Usa ka Mapailubon nga Pag-ampo
Nagdako ko sa Mexico uban sa akong mga igsoon, akong inahan, ug akong lola. Kada adlaw human sa paghimo sa homework ug buluhaton sa balay, magdula ko og football. Ganahan ko sa football! Magpakaaron-ingnon ko nga ang akong tuong paa mao ang usa ka team ug ang akong walang paa mao ang laing team.
Usa ka adlaw sa dihang ako nagdula og football, sa kalit lang dili na kaayo ko makaginhawa. Mipahulay ko sa pipila ka minuto, apan naglisud gihapon ko sa pagginhawa.Nasakit ko pag-ayo mao nga kinahanglan kong moadto sa ospital.
Sa kwarto sa ospital duna pay daghang mga bata, apan gimingaw ko sa akong pamilya ug mibati nga nag-inusara. Bisan og dili pa ko miyembro sa Simbahan, ako nagtuo sa Dios. Matag adlaw nag-ampo ko nga maayo, apan nagkagrabe man ko hinuon. Ang mga doktor nagtuo nga dili na tingali ko mabuhi.
Sa katapusan gipapauli na ko sa doktor, apan diha ra ko sa higdaanan sa misunod nga tuig. Mitomar ko og daghang mga tambal ug indyiksyunan og kaduha kada adlaw. Ug ako nag-ampo gihapon sa akong hunahuna ug kasingkasing. Gisultihan nako ang Langitnong Amahan nga kon ako mamaayo, moserbisyo ko Kaniya sa tibuok kong kinabuhi.
Dayon usa ka adlaw niana samtang nagbasa ko diha sa higdaanan, aksidente nakong nahulog ang libro. Sa dihang puniton na nako kini, akong nabantayan nga normal na ang akong pagginhawa. Akong gihagbong pag-usab ang libro. Gipunit nako kini pag-usab nga walay problema!
Mibangon ko. Sa sinugdanan nalipong ko tungod kay wala nako ka lakaw sa dugayng panahon. Mitan-aw ko sa samin ug nakita ang kaugalingon nga nagpahiyum. Nasayud ko nga ako nakadawat og tubag gikan sa Langitnong Amahan.
Kada adlaw sukad niadto, ako naningkamot sa paghimo og butang sa pagpadayag sa akong pagpasalamat sa Langitnong Amahan. Sa pagdako nako, nahimo kong usa ka doktor aron sa pagtabang nga matubag ang mga pag-ampo sa ubang mga bata. Ug karon naningkamot ko sa pagserbisyo sa Langitnong Amahan sa akong calling sa Simbahan.
Ang mga tubag sa pag-ampo dili kanunay sayon nga moabot, ug kini dili kanunay diha-diha dayon. Apan nasayud ko nga ang Langitnong Amahan motubag sa atong mga pag-ampo. Nasayud siya sa atong mga panginahanglan, ug nasayud Siya unsa ang labing maayo.
Paghulagway pinaagi ni Dan Burr