Te u Maʻu ʻi fē Ha Makasini Tatau mo ʻEni?
Seuloni Lata, Nevata, USA
Lolotonga haʻaku fononga mo hoku fāmilí mei Nevata, USA, ki ʻAlasikā, USA, naʻá ku talanoa ai mo ha fefine lōloa, talavou pea mo anga fakakaumeʻa naʻe tangutu ʻi he tafaʻaki ʻe tahá.
Naʻá ne ʻeke mai pe ko ʻeku ʻalú ki fē, peá u talaange ko ʻemau ō ki Siuno, ʻAlasikā, ke ʻeva ki heʻema tamasiʻí mo hono fāmilí. Talamai ʻe ia ko ʻene haʻu mei Lasi Vēkesi. Naʻá ne talamai mo kamata ke fakapetepete tangi, ko ʻene ʻalu ki Sīnoa ke ʻaʻahi ki hono kāinga ʻi he fonó ke fakahoko ha ouau fakamanatu hono husepānití, ʻa ia ne na mali ʻi ha taʻu ʻe 20. Naʻe toki mālōloó ni pe ʻi he kanisaá.
Naʻá ku vakai atu ki he tafaʻaki ʻe tahá mo fakakaukau ʻiate au pē ki heʻeku monūʻia ke ʻilo e palani ʻo e fakamoʻuí mo hoko ko ha taha ngāue temipale ʻi he Temipale Lasi Vēkesi Nevatá. Naʻá ku fakakaukau pe ko e hā te u lava ʻo fai maʻá e fefiné ni ke fakafiefiaʻi hono lotó.
Fakafokifā pē, kuó u manatuʻi lelei ʻo hangē ha ongo ha fafangú, ha kupuʻi lea ne fai ʻe he Palōfita ko Siosefa Sāmitá naʻá ku tufa ʻi heʻema Fineʻofá. Ko e taimi naʻá ne fokotuʻu ai ʻa e Fineʻofá, naʻá ne pehē ko e houʻeiki fefiné “te nau ʻoatu [e meʻa te nau pule ki aí] ki hono tokoniʻi ʻo e mulí; te nau lilingi ha lolo mo ha uaine ki he loto kuo kafo ʻo e taha faingataʻaʻiá; te nau holoholoʻi ʻa e loʻimata ʻo e tamai maté pea mo fakafiefiaʻi ʻa e loto ʻo e uitoú” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 524).
Naʻá ku toe vakai atu ki he tafaʻaki ʻe tahá. Naʻá ku fakatokangaʻi ai ha sola ʻoku faingataʻaʻia, ko ha uitou ʻoku loto lavea. Naʻá ku manatuʻi ne u lau ʻa e Ensign ʻo Siulai 2011 ki muʻa ʻi he ʻaho ko iá. Naʻe ʻi ai ha ngaahi fakamatala langaki moʻui ne u pehē te ne ala ʻoange ki ai ha fakalotolahi mo ha fakafiemālie.
Ne u feinga leva ke u loto lahi, fakaava ʻa e makasiní ki he fakamatalá, peá u kole ange ke ne lau. Naʻá ku siofi fakalelei ia pea naʻá ku ʻohovale ʻi heʻene lau fakamātoato ʻa e ʻotu lea kotoa pē. Ko e taimi naʻe ʻosi aí, naʻá ne lau mo ha fakamatala ʻe taha.
ʻOku mahino naʻe ongo ki hono lotó ha meʻa naʻá ne lau. Naʻá ne kuku maʻu ʻa e makasiní ki hono fatafatá pea holoholoʻi e loʻimata ʻi hono fofongá.
“Te u maʻu ʻi fē ha makasini tatau mo ʻeni?” Ko ʻene fehuʻi mai ia kiate aú. Naʻá ku talaange ke ʻai ia maʻana. Pea toe hoko atu ʻene laukongá.
ʻI heʻemau aʻu atu ki Siuno, naʻá ne puke hoku nimá, sio fakamamaʻu ki hoku matá, pea pehē mai. “Mālō.”
Naʻá ku ako ha lēsoni maʻongoʻonga mei he aʻusia ko iá. ʻOku ʻākilotoa kitautolu ʻe ha kau sola mo ha ngaahi loto lavea ʻoku nau fie maʻu ha lea ʻofa ʻo e fakalotolahi pea mo fie ʻilo ʻa e meʻa ʻoku ʻilo ʻe kitautolu Kau Māʻoniʻoni ʻi he Ngaahi ʻAho Kimui Ní.