Ako Fakatakimuʻa Fakaemāmani Lahí—ko ha Founga Foʻou
‘I he ngaahi māhina ka hokó, ʻe kau e kāingalotu ‘o e Siasí ‘i he māmaní kotoa ki ha founga foʻou fakaumālie ‘o e Ako Fakatakimuʻa Fakaemāmani Lahí.
He ‘ikai hangē ‘eni ko e ngaahi Ako Fakatakimuʻa Fakaemāmani Lahí ‘o e ngaahi taʻu kuo hilí, ‘a ia he ‘ikai fakamafola atu ‘i ha fakataha pē ‘e taha maʻá e kau taki fakauōtí mo fakasiteikí. Ka, ‘oku vahevahe ia ki ha ngaahi kongokonga iiki ‘e hiva—‘o ‘oatu ‘i ha DVD pea ‘i he LDS.org—ʻa ia ‘okú ne poupouʻi e fealēleaki ʻa e kotoa ʻo e kau takí, kāingalotú, mo e ngaahi fāmilí ‘i he taʻú ni mo e ngaahi taʻu ka hokó.
ʻOku nofotaha e akó ʻi hono “Fakamālohia ‘o e Fāmilí mo e Siasí ‘i he Lakanga Fakataulaʻeikí.” ‘Oku fai atu ʻi he akó ha ngaahi fakahinohino fakalaumālie ‘e he kau mēmipa ‘o e Kau Palesitenisī Uluakí mo e Kōlomu ‘o e Kau ‘Aposetolo ‘e Toko Hongofulu Mā Uá, mo e Kau Taki Māʻolunga mo e kau ʻōfisa lahi kehé ‘o kau ki he:
-
Ko e founga ‘e maʻu ai ‘e he fāmilí ha ivi mo ha melino tuʻunga ‘i he mālohi ‘o e lakanga fakataulaʻeikí.
-
Ko e founga ki hono tokoniʻi ‘o e fāmili kotoa pē ke nau aʻusia e ngaahi tāpuaki ‘o e lakanga fakataulaʻeikí.
-
Ko e founga ‘oku fakamālohia ai e ‘apí mo e fāmilí ‘e kinautolu ‘oku nau maʻu ‘a e ngaahi kī ‘o e lakanga fakataulaʻeikí.
-
Ko e founga ke fakahoko ai e ngāué ‘i he ngaahi founga ‘oku faka-Kalaisí.
-
Ko e founga ki hono ʻohake ‘o e fānaú ‘i he māmá mo e moʻoní.
‘E maʻu ‘e he ngaahi ‘iuniti kotoa ‘o e Siasí ha tatau ʻo e foʻi DVD, pea ‘oku kole atu ki he ngaahi fakataha alēlea fakauōtí mo fakasiteikí ke nau sio ‘i he foʻi DVD kotoa. Ka ‘osi ia pea nau fealēleaʻaki fakataha leva ki ha founga ke tokoniʻi ai ‘a e kāingalotu ‘o e uōtí mo e siteikí ke ‘aonga kiate kinautolu ‘a e ngaahi fakahinohinó.
‘E lava ‘e he kaingalotú ‘o sio mo aleaʻi ha ngaahi konga ‘o e foʻi DVD ‘i ha ngaahi fakataha mo ha ngaahi kalasi. ‘E lava ‘e he fāmilí mo e niʻihi fakafoʻituituí ‘o sio ‘i hano ngaahi konga, fakataha mo ha ngaahi maʻuʻanga tokoni kehe ke fakafaingamālieʻi ‘enau akó, ‘i he wwlt.lds.org.
ʻI he tūkunga kotoa pē, ‘e hoko ‘a e konga mālohi taha ‘o e akó, ‘i he taimi ‘oku ‘osi ai hoʻomou sio ‘i he konga taki taha, pea kamata hoʻomou fealēleaʻaki ‘o kau ki aí. ʻI he taimi ʻoku fakalaulauloto, fevahevaheʻaki, mo fakamoʻoni ai ‘a e kau takí, kāingalotú, mo e fāmilí ʻo kau ki he ngaahi meʻa kuo nau fanongo ki ai mo ongoʻí, ‘e ueʻi hake mo akoʻi kinautolu ‘e he Laumālie Māʻoniʻoní ki he founga ke nau fakahoko ai e fakahinohinó ‘i he ngaahi tuʻunga taki taha ‘oku nau ‘i aí. ʻI he ngaahi aʻusia ko ʻení, ‘e tokoni ‘a e Ako Fakatakimuʻa Fakaemāmani Lahi ko ‘ení ke fakamālohia ‘a e familí mo e Siasí ‘i he māmaní kotoa.
ʻOku tataki ‘e ‘Eletā L. Tomu Peuli, ‘Eletā Tōnolo L. Holositoloma, mo Pīsope Tiini M. Teivisi ha fealēleaʻaki fakapēnolo ki hono ngāue ʻaki e ngaahi kī ‘o e lakanga fakataulaʻeikí.
‘Oku tuʻu ‘i tuʻa ‘i he Fale ‘o Mele Filitingi Sāmitá ‘i he Paʻake Tukufakaholo Ko e Feituʻú ʻEni (This Is the Place Heritage Park), ‘a ‘Eletā M. Lāsolo Pālati, Linitā K. Peatoni, ‘Eletā Lainolo A. Lasipeni, ‘Ileini S. Tolotoni, Losemalei M. Uikisomi, mo Pīsope Keuli F. Sitīvenisoni, ‘o nau fakamatala ki he ngaahi tāpuaki ‘o hono maʻu ‘o e lakanga fakataulaʻeikí ‘i he ‘api kotoa pē.