Walay Paglubad nga mga Istorya sa Ebanghelyo
Pagsimba sa Tinuod ug Buhi nga Dios
Kinutlo gikan sa “The False Gods We Worship,” Tambuli, Ago. 1977, 1–4.
Unsa may angay natong kahadlokan kon ang Ginoo uban kanato?
Atong nakat-unan gikan sa kasulatan nga ang pagbansay sa hugot nga pagtuo sa kanunay mas lisud kay sa mosalig sa mga butang nga anaa na, ang kalibutanon nga tawo sagad nga ibalhin iyang pagsalig sa Dios ngadto sa materyal nga mga butang. Busa, sa tanang kapanahonan kon ang tawo nahulog na sa gahum ni Satanas ug nawad-an og hugot nga pagtuo, sila milaum diha sa “gahum sa tawo” ug sa “dios nga salapi, ug bulawan, ug tumbaga, puthaw, kahoy, ug bato nga dili makakita, ni makadungog, ni makahibalo” (Daniel 5:23)—sa mga dios-dios. Kini akong nakita nga dominanti nga tema sa Daang Tugon. Bisan unsa nga butang nga anaa sa iyang kasingkasing ug iyang gisaligan pag-ayo mao ang iyang dios; ug kon ang iyang dios dili ang tinuod ug buhi nga Dios sa Israel, kana nga tawo nagsimba og dios-dios.
Kini ang akong gituohan pag-ayo nga kon kita mobasa niini nga mga kasulatan ug maningkamot nga “ipahisama kanila ngadto sa [atong] kaugalingon” (1 Nephi 19: 24), sama sa gisugyot ni Nephi, atong makita nga daghan og kaparehas ang karaan nga pagsimba sa mga kinulit nga imahe ug sumbanan sa pamatasan sa ato mismong kasinatian.
Ang Ginoo nagpanalangin kanato. … Ang mga kapanguhaan nga gihatag kanato mga maayo ug kinahanglanon sa atong buhat dinhi sa yuta. Apan nahadlok ko nga daghan kanato … nagsugod sa pagsimba kanila isip mini nga dios, ug sila mas nakaimpluwensya nato. Kita ba adunay mas daghan niining mga butanga kay sa masugakod sa atong pagtuo? Daghang mga tawo migahin sa ilang panahon sa pagmugna og ilang kaugalingong imahe nga naglakip og igo nga kwarta, stocks, bonds, investment portfolios, kabtangan, credit card, kagamitan, sakyanan, ug uban pa sa paggarantiya sa kalibutanong kasiguroan. …
Ang Atong Buluhaton
Nakalimtan ang kamatuoran nga buluhaton nato ang paggamit niining mga kapanguhaan diha sa atong pamilya ug korum sa pagtukod sa gingharian sa Dios—sa pagpalambo sa misyonaryo nga paningkamot ug sa genealogical ug buhat sa templo; sa pagpadako sa atong mga anak isip mabungahong sulugoon ngadto sa Ginoo; sa pagpanalangin sa uban sa tanang paagi, nga sila usab magmabungahon. Apan, atong gigamit kining mga panalangin para lang sa atong kaugalingong tinguha, ug sama sa giingon ni Moroni, “Kamo nagdayan-dayan sa inyong mga kaugalingon niana nga walay kinabuhi, ug unya motugot sa mga gigutom, sa mga timawa, sa mga hubo, ug sa mga masakiton ug sa mga sinakit nga molabay kaninyo, ug wala magpakabana kanila” (Mormon 8:39).
Ang Ginoo Mismo miingon kabahin sa atong panahon, “Sila wala mangita sa Ginoo sa pagpahimutang sa iyang pagkamatarung, apan ang matag tawo naglakaw diha sa iyang kaugalingon nga paagi, ug sama sa hulagway sa iyang kaugalingon nga dios kansang hulagway sama sa kalibutan, ug kansang mga butang ingon niana sa usa ka dios-dios, nga nagkatigulang ug mamatay sa Babelonia, gani ang gamhanan nga Babelonia, mapukan” (D&P 1:16; empasis gidugang).
Bati nga Pagbinayloay
Aduna koy kaila nga gitawag sa usa ka posisyon sa pagserbisyo sa Simbahan, apan wala niya dawata tungod kay ang iyang negosyo mas nagkinahanglan … sa iyang panahon kay sa iyang magahin sa buhat sa Ginoo. Iyang gitalikdan ang pagserbisyo sa Ginoo aron sa pagpangita og katigayunan [Mammon], ug siya milyonaryo karon.
Apan bag-ohay lang nakakat-on ko og makapainteres nga kamatuoran: Kon ang tawo nanag-iya og usa ka milyong dolyares nga bulawan … , siya adunay mga usa ka 27-billionth sa tibuok bulawan nga anaa ra niining nipis nga yuta. Kini nga kantidad gamay kaayo nga bahin nga dili masabtan sa hunahuna sa tawo. Dugang pa niini: Ang Ginoo kinsa milalang ug may gahum ibabaw sa tibuok yuta milalang og daghan pa nga mga kalibutan, gani “mga kalibutan nga dili maihap” (Moises 1:33); ug kon kini nga mga lalaki makadawat sa panumpa ug pakigsaad sa priesthood (tan-awa sa D&P 84:33–44), iyang nadawat ang saad sa Ginoo sa “tanan nga iya sa akong Amahan” (D&P 84:38). Ang pagbaliwala niining talagsaon nga mga saad pabor sa kahon sa bulawan ug pagbati sa kalibutanon nga kasiguroan usa gayud ka sayop nga panglantaw. Ang paghunahuna nga kontento na siya sa pagdawat og ingon niana ka gamay makaguol ug makaloloy lantawon; ang kalag sa tawo mas bililhon pa kaayo niini.
Usa ka batan-ong lalaki, sa dihang gitawag sa pag-misyon, mitubag nga siya wala kaayoy talento para ana. Maayo lang siya sa pagmentinar sa iyang bag-ong sakyanan sa maayong kondisyon. … Kanunay, ang iyang amahan kontento sa pagsulti, “Siya eksperto sa pagbuhat gamit iyang mga kamot. Kana maayo alang kaniya.”
Igo ba kini alang sa usa ka anak sa Dios? Kining batan-ong lalaki wala makaamgo nga ang kaanindot sa iyang sakyanan gamay lang itandi sa gahum sa dagat o sa adlaw; ug adunay daghang mga adlaw, tanan kontrolado sa mga balaod ug sa priesthood, sa katapusan—ang gahum sa priesthood nga unta iyang gipapalambo diha sa pagserbisyo sa Ginoo. Siya nakontento sa walay bili nga dios-dios, usa ka gihiusa nga yero ug goma ug sinaw nga chrome.
Usa ka tigulangon nga magtiayon miretiro sa pagtrabaho ug ingon man sa Simbahan. Mipalit sila og pickup truck ug camper ug … mibiyahe sa lagyong dapit. … Sila wala nay panahon alang sa templo, busy kaayo para pa magsiksik sa genealogy ug sa misyonaryo nga pagserbisyo. Wala na siya makig-abin sa iyang korum sa high priest ug perming wala sa balay para mobuhat sa iyang personal history. Ang ilang kasinatian ug pagpangulo gikinahanglan gyud sa ilang branch, apan … wala silay panahon. …
Kon kita padayon nga mogahin sa tanan natong panahon ug kapanguhaan para lang sa atong kaugalingon, kita nagtukod og kalibutanong gingharian, kana mao gayud ang atong mapanunod.
Pagsalikway sa mga Butang sa Kalibutan
Bisan pa sa pagtino sa atong kaugalingon nga moderno ug sa atong kalagmitang maghunahuna nga sinati sa kalibutanong mga butang—bisan pa niini, kita, sa kinatibuk-an, nagsimba og dios-dios—usa ka kondisyon nga makapasuko sa Ginoo.
Kita … daling malinga gikan sa atong buluhaton sa pagpangandam sa pag-anhi sa Ginoo. … Kita makalimot nga kon kita matarung, ang Ginoo dili motugot nga ang atong mga kaaway makaduol nato … o Siya ang makig-away sa atong gubat alang kanato (tan-awa sa Exodo 14:14; D&P 98:37, sa pagngalan og duha sa daghang mga pakisayran). …
Unsa may atong kahadlokan kon ang Ginoo anaa kanato? Dili ba kita makasalig sa Ginoo ug magbansay og hugot nga pagtuo Kaniya? Ang atong buluhaton klaro: pagsalikway sa kalibutanong mga butang isip atong mga tumong; sa pagbiya sa mga dios-dios ug pagpadayon nga may hugot nga pagtuo; sa pagsangyaw sa ebanghelyo ngadto sa atong mga kaaway, aron sila atong mahigala.
Pagbansay og Mas Dakong Pagtuo
Kita kinahanglang mobiya sa pagsimba sa modernong mga dios-dios ug sa pagsalig sa “gahum sa tawo,” kay ang Ginoo miingon ngadto sa tibuok kalibutan sa atong panahon, “Ako dili moluwas ni bisan kinsa nga nagpabilin diha sa Babelonia” (D&P 64:24). … Kami nagtuo nga ang paagi alang sa matag tawo ug pamilya sa pagpangandam ingon nga gisugo sa Ginoo mao ang pagsugod sa paglambo og mas lig-ong pagtuo, paghinulsol, ug pag-apil sa buhat sa Iyang gingharian dinhi sa yuta, nga mao Ang Simbahan ni Jesukristo sa mga Santos sa Ulahing mga Adlaw. Mora og lisud sa sinugdanan, apan kon ang tawo makasabut sa tinuod nga buluhaton, kon siya may mas maayong panglantaw sa kahangturan, mas mapanalanginan siya kon siya mobiya sa “kalibutanong” mga butang.
Anaa niini ang tinuod nga kalipay, ug mao nga atong dapiton ug dawaton ang tanang katawhan, bisan asa, sa pag-apil niini nga buhat. Alang niadtong determinado sa pagserbisyo sa Ginoo bisan unsa pa man, kini mao ang dalan sa kinabuhing dayon. Ang tanan usa lang ka paagi sa pagtuman niini.
Mga paghulagway pinaagi ni J. Beth Jepson