ʻAʻahi ʻa e Kau Taki Lahi ʻo e Kau Finemuí mo e Fineʻofá ki he ʻĒlia ʻo ʻĒsiá
Naʻe fakahinohinoʻi mo ueʻi hake ‘e Mele N. Kuki, tokoni ‘uluaki ‘i he kau palesitenisī lahi ‘o e Kau Finemuí mo Linitā S. Liivi, tokoni ua ‘i he kau palesitenisi lahi ‘o e Fineʻofá, ‘a e houʻeiki fafiné, ‘a e iiki mo e lalahi ‘i he ‘Ēlia ‘o ‘Ēsiá ‘i ha ‘aho ‘e hiva ‘i Nōvema ‘o e 2012.
Naʻe fai ‘a e ‘aʻahi ko ‘ení ‘o feʻunga mo e taimi ʻo hono fanongonongo hono fakafoʻou ‘o e tohi lēsoni maʻá e toʻu tupú Haʻu, ‘o Muimui ‘Iate Aú, ‘a ia ‘e kamata hono ngāue ʻaki ‘i Sānuali 2013 ‘e he ngaahi kalasi ‘a e Kau Talavoú, Kau Finemuí mo e ngaahi kalasi ‘a e toʻu tupú ‘i he Lautohi Faka-Sāpaté. Naʻe faʻu ‘a e nāunau fakalēsoni foʻoú ke tokoniʻi ‘a e kau faiakó ke nau faiako ‘o hangē ko e faiako ‘a e Fakamoʻuí, pea nau fokotuʻu ha ngaahi fehokotaki ‘oku mālohi ange mo e kau mēmipa ‘o e kalasí.
Hili ‘a e ‘aʻahi ‘a Sisitā Kuki mo Sisitā Līví, naʻe tokolahi ha toʻu tupu ‘o ‘Ēsia mo ‘enau mātuʻá naʻa nau pehē ‘oku nau vēkeveke lahi ange he taimí ni ke fakahaohaoaʻi mo toe tokanga ange ʻi heʻenau moʻuí pea nau hoko ko ha faʻifaʻitakiʻanga ki honau ngaahi kolo fakalotofonuá.
Naʻe palōmesi ange ‘e Sisitā Liivi ki he toʻu tupu ʻi Hongo Kongó, “Kapau te mou tauhi kimoutolu ke mou moʻui maʻa, te mou lava ‘o tuʻu ‘i he loto toʻa ‘i he ‘ao ‘o ha taha pē!”
Naʻe ueʻi hake ‘e heʻene leá ‘a e finemui taʻu 12 ko Teni Kaki Kei ke ne pehē ‘i he hili ‘a e fakatahá, “ʻOku ou ‘iloʻi ‘oku fie maʻu ke u lau e Tohi ‘a Molomoná ‘i he ‘aho kotoa pē. Kuo akoʻi au ‘e he Ki Hono Fakamālohia ‘o e Toʻu Tupú ke u fakatomala mo moʻui māʻoniʻoni, koeʻuhí ke ulo atu meiate au ‘a e Maama ‘o Kalaisí mo e fiefia moʻoní.”
Naʻe fakataha ‘a Sisitā Kuki ‘i ‘Initia mo e kāingalotú ‘i ha fale lotu foʻou ‘i he Vahefonua Senai ‘Initiá mei he Siteiki Haitapeti ‘Initiá ‘o ne naʻinaʻi ki he kakai lalahi kei talavoú ke nau teuteu ki he kahaʻú. Naʻá ne naʻinaʻi ke nau “Teuteuʻi fakaako ‘a kimoutolu, ʻaki e ngaahi poto fakangāue ke tokoniʻi koe ke langa e puleʻanga ‘o e ‘Otuá. Mou tokanga taha ki homou fāmilí mo e meʻa te mou lava ‘o fai ke tāpuekina ai e kau mēmipa ‘o homou fāmilí, pea ki hoʻomou mateuteu fakalaumālié koeʻuhí ke mou taau mo feʻunga mo e ueʻi ngaahi fakalaumālié koeʻuhí ke mou ‘iloʻi ‘a e feituʻu ke mou ‘alu ki aí mo e meʻa ke mou faí.”
Naʻe kau atu ‘a Sisitā Liivi ‘i ‘Initonēsia ʻi he ‘uluaki konifelenisi fakasiteiki ‘a e Siteiki Sulakāta ‘Initonēsia foʻoú. “Naʻa mau ongoʻi honau laumālie fakatōkilalo mo ‘ofá. Ko ha kāingalotu faivelenga moʻoni!” ko ʻene leá ia.
Naʻe hoko atu leva e ‘aʻahi ‘a Sisitā Līví ki Maleisia, ‘a ia naʻá ne fealēleaʻaki ai mo ha kulupu ‘o e kau Fineʻofá ‘o kau ki he ngaahi meʻa ‘oku mahuʻinga taha ki he houalotu Fineʻofa ‘i Maleisiá, mo e founga ‘e lava ai ‘e he Siasí ‘o ʻoatu ha fakahinohino mo ha ueʻi fakalaumālie.
Naʻe lea ‘a Sisitā Liivi ‘i Taiuani ‘o kau ki he ivi mo e tui mateaki ‘a e kāingalotu fakalotofonuá. Naʻá ne pehē, “ʻOku mau fiefia ke ‘iloʻi ‘enau moʻui faivelengá mo ‘enau alu maʻu pē ki he temipalé. … ‘Oku hoko ‘a e kāingalotú ko ha ngaahi faʻifaʻitakiʻanga ‘o e ofa ki honau kaungāmeʻá mo e kaungāʻapí.”
Naʻe fakataha ‘a Mele N. Kuki mo Linitā S. Liivi ‘i Taiuani mo e kau kau taki fakaʻēliá mo e kau taki lakanga fakataulaʻeiki mo e kāingalotu ‘o Taiuaní.
Faitaaʻi ‘e Yang Chieh-wen