau pe liliu, kau ai ʻa e papitaisó, mafai fakataulaʻeikí, ngaahi temipalé, kau palōfita moʻuí, pea mo e sākalamēnití.

Naʻe toe fakafoki kotoa mai e ngaahi koloa ko ʻeni ʻo e ongoongoleleí ʻi he Palōfita ko Siosefa Sāmitá. Naʻe hā ʻa e Tamai Hēvaní mo Sīsū Kalaisi kia Siosefa Sāmita ʻi he Vao ʻAkau Tapú ʻi he taimi naʻe lotu ai ke ʻilo ʻa e moʻoní.

Naʻe maʻu ki mui ʻe Siosefa ʻa e ngaahi lauʻi peleti koulá peá ne liliu kinautolu ʻo hoko ko e Tohi ʻa Molomoná. ʻOku ʻi he Tohi ʻa Molomoná ʻa e ngaahi akonaki ʻoku tau fakamahuʻingaʻi koeʻuhí he ʻokú ne fakamatalaʻi ʻa e ngaahi moʻoni naʻe molé. ʻOku tau maʻu ha ngaahi tāpuaki lahi koeʻuhí he ʻoku tau maʻu ʻa e ngaahi moʻoni ko ʻeni ʻo e ongoongoleleí.

Hono ʻikai ko ha ngaahi koloa mahuʻinga ʻeni!

Ngaahi tā fakatātā ʻa Bryan Beach