Maʻu ʻe he Kau Faifekau Kei Talavou Ngāue Tokoni ʻo e Siasí ʻa e Fiefia ʻi he Ngāue Tokoní
Naʻe tui ‘e ‘Eletā ‘Enesitō Salapia ha pine faifekau lanu ‘uluʻuli ‘i he ‘aho kotoa pé ‘o ‘ene ngāue fakafaifekaú. Ka naʻe kehe ‘ene ngāue fakafaifekaú mei he ngāue ‘a ha niʻihi tokolahi kehe—naʻe hoko ‘a ‘Eletā Salapia ko ha faifekau kei talavou ngāue tokoni ʻa e Siasí (YCSM) ‘i he ‘ōfisi ‘o e Misiona Mekisikou Hemosiló.
Naʻe pehē ‘e ‘Eletā M. Lāsolo Pālati ‘o e Kōlomu ‘o e Kau ‘Aposetolo ‘e Toko Hongofulu Mā Uá, “ʻOku mau ‘iloʻi ‘oku ‘ikai fakapotopoto ki ha niʻihi ‘o hotau kau talavoú mo e kau finemuí ke nau fetaulaki mo e ngaahi faingataʻa mo e ngaahi tukupā ‘o e ngāue fakafaifekau taimi kakató. Ka naʻá ne pehē, [ka ‘oku ‘ikai ‘uhinga ia he ‘ikai te nau lava ‘o kau ki he ngaahi tāpuaki ‘o e ngāue fakafaifekaú]” (“Ha Toe Toko Taha,” Liahona, Mē 2005, 69).
Naʻe pehē ‘e ‘Eletā Lāsolo M. Nalesoni ‘o e Kōlomu ‘o e Kau ‘Aposetolo ‘e Toko Hongofulu Mā Uá, “Ko e ngāue fakafaifekaú ko ha ngāue taʻe fakakounaʻi ia maʻá e ʻOtuá mo e faʻahinga ʻo e tangatá” (“ʻEke ki he Kau Faifekaú! Te Nau Lava ʻo Tokoniʻi Koe!” Liahona, Nōvema 2012, 18), pea ‘oku lahi ha ngaahi founga ‘oku lava ‘o fakahoko ai e tokoni ko iá.
‘Oku lava ke ‘omi ‘e he polokalama YCSM ha ngaahi aʻusia mahuʻinga ki he ngāue fakafaifekaú maʻanautolu ‘oku fakaʻatā ʻi he fakalangilangi mei he ngāue fakafaifekau malanga taimi kakató, pe ko kinautolu kuo pau ke nau foki ki ‘api ‘oku teʻeki ‘osi honau taimi ngaue fakafaifekaú.
Ngaahi Meʻa ‘oku Fie Maʻu ki he Ngāué
Kuo pau ke malava fakaesino, fakaeʻatamai, fakalaumālie, mo fakaeloto ‘a e kau faifekau YCSM, ‘o fakahoko ‘a e ngaahi fatongia ‘o honau uí, ‘a ia kuo vakaiʻi lelei te nau lava ‘o faí.
‘Oku kehekehe pē ‘a e taimi ngāue ‘o e kau faifekau YCSM, mei he māhina ‘e 6 ki he mahina ‘e 24, pea ‘oku lava ke kau ai haʻanau ngāue ‘i ha ‘aho pē ‘e ua he uike pe ngāue taimi kakato. ‘Oku ‘i ai ‘a e ngaahi faingamālie ke ngāue ‘i he koló pea pehē pē mei ‘api. ‘Oku kau ‘i he ngaahi ngāue ‘oku lava ke fai ‘e he kau faifekau YCSM ‘a e fakatotolo ‘i he hisitōlia fakafāmilí, ngāue ʻaki ‘o e ngaahi meʻangāue ki he fetuʻutakí, kau tokoni ‘i he ‘ōfisi fakamisioná, ngaahi fale tukuʻanga koloa ‘o e pīsopé mo ha ngaahi ngāue lahi kehe.
Poupou ‘a e Fāmilí mo e Lakanga Fakataulaʻeikí
‘Oku lava ke tokoniʻi ‘e he mātuʻá, kau taki lakanga fakataulaʻeikí, mo e kāingalotu ‘o e Siasí ‘a e kau teuteu ngāue fakafaifekau YCSM ke nau teuteu ke ngāue fakafaifekaú.
Naʻe hoko ‘a e fāmili ‘o Sisitā ‘Ilisa ‘Iongí ko ha poupou mālohi kiate ia, ‘i hono ‘ave mo fakafoki ia mei he ngaahi ‘ōfisi ‘o e Siasí ‘i Senē, ‘Aositelēlia.
Naʻe pehē ‘e ‘Eletā Maikolo Heilami, ‘a ia ‘oku ngāue ‘i he Senitā Tufakiʻanga Nāunau ‘i Hongo Kongó, “Naʻe tokoniʻi au ‘e heʻeku kau faiako semineli pongipongí mo e kau taki ‘o e Kau Talavoú ke u mateuteu.”
‘Oku ‘Omi ‘e he Feilaulaú ‘a e Ngaahi Tāpuakí
Naʻe feilaulauʻi ‘e Sisitā ‘Iongi hono ‘aho ‘atā mei heʻene ngāue fakataimí ke ngāue ko ha faifekau ngāue tokoni maʻá e Siasí. Naʻá ne pehē, “ʻOku ou ongoʻi ofi ange ki heʻeku Tamai Hēvaní ‘i heʻeku ‘iloʻi ‘oku ou tokoni kiate Ia.”
‘Oku ‘ikai ke ngata ‘i hono maʻu ‘o e ngaahi tāpuaki fakalaumālié, ka ‘oku maʻu foki ‘e he niʻihi kei talavou ʻoku nau hoko ko ha kau faifekau kei talavou ngāue tokoni maʻá e Siasí ha ngaahi faingamālie fakasōsiale mo fakapalōfesinale. Naʻe pehē ‘e Sisitā ‘Iongi, “Kuó u ‘ilo ‘i heʻeku ngāue fakafaifekaú te u lava ʻo ngāue ʻi ha faʻahinga ngāue pē.” (Naʻá ne ngāue pē kimuʻa ‘i he feituʻu ‘oku tokoniʻi ai ‘a e kau ngāué ‘i heʻenau ngāué.)
Neongo he ‘ikai lava ‘o ngāue ‘a e kakai lalahi kei talavou kotoa pē ‘oku fie ngāué, ka ‘oku fai ‘a e feinga lahi ke fakakau ‘a e kakai lalahi kei talavou moʻui taau kotoa pē. ‘Oku lava ‘a e kau talavou mo e kau finemui ‘oku nau fie ngāue ‘i he founga ko ‘ení, ‘o talanoa ki heʻenau pīsopé pe palesiteni fakakoló, pea te nau lava ‘o kumi ha ngaahi faingamālie ‘oku feʻunga mo kinautolú.
Lau ha ngaahi fakamatala lahi ange ‘i he news.lds.org ʻaki haʻo fekumi ʻi he “young church-service missionaries”