Alang sa Kalig-on sa mga Kabatan-onan
Pasalamat
Ang matag usa kanato mas magmalipayon kon kita puno sa pasalamat.
Niadtong ting-init sa 2011, ako adunay pribilehiyo nga mahimamat si Josh Larson sa Philmont Scout Ranch sa New Mexico, USA. Paglabay sa pipila ka bulan, si Josh nagtabang sa iyang amahan sa paglimpyo sa bodega. Walay pasidaan, ang kadena nga gigamit sa pag-alsa sa 1,480 ka libra (670 kg) nga sagbayan naputol, nahulgan si Josh sa sagbayan, nadat-ugan siya gikan sa iyang tangkugo ngadto sa iyang mga tiil. Milagro kaayo, ang amahan ni Josh nakahimo sa pag-alsa sa sagbayan gikan sa lawas sa iyang anak. Iyang gihimo ang CPR hangtud miabut ang mga emergency personnel aron dad-on si Josh ngadto sa ospital, nga wala gihapon magginhawa.
Daghang mga adlaw nga kritikal ang kahimtang ni Josh. Naningkamot ang mga doktor sa pag-ayo sa nabuak niyang bagulbagol, nabungkag nga sinuses, ug uban pang grabe nga kadaot. Human sa daghan kaayo nga operasyon, si Josh sa katapusan miarang-arang na. Dayon nagsugod siya sa dugay, hinay nga pagkaayo.
Karon si Josh sa gihapon nakasinati sa daghang mga epekto sa iyang aksidente. Siya dunay nadaot nga mata, bungol ang usa ka dunggan, ug adunay metal plate sa iyang ulo. Apan mipili siya nga isipon ang iyang kahimtang nga usa ka panalangin. Nasayud siya nga utang niya ang iyang kinabuhi sa Langitnong Amahan ug sa suporta niadtong naglibut kaniya. Pasalamat mipuno sa iyang kasingkasing.
Ang pagpakaayo ni Josh dugay ug hinay.Nakasinati gihapon siya sa daghang mga epekto sa iyang aksidente apan miisip sa aksidente nga usa ka panalangin kay sa usa ka pagsulay.
Pasalamat panahon sa Kalisdanan
Sa usa ka bag-ong komperensya sa kabatan-onan, si Josh naghisgut kabahin sa mga pag-ampo ug pagpuasa nga gitanyag sa pamilya, mga higala, mga silingan ug mga lider sa ward ug stake: “Nag-ihap ako sa akong mga panalangin. Mga pag-ampo gitubag. Sa akong hunahuna mas usa kini ka panalangin kay sa usa ka pagsulay.Gimahal ko kamong tanan.”
Si Josh usa ka ehemplo sa pagtulun-an diha sa Alang sa Kalig-on sa Kabatan-onan: “Pagpuyo uban sa espiritu sa pasalamat ug kamo adunay mas dakong kalipay ug katagbawan. … Bisan sa inyong labing lisud nga panahon, makakita kamo og daghan nga mapasalamatan.”1
Ang pagpasalamat makapahimo sa mga pagsulay, bisan grabe sama sa giatubang ni Josh, ngadto sa mga panalangin. Nagkinahanglan kini og paningkamot sa pagpasalamat ug malaumon sa kinabuhi. Apan ang Ginoo mopanalangin nato, ug ang Iyang malumong mga kalooy kinahanglang hinumduman o pasalamatan. Ang propeta sa Basahon ni Mormon nga si Moroni nagpahinumdom kanato sa kaimportante sa pasalamat ug nag-awhag nato sa “paghinumdom unsa ka maloloy-on ang Ginoo ngadto sa mga katawhan, gikan sa paglalang ni Adan bisan hangtud sa panahon nga kamo makadawat niini nga mga butang, ug palandonga kini sa inyong mga kasingkasing” (Moroni 10:3).
Tabang sa Espiritu Santo
Sa atong busy nga kinabuhi, dali rang mataligam-an ug makalimtan ang giya sa Langitnong Amahan sa atong inadlaw-adlaw nga mga kalihokan. Ang Espiritu Santo nagtabang kanato sa paghinumdom nga kita adunay daghan nga angay nga pasalamatan. Si Presidente Henry B. Eyring, Unang Magtatambag sa Unang Kapangulohan, mitudlo, “Ang Espiritu Santo ang motabang nato nga makita unsa ang nabuhat sa Dios kanato.” Siya miawhag nato “sa pagpangita og mga paagi sa pag-ila ug paghinumdom sa pagkamabination sa Dios.”2
Samtang atong tugutan ang Espiritu Santo sa pagpahinumdom nato sa kamabination ug gugma sa Dios alang nato, mapuno kita sa mga pagbati sa pasalamat. Kini nga mga pagbati moaghat nato sa pagpasalamat sa atong Amahan sa Langit. Matinud-anon sa Tinuhoan nagtudlo: “Pasalamati ang inyong Langitnong Amahan sa Iyang kaayo kaninyo. Inyong mapadayag ang inyong pasalamat ngadto sa Dios pinaagi sa pag-ila sa Iyang kamot sa tanang mga butang, pagpasalamat Kaniya sa tanan nga Iyang gihatag kaninyo, pagsunod sa Iyang mga sugo, ug pagserbisyo sa uban. … Paningkamot nga magmapasalamaton. Inyong mabantayan nga kini makahatag og nindot nga mga resulta.”3
Samtang kita moila sa atong mga panalangin, ang atong mga pagpamatuod molambo. Kon mas atong makita ang kamot sa Ginoo sa atong mga kinabuhi, mas mahiduol kita ngadto Kaniya. Usa sa labing maayo nga paagi nga kita makapakita sa atong pasalamat ngadto sa atong Amahan sa Langit mao ang pagpahayag og pasalamat ngadto Kaniya ug sa uban sa mga paagi nga sila motandog sa atong kinabuhi.4
Kini nga mga pagbati sa pasalamat modasig kanato sa pagsunod sa Ginoo ug sa pagpuyo og kinabuhi sa pagserbisyo—usa ka kinabuhi nga modasig niadtong naglibut kanato ug nagpasiugda og positibo nga mga kausaban.
Mga litrato sa maayong kabubut-on ni Vicki Larson ug Publishing Services sa Simbahan