Ko e Meʻa ʻOku Tau Tui Ki Aí

Ko e Laumālie Māʻoniʻoní ʻOkú Ne Fakafiemālieʻi, Ueʻi Fakalaumālie, mo Fakamoʻoniʻi

Ko e meʻafoaki ʻo e Laumālie Māʻoniʻoní ko e taha ia ʻo e ngaahi meʻafoaki maʻongoʻonga taha ʻe lava ke tau maʻu ʻi he moʻui ní, he ʻoku fakafiemālieʻi, ueʻi fakalaumālie, fakatokanga, fakamaʻa, pea mo tataki kitautolu ʻe he Laumālie Māʻoniʻoní. Te ne lava ʻo fakafonu kitautolu “ʻaki ʻa e ʻamanaki lelei mo e ʻofa haohaoa” (Molonai 8:26). ʻOkú ne akoʻi “hono moʻoni ʻo e ngaahi meʻa kotoa pē” (Molonai 10:5). ʻOku tau maʻu ʻa e fakahaá mo e ngaahi meʻafoaki fakalaumālié mei he ʻOtuá ʻo fou he Laumālie Māʻoniʻoní. Ko e mahuʻinga tahá, ʻoku tau maʻu ʻetau fakamoʻoni ki he Tamai Hēvaní mo Sīsū Kalaisí ʻo fou mai he Laumālie Māʻoniʻoní.

Naʻe lava ke ke ongoʻi ʻa e Laumālie Māʻoniʻoní mei he taimi ki he taimi, ki muʻa peá ke toki papitaisó. Ka ʻoku toki lava pē ʻo maʻu ʻa e meʻafoaki ʻo e Laumālie Māʻoniʻoní ʻi he hili ho papitaisó ke ke maʻu ai ʻa e takaua ʻa e Laumālie Māʻoniʻoní, ʻo kapau ʻokú ke moʻui taau. Naʻe foaki ʻa e meʻafoakí ʻe ha taha maʻu Lakanga Taulaʻeiki Faka-Melekisēteki ʻi he hilifaki ʻo e nimá (vakai, Ngāue 19:6; T&F 33:15). Talu mei ai, te ke lava ʻo fakafoʻou ʻa e ngaahi fuakava ho papitaisó ʻi he Sāpate kotoa pē, ʻi hoʻo maʻu ʻa e sākalamēnití ʻo maʻu ai ʻa e tāpuaki ʻa e ʻEikí ke ʻiate koe “maʻu ai pē ʻa Hono Laumālié” (T&F 20:77).

Ko e Laumālie Māʻoniʻoní, ʻa ia ʻoku faʻa ui ko e Laumālié, ko e mēmipa ia hono tolu ʻo e Toluʻi ʻOtuá. Naʻe akoʻi ʻe he Palōfita ko Siosefa Sāmitá: “ʻOku maʻu ʻe he Tamaí ʻa e sino ʻo e kakano mo e hui ʻoku ongoʻingofua tatau mo e sino ʻo e tangatá; pehē foki mo e ʻAló; ka ʻoku ʻikai maʻu ʻe he Laumālie Māʻoniʻoní ʻa e sino ʻo e kakano mo e huí, ka ko e tokotaha ia ko e laumālie pē. Ka ne ʻikai ke pehē, ʻe ʻikai lava ʻe he Laumālie Māʻoniʻoní ke nofoʻia ʻa kitautolu” (T&F 130:22).

“Koeʻuhí ʻoku ʻikai ke ʻafio ʻa e Laumālie ʻo e ʻEikí ʻi he ngaahi temipale ʻoku taʻe-māʻoniʻoni” (Hilamani 4:24), kuo pau ke tau feʻunga mo ʻEne feohí. ʻOku kau ʻi he ngaahi meʻa kehe ʻoku tau fakahokó, ʻa ʻetau maʻu ha ngaahi fakakaukau ʻoku maʻa, moʻui angatonu, pea mo feinga ke tauhi ʻa e ngaahi fekaú.

Te tau lava hili ʻo ʻetau maʻu ʻa e meʻafoaki ʻo e Laumālie Māʻoniʻoní ke fai ha ngaahi meʻa lahi ke fakaafeʻi Hono ivi takiekina ki heʻetau moʻuí.

• Lotu.

• Ako ʻa e folofolá.

• Maʻu ʻa e sākalamēnití ʻi he tuʻunga taau.

• Lotu ʻi he temipalé.

• Mamata ʻi he ngaahi meʻa fakamītia ʻoku fakatupulakí, ngāue ʻaki e ngaahi lea ʻoku maʻá, mo maʻu e ngaahi fakakaukau maʻa.

Ke maʻu ha fakamatala lahi ange, vakai, 2 Nīfai 31:13, 17; 32:5; 3 Nīfai 27:20; Molonai 10:5–8; Siosefa Sāmita—Hisitōlia 1:70.

Kuo Pau Ke ʻOua Naʻa Tau Meʻa-vaʻinga ʻAki e Meʻafoaki ko ʻEní

“Hangē ko e meʻafoaki kotoa pē, kuo pau ke maʻu, tali lelei mo fakaʻaongaʻi lelei e meʻafoaki ko ʻení. ʻI he taimi ʻoku hilifaki ai ʻe he kau maʻu lakanga fakataulaʻeiki honau nimá ki ho ʻulú pea fakamaʻu koe ko ha mēmipa ʻo e Siasí, ʻokú ke fanongo ki heʻenau leaʻaki, “Maʻu e Laumālie Māʻoniʻoní.’ Naʻe ʻikai ʻuhinga ʻeni ia ne hoko tuʻungaʻa pē ʻa e Laumālie Māʻoniʻoní ko hao takaua maʻu pē. ʻOku fakatokanga mai ʻa e folofolá ʻe ‘ʻikai ʻahiʻahi maʻu ai pē [ia] mo e tangatá’ (Sēnesi 6:3). ʻI he taimi ʻoku hilifakinima ai ʻo fakamaʻu kitautolu ko ha mēmipá, ʻoku foaki mai kiate kitautolu ʻa e totonu ke maʻu e tākaua ʻo e Laumālie Māʻoniʻoní, ka ko ha totonu ia kuo pau ke hokohoko atu ʻetau ngāueʻí ʻo fakafou ʻi heʻetau talangofuá mo ʻetau moʻui tāú.”

ʻEletā Joseph B. Wirthlin (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ko e Meʻaʻofa Taʻe-mafakamatalaʻí,” Liahona, Mē 2003, 28.

Ngaahi tā fakatātaá naʻe fai ʻe Christina Smith, Eve Tuft, Cody Bell, mo Matthew Reier