Ko Hono Tokoniʻi ʻo e Fānaú ke Teuteu ki he Papitaisó
Ko ha taimi fakafiefia ʻo e ʻuluaki fakahoko fiefia e taimi ʻo e kei tupu haké. Ko e ʻuluaki heka ʻi ha pasikalá, hū ki he akó, pe ʻahiʻahiʻi ha meʻakai foʻoú, ko ha ngaahi meʻa siʻi pē ia ʻo e ngaahi meʻa fakafiefia ʻokú ne fatu e moʻui ʻa ha tamasiʻi. ʻOku tau maʻu ʻi heʻetau hoko ko e kakai lalahí ha faingamālie ke tokoniʻi ʻa e fānaú ʻi he hala ki he ʻilo foʻoú. ʻI heʻetau hoko ko e kakai lalahi ʻi he Siasí ʻoku tau toe maʻu foki ʻa e faingamālie ke tokoniʻi kinautolu ke nau tupulaki ʻi he ongoongoleleí (vakai, T&F 68:25). Ko e hā te tau lava ʻo fai ke fakapapauʻi ʻoku hoko e papitaiso ʻo ha kiʻi tamasiʻi—ʻa e ʻuluaki fuakava ʻoku fakahoko ʻe ha taha mo ʻetau Tamai Hēvani ʻofá—ko ha meʻa fakaʻofoʻofa mo mahuʻingamālie?
Naʻe akoʻi ʻe Palesiteni Poiti K. Peeka, “Ko e tefitoʻi taumuʻa ia ʻo e Siasí ni ke akoʻi e toʻu tupú: ʻo ʻuluaki fai ia ʻi ʻapi pea toki hoko ki he siasí.”1
ʻI he ngaahi sīpinga ko ʻení, ʻoku vahevahe ai ʻe ha mātuʻá ʻa e founga ʻo ʻenau teuteuʻi ʻenau fānaú ki he ongo ouau mo e ngaahi fuakava toputapu ʻo e papitaisó mo e hilifakinimá.
ʻOku Mau Kamata Tokamuʻa
ʻOku pehē ʻe Lōlie, ko ha faʻē ki ha fānau ʻe toko fā, “Ko e taʻu ʻoku hoko ai ʻa e taʻu fitu ʻo e fānaú takitahá, ko ha taimi fakafiefia ia.” ʻOkú ne akoʻi mo hono husepānití ʻena fānaú ʻo kau ki he papitaisó mei he ʻaho pē honau fāʻeleʻí. Neongo ia, ko e taimi ʻoku hoko ai e taʻu fitu ʻo e fānaú takitahá, ʻoku kamata leva ʻe he fāmilí ha faʻahinga teuteu pau ange. ʻOku nau fakahoko ha lēsoni efiafi fakafāmili ʻi ʻapi tuʻotaha ʻi he māhina ʻi ha ngaahi tefito fekauʻaki mo e papitaisó, hangē ko e ngaahi fuakavá pea mo e sīpinga ʻa Sīsuú.
ʻOku pehē ʻe Lōlie ko e ngaahi lēsoni ʻoku mātuʻaki ongo ʻoku fai ia lolotonga ʻo e māhina ʻoku hoko ai e taʻu valu ʻo e fānaú. ʻOkú ne fakaʻaliʻali ki he fānaú ʻa e vala ne nau tui he taimi naʻe tāpuakiʻi mo foaki ai honau hingoá, pea ʻokú ne fakamatala fekauʻaki mo e ʻaho naʻe fakahoko ai ʻa e ouau ko iá.
ʻOku fakamahinoʻi ʻe Lōlie, “Ko e taimi lelei taha ia ke nofotaha ʻi he ngaahi tāpuaki ʻo e ngaahi fuakava fakatemipalé. ʻOkú ma fakapapauʻi maʻu pē ke akoʻi ko e fili ke papitaisó ko e ʻuluaki sitepu ia ʻi he teuteu ki he ngaahi tāpuaki ʻo e temipalé.”
ʻOku Tau ʻAi Ia ko ha Meʻa Fakafāmili
ʻOku fokotuʻu mai ʻe Mōnika, ko ha faʻē ki ha fānau e toko fā, ke fakakau ʻa e fānau ʻoku lalahí ʻi he tokoni ki he teuteu ʻa e fānau iiki angé ʻo ka lava. ʻOkú ne pehē, “ʻOku hanga ʻe heʻenau fanongo ki he fakamoʻoni mo e vahevahe ʻe honau tokouá pe tuofefiné taʻu hongofulu tupú ʻa ʻenau aʻusiá ʻo tānaki moʻoni mai ha mālohi.” ʻOku tānaki mai ki ai ʻa Lōlie ʻo ne pehē ʻokú na kole he taimi ʻe niʻihi ki he fānau ʻoku teuteu ke papitaisó ke nau akoʻi e meʻa kuo nau akó ki he fānau iiki hifó.
ʻOku Mau Fakaʻaongaʻi ia ko ha Meʻangāue Fakafaifekau
Ko e taimi naʻe hoko ai ʻe tau valu ʻo e ʻofefine ʻo Tanielá, naʻá ne ʻilo ʻe loto ke kau mai hono ngaahi kaungāmeʻa naʻe ʻikai kau ki he Siasí ki hono ʻaho papitaisó. Ko ia ne fakakaukau honau fāmilí ke nau fai ha fakaafe ki he ngaahi kaungāmeʻa ʻo ʻAlisoni ʻi he akó pea mo e kaungāʻapí ki hono papitaisó. Naʻe kole ki he ngaahi kaungāmeʻa ko ʻení ke nau omi mo ha ngaahi veesi folofola ʻoku nau saiʻia aí mei he Tohi Tapú ki he papitaisó. ʻI he ʻosi e papitaisó, naʻe fakaʻilongaʻi leva ʻe ʻAlisoni ʻa e ngaahi vēsí ʻi heʻene tohi folofola foʻoú pea mo hiki ʻa e hingoa ʻo hono ngaahi kaungāmeʻá ʻi he tafaʻakí.
“Ko hono moʻoní, ʻi heʻemau hoko ko hono fāmilí, naʻa mau kau kotoa he ʻaho ko iá.” Naʻe pehē ʻe Taniela, “Ka naʻa mau toe tuku pē foki ke feohi mo hono ngaahi kaungāmeʻá mo talanoa mo kinautolu fekauʻaki mo e meʻa naʻá ne ongoʻí. “Ko ha momeniti matuʻaki ongo moʻoni ke te mamata ki he tā-sīpinga ʻa ʻema taʻahiné.”
ʻOku Mau Akoako ʻa e ʻInitaviu ʻa e Pīsopé
ʻOku manatuʻi ʻe Kimipelī, ko ha faʻē ki ha fānau kuo taʻu papitaiso, ʻa ʻene hū atu ki he ʻōfisi ʻo e pīsopé ki hono ʻinitaviu papitaisó ʻi he taimi naʻe taʻu valu aí. “Naʻá ku fuʻu tailiili!” ʻOku pehē ʻe Kimipelī.
ʻOkú ne feinga ʻeni ke fakapapauʻi ʻoku ʻikai fehangahangai ʻene fānaú mo e ongoʻi puputuʻú. ʻOkú ne talanoa mo hono husepānití ki heʻena fānaú fekauʻaki mo e ʻinitaviu ʻa e pīsopé pea mo hono fai kiate kinautolu ha ngaahi fehuʻi fekauʻaki mo e papitaisó ʻi ha founga ʻoku hangē ha ʻinitaviú. ʻOku fai ʻe he ngaahi ʻinitaviu ko ʻení ha meʻa ʻo lahi ange ʻi hono fakataukeiʻi pē ʻo e fānaú ki he founga ʻinitaviú—ʻoku nau toe poupouʻi ʻa e fānaú ke nau fakakaukau lahi ange ki he ʻuhinga ʻo e fuakava ʻo e papitaisó kiate kinautolú.
ʻOku Mau Maʻu ha Faingamālie Lelei
ʻOku vave ʻa e ngaahi mātuʻa ko ʻení ke fakamahino kuo teʻeki ai ke nau fai ha fuʻu meʻa lahi fēfē ʻi hono teuteuʻi ʻenau fānaú ki he papitaisó mo e hilifakinimá, ka ko honau tokolahi naʻa nau fakaʻaongaʻi ha ngaahi lea hangē ko e “fakaʻaufulí” mo e “fenāpasí” ke fakamatalaʻi ʻaki e ngaahi lēsoni kuo nau akoʻi he ngaahi taʻu kuo maliu atú. ʻOku pehē ʻe Kimipelī, “ʻOkú ma fakapapauʻi ʻoku mahino ki heʻema fānaú ko ha sitepu mahuʻinga ʻeni ʻi heʻenau moʻuí, pea ko ha meʻa lahi ia. ʻOkú ma fakapapauʻi maʻu pē ko kimaua ʻokú ma teuteuʻi kinautolú, kae ʻikai ʻamanaki ke akoʻi kinautolu heʻenau kau faiako he Palaimelí.”
Ko ha faingamālie lelei moʻoni kuo tuku mai ke ma tokoni ʻi hono teuteu ʻo e fānau ʻokú ma ʻofa aí ki he papitaisó mo e hilifakinimá! ʻI heʻema fai ia ʻi he faʻa lotú, ʻe ʻiate kimaua ʻa e ʻEikí ke fatu ʻa e aʻusia ʻo e ʻuluaki fuakava ko ʻení ke hoko ko ha fakavaʻe mālohi ki he tupulaki fakalaumālie ʻi he kahaʻú.
Tā fakatātaaʻi ʻo e ʻatá ʻe John Luke, Craig Dimond, mo Cody Bell