Founga ke Ngāue ai he Ngaahi Ui ʻI HE Lakanga Fakataulaʻeikí
Mei ha lea ʻi he konifelenisi lahi ʻo ʻEpeleli 1987.
Kuó ke fakakaukau nai ki hono mahuʻinga ʻo e laumālie ʻo e tangatá? Kuo faifaiangé peá ke fakakaukau ki he tuʻunga te tau malavá ʻoku ʻiate kitautolu takitahá?
Naʻá ku ʻalu ki ha konifelenisi fakasiteiki ʻe taha ne huke hake ai ʻe heʻeku palesiteni fakasiteiki ki muʻa ko palesiteni Paula C. Sailá (Paul C. Child) ki he Tokāteline mo e Ngaahi Fuakava 18 ʻo ne kamata lau: “Manatu, ʻoku mahuʻinga lahi ʻa e ngaahi laumālié ʻi he ʻao ʻo e ʻOtuá” (veesi 10).
Pea toki fehuʻi leva ʻe Palesiteni Saila, “Ko e hā e mahuʻinga ʻo e laumālie ʻo e tangatá?” Naʻe ʻikai ke ne tuku ki ha pīsope, palesiteni fakasiteiki, pe alēleaʻanga māʻolunga ke tali. Ka naʻá ne fili ʻa e palesiteni ʻo ha kōlomu ʻo e kaumātuʻá.
Naʻe fakalongolongo ʻo fuoloa ʻa e tangata ʻohovalé ni peá ne toki fakahā, “Ko e mahuʻinga ʻo e laumālie ʻo e tangatá ʻa ʻene malava ke hoko ko e ʻOtuá.”
Naʻe fakakaukauʻi ʻe he taha kotoa naʻe ʻi aí ʻa e tali ko iá. Naʻe hoko atu ʻa Palesiteni Saila ʻi heʻene pōpoakí, ka ne u kei fakakaukau pē au ki he tali fakalangí ni.
Ke aʻu, akoʻi, pea mo ala atu ki he ngaahi laumālie mahuʻinga naʻe teuteuʻi heʻetau Tamaí ki Heʻene pōpoakí, ko ha ngāue kāfakafa ia. ʻOku tātātaha ke faingofua ʻa e Ikuná. ʻI he angamahení ʻoku muiaki mai ia ʻi he loʻimatá, ʻahiʻahiʻí, falalá, mo e fakamoʻoní.
ʻOku fakafiemālie ki he kau tamaioʻeiki ʻa e ʻOtuá ʻa e fakamahino mei he ʻEikí: “ʻOku ou ʻiate kimoutolu maʻu ai pē” (Mātiu 28:20). ʻOku pouaki ʻe he palōmesi fakaʻofoʻofá ni homou houʻeiki tangata ʻi he Lakanga Taulaʻeiki Faka-ʻĒloné kuo ui ki ha ngaahi fatongia fakatakimuʻa ʻi he kōlomu ʻo e kau tīkoní, akonakí, mo e kau taulaʻeikí. ʻOkú ne poupouʻi kimoutolu ʻi hoʻomou teuteu ke ngāue ʻi he malaʻe ngāue fakafaifekaú. ʻOkú ne fakafiemālieʻi kimoutolu ʻi he lolotonga ʻo e ngaahi momeniti ʻo e lotofoʻí, ʻa ē ʻoku hoko ki he taha kotoá.
ʻOku folofola ʻa e ʻEikí, “Ko ia, ʻoua naʻa mo fiu ʻi he faileleí, he ʻokú mo ʻai ʻa e tuʻunga ʻo ha ngāue lahi. Pea ʻoku tupu mei he ngaahi meʻa īkí ʻa e ngaahi fuʻu meʻa lalahí.
Vakai, ʻoku fie maʻu ʻe he ʻEikí ʻa e loto mo e ʻatamai fie faí” (T&F 64:33–34). ʻOku fakafōtunga maʻu pē ʻe he tui taʻe-tūkuá, falala tuʻuloá, mo ha holi vivili ʻa kinautolu ʻoku nau tauhi ki he ʻEikí ʻaki honau lotó kotoá.
Kapau ʻoku ʻi ai ha houʻeiki tangata ʻoku nau ongona hoku leʻó ʻoku nau ongoʻi taʻe-mateuteu, pea taʻe malava ke tali ʻa e ui ke ngāue, feilaulau, pe ke tāpuakiʻi siʻi moʻui ʻa e kakai kehé, manatuʻi ʻa e foʻi moʻoni: “Ko ia ʻoku ui ʻe he ʻOtuá, ʻoku fakafeʻungaʻi ʻe he ʻOtuá.”
Tā fakatātā ʻo e ʻatá ʻe Cody Bell© IRI