Fealēleaʻaki mo e ʻEikí

ʻEtuato ʻOliveila, Siala, Palāsila

ʻI hoku taʻu 15, naʻá ku manako ʻi ha taʻahine ʻi heʻeku kalasi he ʻakó mo loto ke u teiti mo ia. Naʻe talavou, ka naʻá ku fakakaukau pe ʻoku totonu ke u kole ki ai ʻoku teʻeki hoko hoku taʻu 16. Naʻá ku manatuʻi e ʻAlamā 37:37, ʻa ia ʻoku pehē, “Fealēleaʻaki mo e ʻEikí ʻi he meʻa kotoa pē te ke faí, pea te ne fakahinohinoʻi koe ʻi he meʻa ʻoku leleí.” Pea ko e meʻa ia naʻá ku faí. Naʻá ku lotu pea tatali ʻi ha ngaahi ʻaho ki he tali ʻa e ʻEikí kae toki fai haʻaku fili.

Ne ui au ʻe he pīsopé ʻi ha ʻaho ʻe taha ʻi he lotú ki hono lokí ʻo fakaafeʻi au ke u lea ʻi he Sāpate hono hokó. Mateʻi mai pe ko e hā e tefitó? ʻOua te ke teiti kae ʻoua kuó ke taʻu 16. Naʻá ku ongoʻi ko e tali ʻeni ʻa e ʻEikí kiate aú, ʻa ia ko e ʻikai. ʻE anga fēfē nai haʻaku akoʻi ha meʻa ʻoku ʻikai ke u fai?

Koeʻuhí naʻá ku ʻosi fealēleaʻaki mo e ʻEikí, naʻá ku lava ke ʻilo ʻa e finangalo ʻo e ʻEikí ki heʻeku moʻuí pea mo hola foki mei he fakatauelé. ʻOku ou ʻilo kapau te tau fealēleaʻaki mo e ʻEikí, te Ne talamai Hono finangaló pea ʻe tāpuekina lahi kitautolu.