Pagdala sa Primary ngadto sa Panimalay
Mosunod Ko sa Plano sa Langitnong Amahan pinaagi sa Pagpabunyag ug Pagpakumpirma
Inyong magamit kini nga leksyon ug kalihokan aron makat-on og dugang kabahin sa tema sa Primary karong bulana.
Ang Basahon ni Mormon naghisgut mahitungod sa usa ka grupo sa mga tawo kinsa nagpundok sa usa ka kakahoyan nga gitawag og Mormon. Gusto silang makadungog ni Alma nga magtudlo sa ebanghelyo ni Jesukristo.Human makatudlo si Alma kanila sa daghang mga adlaw, siya nangutana kanila kon sila gusto bang mohimo og pakigsaad sa pag-alagad sa Dios ug pagsunod sa Iyang mga sugo. Siya miingon kanila nga kon sila magpabunyag, ang Espiritu Santo kanunay magauban kanila (tan-awa sa Mosiah 18:7–10).
Sa pagkadungog nila niini, ang mga tawo malipayon kaayo nga sila “namakpak sa ilang mga kamot tungod sa hingpit nga kalipay” (Mosiah 18:11). Mibunyag si Alma og 200 ka mga tawo diha sa Katubigan sa Mormon. Kini nga mga tawo naghunahuna sa kalasangan sa Mormon isip usa ka matahum nga dapit tungod kay didto sila nakakat-on mahitungod sa Manluluwas ug nabunyagan (tan-awa sa Mosiah 18:30).
Sama sa mga tawo ni Alma, mobati kita og kalipay samtang kita magpaabut o mahinumdom sa bunyag. Sama niadtong mga tawo, sa dihang kita gibunyagan, mihimo kita og pakigsaad uban sa Dios. Nagsaad kita sa pagsunod sa Iyang mga sugo ug moserbisyo Kaniya. Modala kita sa pangalan ni Jesukristo sa atong kaugalingon ug mahimong miyembro sa Simbahan. Kon kita kumpirmahan, makadawat kita sa sama nga talagsaong saad nga nadawat sa katawhan ni Alma: nga ang Espiritu Santo magauban kanato kanunay, kon kita mosunod sa mga sugo sa Dios.
Paghulagway pinaagi ni Dani Jones