Hingpit nga Kalipay diha sa Family History

Tun-i kini nga materyal sa mainampuon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi. Alang sa dugang nga impormasyon, adto sa reliefsociety.lds.org.

Hugot nga Pagtuo, Pamilya, Kahupayan

Si Elder Russell M. Nelson sa Korum sa Napulog Duha Ka mga Apostoles nagtudlo nga ang Espiritu ni Elijah mao ang “pagpakita sa Espiritu Santo nagpamatuod sa balaan nga kinaiya sa pamilya.”¹

Isip miyembro sa gipahiuli nga Simbahan ni Kristo, kita adunay mga responsibilidad diha sa pakigsaad sa pagpangita sa atong mga katigulangan ug pagpahigayon alang kanila sa makaluwas nga mga ordinansa sa ebanghelyo. Sila kon wala kita dili “pagahingpiton” (Mga Hebreohanon 11:40), ug “ni kita kon wala ang atong mga patay mahingpit” (D&P 128:15).

Ang buhat sa family history nag-andam kanato para sa mga panalangin sa kinabuhing dayon ug nagtabang kanato nga mapalambo ang atong hugot nga pagtuo ug personal nga pagkamatarung. Ang family history importante nga bahin sa misyon sa Simbahan ug makapahimo sa buhat sa kaluwasan ug kahimayaan alang sa tanan.

Si Presidente Boyd K. Packer, Presidente sa Korum sa Napulog Duha Ka mga Apostoles, miingon: “Kon kita mosiksik sa atong kaugalingong mga katigulangan kita mainteresado labaw pa sa mga pangalan. … Ang atong interes makapabalik sa atong mga kasingkasing ngadto sa atong mga amahan—kita magtinguha sa pagpangita ug pag-ila ug pagserbisyo kanila.²

Gikan sa mga Kasulatan

Malaquias 4:5–6; 1 Mga Taga-Corinto 15:29; D&P 124:28–36; 128:15

Gikan sa Atong Kasaysayan

Si Propeta Joseph Smith mitudlo, “Ang pinakadakong responsibilidad niini nga kalibutan nga gibutang sa Dios kanato mao ang pagsiksik sa atong mga patay.”³ Sa templo kita makaalagad isip puli alang sa atong namatay nga mga katigulangan ug pagbuhat sa gikinahanglang mga ordinansa alang kanila.

Si Sally Randall sa Nauvoo, Illinois, kansang 14 anyos nga anak nga lalaki namatay, nahupay sa mga saad sa mahangturong pamilya. Human gibunyagan iyang bana alang sa ilang anak, siya misulat ngadto sa iyang mga paryente: “Pagkamahimayaon nga butang nga kami … mabunyagan alang sa tanan natong mga patay [katigulangan] ug moluwas kanila kutob sa atong nahibaloan mahitungod kanila.” Dayon siya mihangyo sa iyang mga paryente sa pagpadala kaniya og mga impormasyon kabahin sa ilang mga katigulangan, nag-ingon, “Akong buhaton kutob sa mahimo ang pagluwas sa [atong pamilya].”⁴