Kusog nga Impresyon sa Espiritu
Gikan sa pakigpulong nga gihatag ngadto sa kabatan-onan sa Salta, Argentina, niadtong Nobyembre 2011.
Ang usa ka pagpamatuod moabut ni bisan kinsang ordinaryong tawo, bisan asa siya, tungod kay ang atong Langitnong Amahan ug ang Espiritu Santo nakaila gayud sa matag usa nato.
Pagpangita sa Tubag didto sa Sagrado nga Kakahoyan
Isip usa ka batan-on, ako adunay oportunidad nga makaadto sa Palmyra, New York, usa ka gabii sa ting-init. Diha ako sa Sagradong Kakahoyan, nag-inusara. Ako miluhod aron mag-ampo, naghangyo sa Langitnong Amahan sa paghatag nako og timailhan mahitungod sa tinud-anay nakong nahibaloan nga nahitabo nianang sagrado nga dapit. Kinasingkasing akong nag-ampo, sa taas nga higayon, sa kinaiya sa balaan nga pagtahud. Ug ako wala makadawat og tubag o bisan unsang pag-aghat sa Espiritu Santo. Walay miabut. Sa katapusan, ako mihunong ug mibiya nga nahigawad, naghunahuna, “Unsay akong nahimong sayop? Ngano? Unsa pa ang gikinahanglan?” Para kanako nga sa maong palibut, walay laing mas maayo pa nga dapit sa pagdawat og tubag sa ingon nga pag-ampo.
Akong nakat-unan gikan niana nga kasinatian nga kita dili makademanda sa mga butang gikan sa Dios. Kita dili makaingon, “Ikaw kinahanglang motubag nako niining paagiha, karon dayon.” Anaa ra Niya ang pagdesisyon kon unsaon ug kanus-a ug unsay Iyang isulti nato. Ang atong responsibilidad mao nga kanunay kitang anaa sa eksakto nga kahimtang sa pagdawat sa mga aghat o hung-hong, pagpadayag, sa inspirasyon sa Espiritu. Apan Siya ang mohimo sa desisyon kon unsaon ug kanus-a.
Mga paghulagway pinaagi ni Dan Burr
Pagdawat og Tubag diha sa Panimalay
Unsay akong gipangita nianang higayona—nga wala moabut dayon— miabut gyud nako paglabay sa lima o unom ka semana. Diha ako sa balay nagbasa sa Basahon ni Mormon. Ug bisan wala ako mangutana, dihay miabut nako nga kusog nga impresyon, pagbati, ug komunikasyon pinaagi sa Espiritu Santo nga mikumpirma sa akong pagtuo ug pagpamatuod.
Hilabihan kaayo ang maong komunikasyon nga nakahilak ko. Lunsay kaayo kadto nga komunikasyon nga wala na kinahanglana ang mga pulong. Ang Espiritu dili limitado sa mga pulong lamang; Siya makasulti pinaagi sa Espiritu ngadto sa espiritu sa usa ka pinulongan nga dili masayop tungod kay kini walay mga pulong. Kini usa ka komunikasyon sa putli nga kahibalo ug kaalam gikan sa Espiritu, ug ako nasayud nga kini mao ang labing maayong paagi sa pagbaton og kahibalo. Kini mas lig-on ug mas malungtaron kay sa pagtandog o pagtan-aw; mahimong magduha-duha kita sa pisikal nga balatian, apan kita dili makaduha-duha kon ang Espiritu mamulong ngari nato. Kini mao ang labing siguro nga saksi. Tungod niini, ang dili mapasaylo nga sala mao ang paglimud sa Espiritu Santo o pagpamatuod sa Espiritu Santo.
Pagbati sa Gugma ug Pagsabut sa Dios
Maayo ra gyud ang akong gibati nga wala ako tubaga sa Ginoo didto sa Sagradong Kakahoyan tungod kay tingali magtuo ako nga kinahanglan nga mohimo og pilgrimage ngadto sa Palmyra aron makadawat og pagpamatuod ni Propeta Joseph Smith. Karon ako nasayud nga kini moabut sa bisan asang mga dapit. Dili kinahanglan nga moadto ka sa Jerusalem aron makadawat og pagpamatuod sa Ginoong Jesukristo. Kana nga pagpamatuod moabut ngadto ni bisan kinsang ordinaryong tawo, bisan asa siya, tungod kay ang atong Langitnong Amahan ug ang Espiritu Santo nakaila gayud sa matag usa nato. Sila nasayud kon asa kita ug unsaon sa pagpangita kanato. Ug Sila wala magkinahanglan og visa. Gani, katultol Sila sa tibuok kalibutan! Sila nakahibalo na.
Mosaad ako ninyo, mga batan-on, nga kon kamo magpadayon sa pagkamatinud-anon, maghangyo, ang Ginoo mohatag ninyo sa samang tubag, sa samang pagpamatuod, sa samang panghimatuod nga Iyang gihatag nako, tungod kay ako nasayud nga Siya nahigugma ninyong tanan sama sa Iyang paghigugma nako o ni Presidente Thomas S. Monson o bisan kinsa sa Iyang mga anak.
Ang gugma sa Dios alang sa tanan, ug kini walay kinutuban. Siya nasayud kon unsaon sa pagpakig-istorya sa matag tawo. Siya nasayud asa kamo ug kon unsaon sa pagtandog sa inyong kasingkasing ug espiritu pinaagi sa Espiritu Santo. Ayaw paghunong sa pag-ampo. Ayaw paghunong sa pagpangutana. Ayaw paghunong sa pagsunod sa mga sugo. Ang panahon moabut, kon wala pa, nga kamo makadawat niining lig-on nga pagpamatuod. Ug kini dili lang kausa. Apan hinoon, pinaagi sa kalooy sa Ginoo, kini moabut matag karon ug unya sa tibuok ninyong kinabuhi.
Padayon sa Pagdawat og Saksi
Kini nahitabo kanako. Samtang ako nagmisyon didto sa Tucumán, Argentina, nagtudlo ko og usa ka pamilya ug nagpamatuod kabahin sa Unang Panan-awon ni Propeta Joseph Smith. Ang pamilya wala motuo niini. Hinoon, sa higayon nga ako mihatag sa akong pagpamatuod, ako nakadawat og laing kumpirmasyon sa akong pagpamatuod. Ang Espiritu miingon, “Ang imong mga pulong sa pagpamatuod tinuod.” Siya mipamatuod ngari kanako kabahin sa akong pagpamatuod.
Sa inyong tibuok kinabuhi magbalik-balik kamo sa pagdawat sa mga panghimatuod nga adunay Dios, nga Siya mao ang atong Langitnong Amahan, nga Siya buhi, nga Iyang gitawag si Propeta Joseph Smith sa pag-alagad isip Propeta sa Pagpahiuli, nga ang Iyang Anak buhi, ug ang Iyang grasya igo aron sa pagluwas kanato, sa paglimpyo kanato, ug pagpasaylo kanatong tanan. Kana nga pagpamatuod moabut matag karon ug unya sa atong tibuok kinabuhi.
Ako nasayud niining mga butanga. Ako usa ka linain nga saksi niini. Ako nasayud nga ang Ginoo buhi, nga Siya sa tinuod usa ka nabanhaw nga binuhat, nga Siya naggiya ug mao ang pangulo niini nga Simbahan nga nagdala sa Iyang ngalan, nga Iya kini, ug nga kamo Iyang mga karnero.