Pagbalanse sa Kasaysayan sa Simbahan
Ang daghang ebidensya sa kasaysayan sa Simbahan positibo ug makapalig-on sa hugot nga pagtuo. Ang kinatibuk-ang kahulugan niini, makapadasig gayud kaayo.
Ako malingaw sa pagbasa sa mga asoy sa mga unang miyembro sa Simbahan kinsa mibiya sa ilang mga panimalay ug, uban sa dakong mga sakripisyo, nagpundok uban sa mga Santos. Akong nakita nga ang ilang istorya makapadani, ug ako nakakuha og dakong kalig-on gikan sa pagkat-on unsay ilang naagian sa pagpuyo ug pagpakita sa ilang hugot nga pagtuo pinaagi sa pagsunod sa mga propeta ug sa pagbuhat sa malisud nga mga butang. Kon kamo magbasa unsay ilang gibuhat, tingali ang inyong kahimtang sa kinabuhi ingon og dili na kaayo lisud.
Paghulagway sa litrato pinaagi ni Cody Bell
Ganahan ko sa kasaysayan sa Simbahan. Mas daghan ang akong gibasa niini karon kay sa kaniadto, ug akong nakita kini nga nindot ug makapalig-on sa hugot nga pagtuo. Sama pananglit, katingalahan gayud unsay nahimo sa unang mga misyonaryo, walay laing kapanguhaan gawas sa hugot nga pagtuo ug pagpamatuod nga nakapahimo nila sa pagbuhat og talagsaong mga butang. Kadtong mga ehemplo nakatabang nako nga makasabut nga ako makahimo sa lisud nga mga butang kon ako mopadayon sa pagpalambo sa akong hugot nga pagtuo ug pagpamatuod. Matag higayon, ang akong pagpamatuod malig-on samtang akong makita kon unsay nahitabo niining mahinungdanong buhat nga nagpadayon.
Pagtan-aw sa Nangagi gikan Karon
Ang kasaysayan usa ka talagsaong paagi nga madasig sa pagpangandam sa inyong kaugalingon sa espirituhanong paagi. Sa atong kasaysayan atong makita kadtong kinsa nangandam sa ilang mga kaugalingon sa espirituhanong paagi ug nakabuntog ug niadtong kinsa nawala tungod kay sila dili andam sa espirituhanong paagi alang sa unsay miabut. Makat-unan nato nga ang dedikasyon ngadto sa ebanghelyo, pag-ampo, ug pagpamatuod makatabang nato sa pagbuhat sa importanting mga butang ug kinahanglan natong mogahin og panahon sa pagpalambo sa atong pagka-espirituhanon o mag-antus kita sa sangputanan.
Ang mga tawo sa atong kasaysayan mga ordinaryong mga tawo sama nato, kadaghanan nila mihimo og talagsaong mga butang. Samtang sila naningkamot og kahingpitan, sila dili hingpit. Kadtong unang mga miyembro sa Simbahan adunay ilang mga kalisud ug pakigbisog sama nato karon. Apan nakakita ko og kalig-on nga nakahibalo nga kadtong mga hagit, kadtong paningkamot sa kahingpitan, diha na sulod sa dugayng panahon.
Sa pagkatinuod, ang kalibutan nausab sa usa o duha ka milabay nga henerasyon. Ang Internet mibutang sa tanang matang sa impormasyon diha sa atong mga tudlo—maayo, dautan, matinud-anon, dili matinud-anon— naglakip sa impormasyon kabahin sa kasaysayan sa Simbahan. Daghan ka og mabasa kabahin sa atong kasaysayan, apan importante ang pagbasa niini ug pagsabut sa kinatibuk-ang kahulugan niini. Ang nakalisud lang sa ubang mga impormasyon sa internet mao nga kini dili kaayo masabtan ug dili gayud ninyo makita ang tibuok talan-won.
Ang impormasyon nga mopakaulaw sa Simbahan sa kasagaran sayop ug dili makiangayon. Kinahanglang magtinguha kita sa mga tinubdan nga walay sayop nga mohulagway sa atong pagtuo ug sa atong kasaysayan. Ang ubang mga website adunay dili maayo og katuyoan ug mahimong kontrobersyal sa paagi sa ilang sa pagpresentar sa impormasyon. Pangitaa ang mga tinubdan nga adunay giila ug gitahud nga mga historian, ma-miyembro man sila sa Simbahan o dili.
Ang ubang mga batan-on nasurprisa ug nakugang sa anti-Mormon nga materyal sa Internet tungod kay wala nila panalipdi ang ilang mga kaugalingon batok niini. Wala tingali sila maggahin og igong panahon sa espirituhanon aron makapangandam ug makapalig-on sa ilang mga kaugalingon sa bisan unsay moabut. Kon ang mga kasinatian sa kinabuhi kalit nga mohatag og mga kalisud kanila, importante nga ilang buhaton kadtong sukaranang mga butang nga kanunay natong hisgutan: pagpadayon sa pagtuon sa mga kasulatan ug pagbaton og makahuluganon nga pag-ampo uban sa atong Langitnong Amahan. Kadtong sukaranang mga butang nag-andam sa mga tawo sa tanang matang sa kalisdanan, lakip ang mga artikulo sa anti-Mormon nga ilang masugatan sa internet.
Ang Panginahanglan sa Pagbalanse
Sama sa bisan unsang butang, kinahanglang balansihon pagtan-aw ang kasaysayan sa Simbahan. Ang tinuod nga Simbahan kanunay anaa sa minoriya, ug ingon og kanunay kitang gipuntariya. Kanunay kitang mag-atubang og kalisdanan, ug tingali kinahanglan kitang maanad niini. Ang labing maayong paagi sa pag-atubang niini mao ang pagsiguro nga kita takus ug nga ang atong pagpamatuod lig-on. Kon naggahin kamo og daghang panahon sa mga website nga nanaway sa Simbahan ug sa kasaysayan niini apan wala kaayo mogahin og panahon sa pagtuon sa mga kasulatan, dili gayud kamo mabalanse, ug kadtong negatibo nga mga butang mahimong dunay dili maayong epekto diha kaninyo. Kon kamo husto nga pagkabalanse, dili kini makaapekto.
Sa akong pagkatin-edyer wala ako makasabut sa hingpit sa kaimportante sa pagpalambo sa espirituhanong paagi. Tingali mas interesado ako nga mahimong maayong magdudula sa football kay sa mahimong maayong estudyante sa Basahon ni Mormon. Wala kini mahitabo hangtud diha nako sa mission field, sama sa daghang batan-ong lalaki, ako nakasinati nianang kausaban ug nakasabut unsa gayud ang kalipay. Kini ang hingpit nga kalipay, ang kalinaw nga moabut gikan sa pagserbisyo sa Ginoo, gikan sa pagtuon ug sa pag-ampo, sa paghigugma ug sa pagtabang sa uban. Akong nakaplagan nga kon akong ibaliwala kadto nga mga aspeto sa akong kinabuhi, dili maayo ang mga panghitabo. Kon buhaton nako kadtong mga butanga, ang tanan ingon og balanse ra.
Kon akong balansihon ang akong kinabuhi, akong matan-aw ang kasaysayan sa maayong paagi ug makasabut nga samtang ang kadaghanan sa atong mga katigulangan angay nga daygon, sila mga tawo ug masayop.Adunay makaguol o makalibug nga yugto sa atong kasaysayan nga atong gitinguha nga masabtan, apan ang pipila niini nga mga pangutana tingali dili matubag dinhi nga bahin sa tabil.Ug kana maayo ra gihapon.
Kon ang usa ka higala moduol nako nga dunay matinuoron nga pangutana bahin sa kontrobersyal nga mga isyu sa kasaysayan sa Simbahan, akong buhaton ang akong labing maayo sa pagtubag niini. Ug kon akong mamatikdan nga naggahin siya og daghang panahon nianang bahina, ang akong unang mga ipangutana niya mao: “Ikaw nagbasa ba sa Basahon ni Mormon? Nag-ampo ka ba? Gibalanse ba nimo ang imong kinabuhi aron imong mapanalipdan ang imong kaugalingon batok sa mga unos sa kinabuhi?”
Ang daghang ebidensya sa kasaysayan sa Simbahan positibo ug makapalig-on sa hugot nga patuo. Kon kamo mopili sa paggahin sa inyong panahon sa pagtuon lamang sa kontrobersyal nga mga kapitulo sa atong kasaysayan, masabtan lang ninyo ang pipila ka bahin sa kasaysayan, apan dili ninyo masabtan ang tanan. Ug kinahanglan ninyong masabtan ang tanan sa atong kasaysayan. Sa iyang kinatibuk-ang kahulugan, makapadasig kini kaayo.
Sama pananglit, si Joseph Smith usa ka talagsaon nga tawo. Hingpit ba siya? Dili. Kitang tanan mortal. Apan ang pagbasa sa Basahon ni Mormon ug sa mga pagpadayag sa Doktrina ug mga Pakigsaad ug sa pagtan-aw unsay iyang nabuhat sa pagpahiuli sa Simbahan sa mubo nga panahon usa ka talagsaon nga pagpamatuod. Ang tanang mga propeta adunay mga hagit ug mga kalisud, ug kini dili makapatingala nato nga si Joseph Smith nakakita sa mga kalisud ug nakapasilo sa pipila ka mga tawo. Apan klaro nga siya usa ka propeta sa Dios.
Walay Panahon nga Sama sa Karon
Dili ako makahunahuna og mas nindot nga panahon nga mahimong miyembro sa Simbahan. Sa dihang ang akong asawa ug ako naminyo, dihay 13 ka mga templo sa tibuok Simbahan, ug kami adunay tumong sa pagbisita sa matag usa niini. Karon adunay mga 140 ka mga templo, ug dili gyud kami makabisita sa tanan. Kining tanan bunga sa Pagpahiuli—mga propeta ug mga apostoles, mga templo, priesthood, ang Basahon ni Mormon, ang mga pagpadayag—mao ang dakong panalangin sa atong mga kinabuhi. Ug kining tanan nahimong posible tungod sa Manluluwas, tungod sa Iyang ebanghelyo, tungod sa plano sa atong Amahan.
Tingali ako usa ka yanong lalaki sa daghang mga paagi, apan igo ang akong kaalam nga masayud nga ang akong Langitnong Amahan nahigugma kanako. Siya nahigugma kanatong tanan. Kita gayud Iyang mga anak. Gusto gyud Niya nga makabalik kita ngadto Kaniya. Dili Siya modumala sa gagmayng mga aspeto sa atong kinabuhi. Kabahin kana sa proseso sa atong pagtubo. Siya gusto nga kita makat-on ug mogamit sa kabubut-on ug moatubang sa kalisdanan. Apan, sa pagkatinuod, akong makita ang Iyang kamot sa akong kinabuhi ug sa kinabuhi sa akong pamilya. Ug ako mapasalamaton nga kita makasinati niining mortal nga kasinatian, tungod kay ako ganahan sa kinabuhi. Daghang mga butang nga sayop, apan adunay daghang nindot nga mga butang sa kinabuhi, ug mapasalamaton ako nga kita isip espirituhanong mga binuhat adunay kahigayunan sa pag-anhi sa yuta ug makabaton og lawas ug makakat-on sa mga butang nga makatabang nato hangtud sa kahangturan.
Ang kasaysayan mopanalangin sa atong kinabuhi tungod kay kini naghatag nato og kahigayunan sa paghinumdom sa nangagi. Usahay lisud ang paghinumdom sa atong kaugalingong mga kinabuhi, apan pinaagi sa kasaysayan atong mahinumdoman ang kinabuhi sa uban ug makat-on sa mga butang nga mipanalangin kanila. Ug kita makatabang sa atong kaugalingon nga makalikay sa sayop pinaagi sa pagbuhat sa mga butang nga mipanalangin sa atong mga katigulangan.