Ngaahi Fehuʻi mo e Talí
“ʻE anga fēfē haʻaku fakamatalaʻi ki hoku kaungāmeʻá ʻa e ʻuhinga ʻoku ʻikai ai ko ha fakakaukau lelei hono maumauʻi e fono ʻo e angamaʻá?”
ʻOku fie maʻu ʻe he Tamai Hēvaní ke tau fiefia mo taau mo Hono Laumālié, ko ia naʻá Ne foaki mai ai ʻa e ngaahi fekaú ke tokoni ʻo tauhi ʻetau ngaahi fakakaukaú, ngaahi leá, mo ʻetau ngaahi tōʻongá ʻi he ngaahi fakangatangata ʻoku tāú. ʻOku tokoni e fono ʻo e angamaʻá ke tauhi ʻa e mālohi ʻo e fakatupú ʻi loto ʻi he ngaahi haʻi ʻo e nofomalí. Ko e taha ʻe ʻuhinga ʻokú Ne fekau ai ke toki fakahaaʻi pē ʻa e mālohi ʻo e fakatupú ʻi he vahaʻa ʻo e husepānití mo e uaifí he “ʻoku ʻi ai e totonu ʻa e fānaú ke fāʻeleʻi ʻi loto ʻi he ngaahi haʻi ʻo e malí.”1
Te ke lava ʻo foaki ha tatau ʻo e Ki Hono Fakamālohia ʻo e Toʻu Tupú ki ho kaungāmeʻá. ʻOkú ne ʻomi ha ngaahi ʻuhinga ʻoku lelei ai ke tauhi ʻa e fono ʻo e angamaʻá: “ʻI he taimi ʻokú ke haohaoa fakasekisuale aí, ʻokú ke teuteuʻi ai koe ke fakahoko pea tauhi e ngaahi fuakava toputapu ʻi he temipalé. ʻOkú ke teuteuʻi koe ke faʻufaʻu ha nofo mali ʻoku mālohí pea ʻomai ha fānau ki he māmaní ke hoko kinautolu ko e konga ʻo ha fāmili taʻengata mo feʻofoʻofani. ʻOkú ke maluʻi ai koe mei he maumau fakalaumālie mo fakaeloto ʻoku hoko tupu mei hono fai e feohi fafale fakasekisualé ki muʻa ʻoku teʻeki ai ke fai ha malí. ʻOkú ke malu ai foki koe mei ha ngaahi mahaki fakatuʻutāmaki. ʻE tokoniʻi koe ʻe hoʻo haohaoa fakasekisualé ke ke maʻu ʻa e loto falalá peá ke fiefia moʻoni pea toe lelei ange ai hoʻo malava ke fai ha ngaahi fili ʻoku leleí ʻi he kahaʻú.”2
Ko e Temipalé
ʻOku ʻi ai e taumuʻa fakalangi ʻa ʻetau Tamai Hēvaní maʻatautolu takitaha, pea ʻe lava ke fakahoko ʻa e taumuʻa ko iá ʻi he temipalé. ʻOku totonu ke tau moʻui taau ke hū ki he temipalé kae lava hotau ngaahi fāmilí ʻo silaʻi. Te tau toe nofo mo ʻetau Tamai Hēvaní, pea ko e mahuʻinga tahá, te tau maʻu ha fiefia ʻoku taʻe ngata, ʻa ia ʻoku ʻikai maʻu ʻe he kau taʻe-tāú.
ʻAlofa M., taʻu 18, Haʻamoa
Nofo-malí mo e Fāmilí
ʻOku poupouʻi kitautolu ke tau maʻa fakasekisuale ka tau lava ʻo taau ke hū ki he temipalé mo tauhi e ngaahi fuakava toputapú. Kapau te tau muimui ki he fono ʻo e angamaʻá, te tau lava ʻo fokotuʻu ha nofomali mo ha fāmili mālohi ʻi he kahaʻú. ʻOku ʻi ai maʻu pē ʻa Sētane ke fakatauveleʻi kitautolu, ka ʻi he lotú, folofolá, pea mo e ngaahi kaungāmeʻa leleí, te tau lava ʻo ikunaʻi ia.
Leisiti M., taʻu 16, ʻOtu Filipainí
ʻI he Nofomalí
Te u fakamatala ki hoku kaungāmeʻá ko ha fakakaukau ʻoku ʻikai lelei hono maumauʻi e fono ʻo e angamaʻá he naʻe faʻu pē ʻa e mālohi ʻo e fakatupú ia maʻá e kakai kuo ʻosi mali fakalaó. Ko e taimi ʻoku tau maumauʻi ai ʻa e fono ʻo e angamaʻá, ʻoku mole leva e Laumālie Māʻoniʻoní mei heʻetau moʻuí.
ʻŌkusitina A., taʻu 15, Kana
Ngaahi Nunuʻa Kovi
ʻOku lahi ha ngaahi nunuʻa kovi ʻi hono maumauʻi ʻo e fono ʻo e angamaʻá, ka ʻoku ʻikai ke ke ʻilo kotoa kinautolu ʻi he kalasi ki he moʻui leleí. ʻE lava ʻe he maumauʻi e fono ʻo e angamaʻá ʻo tuli ʻa e Laumālié mei hoʻo moʻuí, uesia kinautolu ʻoku ofi atu kiate koé, mo ʻai ke ke ongoʻi taʻe-fiemālie kiate koe pē. ʻOku ou fokotuʻu atu ke ke mamata ʻi he vitiō ʻo e Ngaahi Pōpoaki Faka-Māmongá ʻoku ui ko e “Angamaʻá: Ko e Hā e Ngaahi Fakangatangatá?” [ʻi he youth.lds.org ʻi he lea Faka-Pilitāniá, Potukalí, mo e Faka-Sipeiní].
Mātiu T., taʻu 17, ʻIutā, USA
Ngaahi Fehuʻi Mahuʻinga
Tali e fehuʻi ho kaungāmeʻá ʻaki haʻo fai ha ngaahi fehuʻi: “Fēfē kapau ʻoku siofi koe he taimí ni ʻe ho mali ʻi he kahaʻú?” Kuo ʻosi fanongo ʻa e kakaí kotoa ʻi he fakaʻiseʻisa ʻa ha taha kuó ne maumauʻi e fono ʻo e angamaʻá. “Fēfē kapau ʻe ʻeke atu ʻe haʻo fānau he kahaʻú pe naʻá ke maumauʻi e fono ʻo e angamaʻá?” ʻOku fie maʻu ke ʻilo ʻe ho kaungāmeʻá hono mahuʻinga ʻo e fono ʻo e angamaʻá he taimí ni, ki muʻa ʻoku teʻeki fai atu ʻe ha foha pe ʻofefine ʻa e fehuʻi ko iá. ʻOku fie maʻu ke ke tauhi koe ke maʻa mo haohaoa ke maʻu ha moʻui fiefia, lelei ʻo taʻe-halaia ʻi hano maumauʻi ʻe fono toputapú.
Lōpini K., taʻu 13, ʻIutā, USA
Maʻá mo e Fakaʻapaʻapá
ʻI heʻetau muimui ki he fono ʻo e angamaʻá, ʻoku tau maʻa ai ʻi he ʻao ʻo e ʻOtuá, fakaʻapaʻapaʻi kitautolu, mo tokoni ai ke fakaʻapaʻapaʻi kitautolu ʻe he niʻihi kehé foki. Kapau te tau talangofua ki he fono ʻo e angamaʻá, ʻoku tau fakahaaʻi ai ko e fānau kitautolu ʻa e ʻOtuá pea ʻoku tau tauhi ha ngaahi tuʻunga moʻui māʻolunga. Te tau fakaʻehiʻehi mei he fakaʻiseʻisá. ʻI heʻetau talangofua ki heʻetau Tamai Hēvaní, tautautefito ʻi he fono ko ʻení, ʻe fiefia ange ʻetau moʻuí ʻi he māmani ko ʻení pea ʻi he maama kahaʻú.
ʻAliana G., taʻu 19, ʻOtu Filipainí
Ke Tau Feohi mo e Laumālié
Ko e taimi ʻokú ke maʻa ai mei he angahalá, te ke fiefia lahi ange ai pea ʻe tāpuekina koe. ʻOku hangē hotau sinó ha ngaahi temipalé, pea ko e Tamai Hēvaní “ʻoku ʻikai te ne ʻafio ʻi he ngaahi temipale taʻe-māʻoniʻoní” (ʻAlamā 7:21). Ko ia, ʻi he taimi ʻoku tau maʻa ai mei he angahalá, ʻe lava ʻa e Laumālié ke nofoʻia kitautolu.
Melieni P., taʻu 14, ʻĀkenisā, USA
Ko ha Meʻaʻofa Toputapu
Kapau ʻe meʻavaʻinga ʻaki e meʻaʻofa ʻo e fakatupú, ʻe hoko leva ʻa e meʻaʻofa mahuʻinga ko ʻeni mei he ʻOtuá ʻo hangē ha meʻanoa pē. ʻOku ʻikai ongo fakafiemālie hano foaki ha meʻaʻofa kapau ʻoku ʻikai fakakaukau e taha ʻokú ke foaki ki aí ʻoku mahuʻinga. Kuo pau ke tauhi maʻu pē ʻa e mālohi ʻo e fakatupú ke toputapu; he ko e ngaahi temipale kātoa kitautolu ʻo e ʻOtuá pea ʻoku totonu ke tau kei maʻa mo haohaoa hangē ha temipalé.
Seiloni Z., taʻu 15, ʻAitahō, USA
ʻUlungaanga Leleí mo e Angamaʻá
ʻOku fiefia ʻa e ʻEikí ʻi he ʻulungaanga leleí mo e angamaʻá, pea ʻoku totonu ke hoko ʻa e meʻa kotoa pē ʻi hono taimi totonu. Ko e fono ʻo e angamaʻá ko ha fekau ia mei he ʻEikí. ʻOku hoko e lotú mo e takaua ʻo e Laumālié ko ha hoa tonu moʻoni ke ʻilo ai ko ha tāpuaki ʻa ʻete moʻui angamaʻá.
Selene R., taʻu 18, Nikalākuā