ʻI he Siasí Fakakātoa

Ko e Kole ke ‘Omi ha Ngaahi Tā ‘o e Toʻu Tupú

Ko e kaveinga ‘o e Mutualé ki he taʻu ní ko e “Mou tuʻu ‘i he ngaahi potu toputapú pea ‘oua ‘e hiki mei ai” (T&F 87:8). ‘E kau talavou mo e kau finemui ‘oku fie maʻu ‘e he Liahoná hamou ngaahi tā ‘oku mou tuʻu ‘i ha ngaahi potu toputapu. ‘E lava ‘o ‘asi ‘i he ngaahi taá haʻamou fakaʻaongaʻi ha taimi ke mou feohi ai mo e fāmilí, ngāue tokoni, fai e ngāue fakafaifekaú, faʻu ha ‘aati, ako e ongoongoleleí, fekumi ʻi natula, mo ha ngaahi meʻa lahi ange! Ko e founga ‘eni ke ‘omi ai homou taá:

• Kole ki ha taha ke ne faitaaʻi kimoutolu ‘oku mou tuʻu ‘i ha potu toputapu.

• ‘Īmeili mai homou tā ‘ata leleí ki he [e-mail].

• Fakakau ai ha kiʻi fakamatala ki he ‘uhinga ‘oku hoko ai ia ko ha potu toputapu kiate koé.

• Kātaki ‘o fakakau mai ‘i hoʻo ‘īmeilí ho hingoa kakató, ‘aho fāʻeleʻí, hingoa ‘o ho uōtí mo e siteikí (pe koló mo e vahefonuá), mo ha tuʻasila ‘īmeili ki hoʻo ongomātuʻá.

‘E pulusi atu ‘a e ngaahi taá ‘i ha pulusinga ‘o e Liahoná ‘i he kahaʻú.

‘Aʻahi ha ‘Aposetolo ki Moloko

Naʻe hili hano fokotuʻu ‘i Tīsema 2012 ‘e ‘Eletā Sefilī R. Hōlani ‘o e Kōlomu ‘o e Kau ‘Aposetolo ‘e Toko Hongofulu Mā Uá ‘i Siela Leone, ‘i ‘Afilika Hihifo ‘a e siteiki hono 3,000 ‘o e Siasí, naʻá ne fai ai ha ‘aʻahi makehe ki ha kiʻi kolo ‘o e Siasí ‘i Lapati, ‘i Moloko.

Naʻe fakahā ai ‘e ‘Eletā Hōlani ‘i ha fakataha lotu makehe ‘i he efiafi Sāpaté, ‘a e ‘ofa e kau taki ‘o e Siasí ki he kāingalotu ‘o e Siasí ‘i ha feituʻu pē ‘o e māmaní, ‘o tatau ai pē pe ko e hā honau tokolahí pe ko hono mamaʻo ‘o e feituʻu ‘oku nau nofo aí.

Naʻá ne pehē, “ʻOku ‘ikai te mou ngalo, pea ‘oku mou hoko ko e konga ‘o ha ngāue fakaofo ‘i hono kumi mo fakavaveʻi ‘e he ‘Eikí ‘a ‘Ene ngāue ki hono tānaki ‘o ‘Isilelí ‘i he kuonga fakakosipeli maʻongoʻonga fakaʻosi ko ‘ení.”

Fakatapui ‘o e Temipale Tekusikalapa Honitulá

Naʻe fakatapui ‘a e Temipale Tekusikalapa Honitulá ‘i ha fakatahaʻanga ‘e tolu na‘e fakamafola ki he ngaahi ‘iuniti kotoa ‘o e Siasí ‘i Honitula mo Nikalākuá ‘i he ‘aho Sāpate, 17 ʻo Māʻasi 2013, hili ha kātoanga faiva fakafonua mo ha ‘oupenihausi uike ‘e tolu.

Kuo anga ‘a e kāingalotu Honitulá ki heʻenau fononga ‘i ha ngaahi houa lahi ki he Temipale Kuatemala Siti Kuatemalá, ka naʻa nau fiefia ‘i heʻenau mamata ki hono fakatāpui ‘o e ‘uluaki temipale ‘i honau fonuá. Naʻe ‘uluaki fanongonongo ‘e he Kau Palesitenisī ‘Uluakí hono langa ‘o e temipalé ‘i ha tohi ‘i he ‘aho 9 ‘o Sune 2006, pea tāpuakiʻi ‘a e kelekele ‘o e feituʻu ‘oku tuʻu aí ‘i he ‘aho 12 ‘o Sepitema 2009.

‘Aʻahi ‘a Palesiteni Tōmasi S. Monisoni ki Siamane

Naʻe folau ‘a Palesiteni Tōmasi S. Monisoni ‘i he konga kimui ‘o e 2012 ki Siamane ke feʻiloaki mo e kāingalotu ‘o e Siasí ‘i Hemipeeki, Pealini, Miuniki, mo Felengifuti, Siamane, peá ne naʻinaʻi ai kiate kinautolu ke nau muimui kia Sīsū Kalaisi.

Naʻá ne talaange ki he kāingalotu ‘i Felengifutí, “Naʻá Ne akoʻi ‘a e faʻa fakamolemolé ‘i Heʻene fakamolemoleʻi ‘a e kakaí.” “Naʻá Ne akoʻi ‘a e manavaʻofá ‘i He‘ene manavaʻofá. Naʻá Ne akoʻi ‘a e moʻui mateakí ‘i Heʻene foaki ‘Ene moʻuí.”

‘Oku fakahaaʻi ‘e he toʻu tupu ‘o māmaní ‘a e anga ‘o ‘enau tuʻu ‘i he ngaahi potu toputapu.