Ang Simbahan Nakasaksi sa mga Kausaban sa Kasaysayan panahon sa Pagpangalagad ni Presidente Monson

Sa milabayng lima ka tuig sa pagpangulo ni Presidente Thomas S. Monson, ang Simbahan nakasaksi sa makasaysayanong mga kausaban nga nakaepekto sa mga miyembro sa tibuok kalibutan. Ang dakong impluwensya sa ika-16 nga Presidente sa Simbahan makita sa daghang lain-laing importante nga mga pahibalo ug sa pag-implementar sa bag-ong lagda, gikan sa misyonaryo nga buhat ug pagbansay sa pagpangulo sa priesthood ngadto sa pagtukod og daghang mga templo.

Adunay daghang mga lagda ug mga pahibalo nga gihatag atol sa pagpangalagad ni Presidente Monson adunay epekto sa tibuok kalibutan—bisan pa niana, gitumong kini sa pagserbisyo ug sa pag-atiman sa mga indibidwal. Ang iyang tibuok kinabuhi nga pagpakabana alang sa usa ka tawo makita sa matag higayon sa kasaysayan.

Ania ang pipila ka importanting mga bahin gikan sa unang katunga sa dekada sa pagpangulo ni Thomas S. Monson:

• Sa tinguha sa pagpalapad sa mga oportunidad sa batan-ong mga miyembro sa Simbahan sa pagserbisyo og full-time nga misyon, gipahibalo ni Presidente Monson niadtong Oktubre 6, 2012, nga ang mga lalaki mahimong mosugod sa pagserbisyo sa edad nga 18 ug ang mga babaye sa edad nga 19. Ang iyang pahibalo gihimo atol sa pangbukas nga sesyon sa ang ika-182 nga Tunga sa Tuig nga Kinatibuk-ang Komperensya sa Simbahan ug nakahimo og talagsaong kadasig sa mga misyonaryo. Sukad sa maong pahibalo, ang Missionary Department sa Simbahan nakadawat og makasaysayanon nga gidaghanon sa mga application gikan sa batan-ong mga lalaki ug batan-ong mga babaye nga naghinam-hinam nga moserbisyo.

• Sa usa ka sulat nga gipirmahan usab sa iyang mga magtatambag sa Unang Kapangulohan—si Presidente Henry B. Eyring ug Presidente Dieter F. Uchtdorf—gipahibalo ni Presidente Monson sa 2013 nga implementasyon sa usa ka bag-ong kurikulum sa kabatan-onan nga gidesinyo “aron sa pagpalig-on ug pagtukod og hugot nga pagtuo, pagkakabig ug pagpamatuod” diha sa kabatan-onan sa Simbahan. Ang bag-ong kurikulum nagtugot og interactive nga pagtudlo diha sa mga klase sa Aaronic Priesthood, Young Women ug Sunday School sa kabatan-onan nga gisunod sa pamaagi giunsa sa pagtudlo sa Manluluwas atol sa Iyang pangalagad dinhi sa yuta. Ang mga klase sa matag semana naggamit sa daghang mga kapanguhaan sa Simbahan diha sa internet sa moderno nga panahon, nagtugot sa mga batan-on sa pag-apil sa talagsaong paagi.

• Ubos sa direksyon ni Presidente Monson ug sa Unang Kapangulohan, ang Simbahan nagpadayon sa pagsangkap sa tibuok kalibutan nga miting sa pagbansay aron sa pagtabang sa lokal nga mga lider sa priesthood ug auxiliary ug mga pamilya sa ilang mga paningkamot sa pagserbisyo sa mga miyembro ug pagpalig-on sa pagkakabig. Ang pagbansay nagtugot sa lokal nga mga lider ug mga miyembro sa pagdawat og direksyon gikan sa mga miyembro sa Unang Kapangulohan, Korum sa Napulog Duha ka mga Apostoles, ug sa ubang mga General Authority ug kinatibuk-ang mga lider sa auxiliary. Ang tibuok kalibutan nga pagbansay naglakip sa mga panudlo sa paggamit sa bag-ong mga administrative handbook (gipaila niadtong 2010), pagbansay sa paghimo og epektibong mga ward council, ug pagpalig-on sa pamilya ug sa Simbahan pinaagi sa priesthood.

• Niadtong 2010 ang Unang Kapangulohan nagsugod pag-assigned sa mga sakop Korum sa Napulog Duha ka mga Apostoles sa pagpahigayon og duha ka bag-ong internasyonal nga mga miting—mga komperensya sa pagpangulo sa priesthood ug pagribyu sa area. Atol sa matag komperensya sa pagpangulo sa priesthood, mga kapangulohan sa stake, mga bishop ug presidente sa branch sulod sa usa ka dapit sa Simbahan gipundok alang sa pagbansay. Sa matag ribyu sa area ang mga lider mitan-aw usab kon unsay nahitabo sa Simbahan sa gihatag nga eklisiastikanhong nga dapit ug pagribyu sa mga butang sama sa humanitarian service, mga panginahanglan sa welfare, misyonaryo nga buhat, ug buhat sa family history ug templo.

• Panahon sa pagpangalagad ni Presidente Monson, 31 ka bag-ong mga templo ang gipahibalo sa tibuok kalibutan. Dise sais gipahinungod na ug lima gipahinungod pag-usab human sa dakong kausaban. Si Presidente Monson mismo nangulo sa pagpahinungod sa templo sa Calgary, Alberta, Canada; Siyudad sa Cebu, Philippines; Curitiba, Brazil; Kyiv, Ukraine; Siyudad sa Panama, Panama; Vancouver, British Columbia, Canada; ug Draper, Utah; Siyudad Kansas, Missouri; Rexburg, Idaho; South Jordan, Utah; Gila Valley, Arizona; ug Twin Falls, Idaho, USA; ug sa pagpahinungod pag-usab sa templo sa Siyudad sa Mexico, Mexico; ug Atlanta, Georgia; Boise, Idaho; ug Laie, Hawaii, USA.

• Si Presidente Monson nangulo usab sa talagsaong panahon diin ang mga miyembro maka-access na sa mga kapanguhaan sa Simbahan pinaagi sa internet, namulong sa mga pulong sa mga propeta ug sa mga programa sa Simbahan ngadto sa 14 milyones ka mga miyembro sa tibuok kalibutan. Mga dakong panghitabo naglakip sa nagkalain-laing mga video nga hinimo sa Simbahan, lakip sa sunod-sunod nga mga salida nga naghulagway sa importanting mga panghitabo gikan sa Bag-ong Tugon.

• Ubos sa direksyon sa Unang Kapangulohan, ang Simbahan mihimo sa bag-ong libro nga giulohan og Anak nga mga Babaye sa Akong Gingharian: Ang Kasaysayan ug Buhat sa Relief Society. Ang libro gitumong isip usa ka kapanguhaan sa personal ug pamilya sa pagpalig-on sa mga babaye sa ilang mga responsibilidad.

• Ubos sa pagpangulo ni Presidente Monson, ang Simbahan mitubag sa mga kalamidad sa tibuok kalibutan, ug mitabang niadtong nanginahanglan. Pipila ka dagkong humanitarian nga tabang sa milabayng lima ka tuig naglakip sa mga paningkamot sa pagtabang human sa linog sa Haiti, linog ug tsunami sa Japan, ug pagbaha sa Thailand. Ang Simbahan usab mitubag sa grabe nga krisis sa tibuok eastern Africa, mitabang sa pagpamakuna sa mga bata sa daghang mga nasud, ug nakahatag og limpyo nga tubig ngadto sa daghang hilit nga balangay. Dugang pa, ang Simbahan nakapahinungod og bag-ong 570,391-square-foot (53,000 metro kwadrado) nga pasilidad sa welfare sa Siyudad sa Salt Lake, Utah, USA.

Si Presidente Thomas S. Monson namulong ngadto sa media sa pagpahibalo sa bag-ong Unang Kapangulohan sa Ang Simbahan ni Jesukristo sa mga Santos sa Ulahing mga Adlaw niadtong Lunes, Pebrero 4, 2008.

Gilitratohan ni Agosto Miller, Deseret News